Vikatan.com

www.vikatan.com would like to send you push notifications.

Notifications can be turned off anytime from browser settings.

அருந்தமிழ் நாள்காட்டி!

''திருவள்ளுவர் ஆண்டை மையமாக வைத்து, தமிழ் எண்களோடு உருவாக்கப்பட்ட தமிழ் நாட்காட்டியை கடந்த 13 ஆண்டுகளாக வெளியிட்டு வருகிறோம். முதலில் வெறும் 500 நாள்காட்டிகளே விற்றன. இந்த ஆண்டு 10 ஆயிரம் நாள்காட்டிகள் விற்பனை ஆகின!'' - தமிழ்ப் பற்றிப் பேசப் பேச சின்னப்பத் தமிழர் முகத்தில் அத்தனை பெருமிதம். அரும்பாக்கம்- விநாயகபுரத்தில், 1999-ல் பல தமிழ் அறிஞர்கள் முன்னிலையில் தொடங்கப்பட்ட 'தமிழம்மா’ பதிப்பகத்தின் நிர்வாகி இவர். 

''நமக்கு மொழியும் தமிழ்த் தேசியமும் இரு கண்கள். மொழியையும் இனத்தையும் காப்பதற்கான போராட்டத்தில் 25 முறைக்கு மேல் சிறை சென்றுள்ளேன். 'நம் மொழியிலேயே எண்களை வைத்துக்கொண்டு, ஏன் இன்னும் அயல்நாட்டு முறையில் ஆன நாள்காட்டியைப் பயன்படுத்த வேண்டும்?’ என்ற அடிப்படை சிந்தனைதான் இந்த நாள்காட்டி வெளியிடக் காரணம். இதன் நோக்கம் விற்பனை மட்டுமல்ல; தமிழ் உணர்வு மக்களிடம் சென்றுசேர வேண்டும் என்பதும்தான். இந்த ஆண்டு அமெரிக்கா, மலேசியா போன்ற வெளிநாடுகளில் இயங்கும் தமிழ் அமைப்புகள் கேட்டுக்கொண்டதற்காக, இந்த நாள்காட்டிகளை அச்சடித்து அனுப்பினேன்.

இந்த நாள்காட்டியின் இன்னொரு சிறப்பு, திருவள்ளுவர் படம் மாற்றி அமைக்கப்பட்டு உள்ளது. நம் கற்பனைக்கு உயிர் கொடுக்கப்பட்டதே இன்றையத் திருவள்ளுவர் உருவம்.

'மழித்தலும் நீட்டலும் வேண்டா; உலகம்

பழித்தது ஒழித்து விடின்’- என்ற 280-வது குறட்பாவில் 'குடுமி வைத்துக்கொள்வது மட்டுமே அறம் சார்ந்த வாழ்க்கைக்கு அடையாளம் இல்லை’ என்று சொல்லி இருப்பார். அப்படிப்பட்டவர் எப்படி குடுமியுடன் வாழ்ந்து இருப்பார்?

இதேபோல், மணிப்பொறிகளையும் (கடிகாரம்) பல்வேறு வடிவங்களில் தமிழ் எண்களைக்கொண்டு வடிவமைத்து விற்பனை செய்கிறோம். இது, தமிழகத்தில் இதுவரை யாரும் செய்யாத முயற்சி. இதற்கு மக்கள் மத்தியில் வரவேற்பு குறைவாக இருந்தாலும் தமிழ்ப் பற்று காரணமாக ஒரு சிலர் வாங்கிச் செல்கின்றனர். இந்தக் கடையில் பல தமிழ்ச் சிற்றிதழ்களையும் விற்பனை செய்கிறோம். அதில் வரும் லாபத்தைவைத்தே நாட்காட்டித் தயாரிப்பு போன்ற மொழி சார்ந்த செயல்களைச் செய்ய முடிகிறது'' என்கிறார்.

நா.சிபிச்சக்கரவர்த்தி
படங்கள்: ஜெ.தான்யராஜு

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
வலைபாயுதே!
அமல் என்றொரு ஃபீனிக்ஸ்!

எடிட்டர் சாய்ஸ்