Vikatan.com

www.vikatan.com would like to send you push notifications.

Notifications can be turned off anytime from browser settings.

நேற்று... இன்று... நாளை!

குடும்ப நிதி ஆலோசனை

சென்னை நீலாங்கரையைச் சேர்ந்த பாலமுருகனின் (வயது 35) மாதச் சம்பளம் 70,000 ரூபாய். இதில், குடும்பச் செலவு, கல்விச் செலவு மற்றும் இன்ஷூரன்ஸுக்காக 16,200 ரூபாய் செலவு செய்கிறார். 37,500 ரூபாயை வீட்டுக் கடனுக்கான இ.எம்.ஐ. கட்டி வருகிறார் (இன்னும் 20 ஆண்டுகள் கட்ட வேண்டும்!). ஐந்து மியூச்சுவல் ஃபண்டுகளில் தலா ஆயிரம் ரூபாயும் முதலீடு செய்து வருகிறார். ''இதெல்லாம் போக எதிர்கால சேமிப்புக்காக கையில் மீதமிருப்பது 11,300 ரூபாய்தான்'' என்றவர் தன் எதிர்காலத் தேவைகளைப் பட்டியலிட்டார்.    

''என் மகன் நவீன்குமாரை கல்லூரியில் சேர்த்து பட்டதாரியாக்க 9 வருஷம் கழிச்சு 12 லட்சம் ரூபாய் தேவை. அவனுக்கு 24 வயசுல கல்யாணம் செய்து வைக்க 25 லட்சம் ரூபாய் தேவை.

மகளுக்கும் சிறப்பானதொரு கல்வியைக் கொடுக்க,  பதினான்கு வருஷம் கழிச்சு 18 லட்சம் ரூபாயும், 24 வயசுல கல்யாணம் செய்துவைக்க 30 லட்சம் ரூபாயும் தேவை.

இதனோட, என் ஓய்வுக் காலத்துக்கு மாதம் ஒரு லட்சம் வருமானம் வரும்படியாக முதலீட்டை ஆரம்பிக்கணும்'' என்று தேவைகளை தெளிவாகச் சொன்னவருக்கு, அதற்கான ஆலோசனைகளை சொல்லத் தயாரானார் நிதி ஆலோசகர் பி.பத்மநாபன்.

ஆரம்ப கால நடவடிக்கை!

''இவர் முதலில் செய்ய வேண்டியது, பயன்படாமல் இருக்கும் இன்ஷூரன்ஸ் பாலிசி களை சரண்டர் செய்வதே. ஏனெனில், குறைவான கவரேஜ் கொண்ட பாலிசிகளுக்கு அதிக பிரீமியம் செலுத்தி வருகிறார்.

இந்த பாலிசிகளை சரண்டர் செய்வதன் மூலம் சரண்டர் தொகை இரண்டு லட்சம் ரூபாய் கிடைக்கும். இந்த தொகையிலிருந்து ஒரு லட்சம் ரூபாயை எடுத்து அவசரத் தேவைக்காக 8% வருமானம் எதிர்பார்க்கக்கூடிய லிக்விட் ஃபண்டுகளில் முதலீடு செய்ய வேண்டும். மீதமிருக்கும் ஒரு லட்சம் ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் முதலீடு செய்ய வேண்டும்.

இந்த முதலீடு பாலமுருகனின் ஓய்வுக் காலம் வரைக்கும் தொடர்ந்தால் அதிலிருந்து 16.36 லட்சம் ரூபாய் கிடைக்கும். இதை ஓய்வுக் காலத்திற்குப் பயன்படுத்திக் கொள்ளலாம்.

ஏற்கெனவே செய்துவரும் மியூச்சுவல் ஃபண்ட் முதலீட்டை நிறுத்தி விட்டு, அதற்கு பதில் புதிதாக ஈக்விட்டி டைவர்சிஃபைட் ஃபண்டுகளில் முதலீட்டை ஆரம்பிக்க வேண்டும். ஃபண்ட் மூலம் ஏற்கெனவே செய்துள்ள முதலீடு நான்கு லட்சம் ரூபாய் உள்ளது. இந்த தொகையை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் முதலீடு செய்வ தால் 13 ஆண்டுகள் கழித்து 24.61 லட்சம் ரூபாய் கிடைக்கும்.

