மின்னணுப் பொருட்களைத் தவிர மற்ற அனைத்துப் பொருட்களின் விலையும் கூடிக்கொண்டேபோகிறது. மருத்துவச் செலவுகள் வருடத்துக்கு 15 சதவிகிதம் அளவுக்கு அதிகரிப்பதாக ஒரு கணக்கெடுப்பு சொல்கிறது. இந்தச் சூழ்நிலையில் மருத்துவக் காப்பீடும்கூட சில சமயங்களில் போதுமானதாக இல்லை.  நண்பர் ஒருவர், மூன்று லட்ச ரூபாய்க்கு ஃப்ளோட்டர் பாலிசி எடுத்திருந்தார். மாரடைப்பு வந்து மருத்துவமனையில் அனுமதிக்கப்பட்டார். மருத்துவக் காப்பீடு இருந்த காரணத்தால், எளிதாக சிகிச்சை முடித்துக்கொண்டு வீடு திரும்பினார். ஆனால், ஒரு வார சிகிச்சைக்கு ரூ. 2.5 லட்சம் வரை செலவாகிவிட்டது. 'பட்ட காலிலேயே படும்’ என்பதுபோல அடுத்த சில மாதங்களில் பள்ளியில் படிக்கும் அவரது மகன் 'டூ வீலர்’ கற்றுக்கொள்ளும்போது கீழே விழுந்து, தலை, இடது கை மற்றும் இடது காலில் பலத்தக் காயம். உயிருக்கு ஆபத்து இல்லை. . .