Vikatan.com

www.vikatan.com would like to send you push notifications.

Notifications can be turned off anytime from browser settings.

கலகலப் பக்கம்! - கு.ஞானசம்பந்தன்

9ஆம் ஆண்டு சிறப்பிதழ்

'நெல்லிக்கனி, நாவற்கனி, மாங்கனி, ஆப்பிள்... இந்தப் பழ வகைகளைக் கேட்டதும் சட்டுனு உங்களுக்கு என்ன நினைவுக்கு வருது?' என்ற கேள்வியோடு, அன்றைய வகுப்பைத் தொடங்கினேன்.

'நெல்லிக்கனி - ஒளவையார், அதியமான்' என்றாள் ஒரு மாணவி. 'நாவற்கனி - ஒளவையார், முருகன்!' - இது ஒரு மாணவர். 'மாங்கனி - விநாயகரும் முருகனும் உலகத் தைச் சுற்றிய போட்டி' என்று ஒரு மாணவர் சொல்லவும், 'காரைக்கால் அம்மையாரையும் சேர்த்துக்கொள்ளலாம்' என்றாள் ஒரு மாணவி. உடனே, ''சரி... ஆப்பிள்?'' என்று கேட்டேன்.

'அது நம்ம நாட்டுப் பழமே இல்ல சார்!' என்றார் ஒரு மாணவர். 'சரி, அப்படியானால் ஆப்பிளை கடைசியாகப் பார்ப்போம்' என்று சொல்லிவிட்டுத் தொடர்ந்தேன்...

'நெல்லிக்கனிக்கு ஒரு பழமொழியும் உண்டு. 'மூத்தோர் சொல்லும் முதுநெல்லிக்காயும் முன்னர் கசக்கும், பின்னர் இனிக்கும்.’ அதிய மான் தனக்குக் கிடைத்த, வாழ்நாளை நீட்டிக் கக்கூடிய நெல்லிக்கனியை, தான் உண்ணாது ஒளவைக்குக் கொடுத்தான். அதன் அருமை அறிந்த ஒளவையார், அந்தக் கனியை உண்டு அதியமானை வாழ்த்திப் பாடிய பாடல் ஞாபகமிருக்கிறதா? 'ஆலகால விஷத்தைத் தன் தொண்டையில் அடக்கிய சிவபெருமானைப் போல நீ வாழ வேண்டும்’ என்பது அந்தப் பாட்டு' என்று நான் க்ளூ கொடுக்க... 'நீல மணி மிடற்று ஒருவன் போல மன்னுக பெரும' என்று ஒரு மாணவி பாடல் வரியைச் சொல்ல, 'சபாஷ்' என்றேன்.

''அடுத்து நாவற்கனி. மாடு மேய்க்கும் சிறுவனாக முருகன் வந்து, 'சுட்ட பழம் வேண்டுமா? சுடாத பழம் வேண்டுமா?’ என ஒளவையைக் கலாய்க்கும் இந்தக் கதையில் சொல்லப்படும் மெஸேஜ் என்ன தெரியுமா?'' என்றேன்.

''எவ்வளவுதான் படித்திருந்தாலும், நமக்குத் தெரியாத செய்திகளும் உலகில் உண்டு. அந்தச் செய்தியை ஒரு சாமான்யரும் கூறலாம் என்பதையே இக் கதை மூலம் அறிகிறோம்' என்றொரு மாணவர் விளக்கம் கூறினார்.

''அருமை... அருமை! அடுத்து, ''மாங்கனி! அம்மையப் பனையே உலகமாகச் சுற்றி வந்து, விநாயகப் பெருமான் ஞானப்பழம் பெற்ற கதை என்ன சொல்கிறது?''

'அக்கதை அறிவுத் தெளிவின் அடையாளம், சார்! இருந்த இடத்திலேயே தாய் தந்தையரைச் சுற்றி, உலகைச் சுற்றிய தாகச் சொல்லி பழம் வாங்கிய விநாயகர்தான், இன்றைய கணினி உலகத்தின் முன்னோடி. நாமும் கணினி மூலம் உட்கார்ந்த இடத்திலேயே உலகைச் சுற்றி வருகிறோமில்லையா?' என்று ஒரு மாணவர் சொல்ல, 'ஆமாம் சார்! விநாயகருக்கு வாகனம் மௌஸ்; கம்ப்யூட்டருக்குத் தேவையானதும் மௌஸ். அந்த எலிக்கு வாலு பின்னாடி இருக்கும்; இந்த எலிக்கு வாலு முன்னாடி இருக்குது!' என்று வேடிக்கை விளக்கம் தந்தார் இன்னொரு மாணவர்.

'சரி... ஆப்பிளைப் பார்ப்போமா? ஆதிகாலத்தில் ஆதாம் ஏவாள், ஈடன் தோட்டத்தில் சாப்பிட்டது ஒரு ஆப்பிள்; நியூட்டனுக்குப் புவியீர்ப்பு விசையை உணர்த்தியது ஒரு ஆப்பிள்; இன்று ஸ்டீவ் ஜாப்ஸ் உள்ளங்கைக்குள் ஐபேடு, ஐபாட் என்று உலகைக் கொண்டுவந்தது தன் 'ஆப்பிள்’ கம்பெனி மூலம்தான். ஆப்பிள் அயல்நாட்டுப் பழம்; அதான், அயல்நாட்டுக் கதைகள்'' என்று நான் சொல்லி முடித்தேன்.

'பழக் கதைகள் மூலம் பழங்கதைகள் சொன்ன ஐயாவுக்கு ஜே!' என்று ஒரு மாணவர் கத்த, கல்லூரி மணி கலகலவென ஒலித்தது.

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
கேள்வி-பதில்
திருவிளக்கு பூஜை செய்ய அன்புடன் அழைக்கிறோம்!

எடிட்டர் சாய்ஸ்