நவீன்குமார் மற்றும் கிருத்விகாவின் கல்விச் செலவுக்கு, அவர்களின் கல்விக்காகச் செய்யப் போகும் முதலீட்டின் மூலம் கிடைக்கும் தொகையைவிட அதிகமான தொகை தேவைப்படும் பட்சத்தில் இந்த 24.61 லட்சத்திலிருந்து எடுத்து பயன்படுத்திக் கொள்ளலாம். அப்படி தேவைப்படாதபோது இதை முதலீடு செய்தால்,

20 ஆண்டுகள் கழித்து 65.46 லட்சம் ரூபாய் கிடைக்கும். இந்தத் தொகையை பாலமுருகன் தன் ஓய்வுக் காலத்திற்குப் பயன்படுத்திக் கொள்ளலாம்.

இன்ஷூரன்ஸ்!

மேலே சொன்ன இன்ஷூரன்ஸ் பாலிசிகளை சரண்டர் செய்யும் முன்னர் ஒரு கோடி ரூபாய்க்கு டேர்ம் இன்ஷூரன்ஸ் (25 ஆண்டுகளுக் கானது) பாலிசி எடுத்துக் கொள்வது அவசியம். இதற்காக ஆண்டு பிரீமியம் 20,000 ரூபாய் கட்ட வேண்டியிருக்கும். இவருக்கும், இவரது குடும்ப உறுப்பினர்களுக்கும் ஹெல்த் இன்ஷூரன்ஸ் இல்லாததால், ஐந்து லட்சம் ரூபாய்க்கு ஃப்ளோட்டர் ஹெல்த் பாலிசி எடுத்துக் கொள்வது அவசியம். இதற்கு ஆண்டு பிரீமியம் 12,000 ரூபாய் கட்ட வேண்டும்.


மகனின் கல்வி மற்றும் திருமணம்!

இன்னும் ஒன்பது வருடம் கழித்து ஏதேனும் பட்டப் படிப்பில் மகனைச் சேர்க்க விரும்புவதால் 12 லட்சம் ரூபாய் தேவை என்று சொல்லியிருந்தார். இந்த தொகையை முதலீட்டின் மூலம் பெற மாதம் 5,300 ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் ஒன்பது ஆண்டுகள் முதலீடு செய்ய வேண்டும். முதலீடு முதிர்வின்போது கிடைக்கும் தொகை 12.13 லட்சம் ரூபாய்.

மகனுக்கு 24 வயதில் திருமணம் செய்ய 25 லட்சம் ரூபாய் தேவை. இதற்காக மாதம் 3,700 ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் 15 ஆண்டுகள் முதலீடு செய்ய வேண்டும். முதிர்வின்போது கிடைக்கக்கூடிய 25.04 லட்சம் ரூபாயை வைத்து திருமணத்தை பிரமாதமாகச் செய்து முடிக்கலாம்.

மகளின் கல்வி மற்றும் படிப்பு!

தன் மகளையும் பட்டப் படிப்பு படிக்க வைத்து, 24 வயதில் திருமணமும் செய்து வைக்க நினைக்கிறார். இதற்கு  படிப்புக்கு 18 லட்சம் ரூபாயும், திருமணச் செலவுக்கு 30 லட்சம் ரூபாயும் தேவை என்கிறார்.

கல்விச் செலவிற்காகத் தேவைப்படும் தொகைக்கு மாதம் 2,300 ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் 14 ஆண்டுகள் முதலீடு செய்ய வேண்டும். முதலீடு முதிர்வின்போது 13.15 லட்சம் ரூபாய் கிடைக்கும்.

நவீன்குமாரின் கல்வித் தேவை முடிந்ததும், அதற்காக சேமித்து வந்த 5,300 ரூபாயை ஐந்து ஆண்டுகள் 12% வருமானம் எதிர்பார்க்கக்கூடிய பேலன்ஸ்டு ஃபண்டுகளில் முதலீடு செய்ய வேண்டும். இதன் மூலம் கிடைக்கும் தொகை 4.40 லட்சம் ரூபாய். ஆக, கிருத்விகாவின் கல்விக்காக முதலீட்டின் மூலம் கிடைக்கும் மொத்த தொகை 17.55 லட்சம் ரூபாய்.

மகளின் திருமணச் செலவுக் காக மாதம் 2,000 ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் 20 ஆண்டுகள் முதலீடு செய்ய வேண்டும். முதலீடு முடியும்போது 30.32லட்சம் ரூபாய் கிடைக்கும். இந்த பணத்தை பயன்படுத்தி மகளின் கல்யாணத்தை அமர்க்களப்படுத்திவிடலாம்.

ஓய்வுக் காலம் சிறக்க..!

இன்றுபோல் ஓய்வுக் காலத்திலும் செலவு செய்து வாழ இவருக்கு மாதம் ஒரு லட்சம் ரூபாய் வருமானம் வந்து கொண்டிருக்க வேண்டும். அதற்கு இவரிடம் ஓய்வுக் காலத்தில் ஒரு கோடி ரூபாய் இருக்க வேண்டும். இதற்காக மாதம் 4,700 ரூபாயை 15% வருமானம் எதிர்பார்க்கக்கூடிய ஈக்விட்டி டைவர்சிஃபைட் ஃபண்டுகளில் 20 ஆண்டுகள் முதலீடு செய்ய வேண்டும். முதலீடு முதிர்வின்போது 71.25 லட்சம் ரூபாய் கிடைக்கும்.

கிருத்விகாவின் கல்வித் தேவைக்காக செய்துவந்த 5,300 ரூபாயை 12% வருமானம் எதிர்பார்க்கக்கூடிய பேலன்ஸ்டு ஃபண்டுகளில் 6 ஆண்டுகள் முதலீடு செய்ய வேண்டும். இந்த முதலீட்டி லிருந்து 6.20 லட்சம் ரூபாய் கிடைக்கும்.

அதேபோல் நவீன் குமாரின் திருமணத் தேவை முடிந்ததும் அதற்காக செய்துவந்த முதலீட்டுத் தொகை 3,700 ரூபாயை ஓய்வுக் காலத்திற்காக வங்கி ஆர்.டி.யில் (வருமானம் 8%) ஐந்து ஆண்டுகள் முதலீடு செய்தால் 2.74 லட்சம் ரூபாய் கிடைக்கும். கிருத்விகாவின் கல்வித் தேவை முடிந்ததும் அதற்காகச் செய்துவந்த 2,300 ரூபாயை ஆறு ஆண்டுகள் வங்கி ஆர்.டி.யில் முதலீடு செய்தால் 2.69 லட்சம் ரூபாய் கிடைக்கும். ஆக, மியூச்சுவல் ஃபண்ட் முதலீடு, ஆர்.டி. என மொத்தம் 82.88 லட்சம் ரூபாய் கிடைக்கும்.

தவிர, இன்ஷூரன்ஸ் பாலிசி சரண்டர் செய்த தொகை யிலிருந்து ஒரு லட்சம் ரூபாயை எடுத்து ஓய்வுக் காலத்திற்காக மியூச்சுவல் ஃபண்டில் முதலீடு செய்ததிலிருந்து 16.36 லட்சம் ரூபாய் கிடைக்கும். இந்த இரண்டையும் சேர்த்தால், ஓய்வுக் காலத்திற்கான எல்லா முதலீடுகளிலிருந்தும் கிடைக்கும் தொகை  99.24 லட்சம் ரூபாய். இந்த பணத்தை பாதுகாப்பான முதலீட்டில் போட்டு வைப்பதன் மூலம் மாதா மாதம் ஒரு லட்சம் ரூபாய் வருமானம் வந்து கொண்டிருக்கும்''.

- செ.கார்த்திகேயன்
படங்கள்: சரா

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
ஃபர்ஸ்ட் ஜெனரேஷன்!
மை டியர் மணி!

எடிட்டர் சாய்ஸ்