Vikatan.com

www.vikatan.com would like to send you push notifications.

Notifications can be turned off anytime from browser settings.

குறையும் வட்டி விகிதம்... கொட்டிக் கொடுக்கும் பங்குகள்!

பொற்காலமே இனிமேல்தான்!

நிஃப்டி 4531 என்பதுதான் அடுத்த சில வருடங்களுக்கு குறைந்தபட்ச புள்ளி..!

சந்தை மீண்டும் காளையின் பிடியில்!

கடந்த சில மாதங்களாக சந்தை பற்றி நாணயம் விகடன் சொல்லி வந்த தீர்க்கமான முடிவுகள் இவை. நாம் சொன்னபடியே சந்தையில் நடந்திருக்கிறது. நிஃப்டி கிட்டத்தட்ட 1000 புள்ளிகளுக்கு மேல் உயர்ந்திருக்கிறது. இந்த வேகத்தை இன்னும் அதிகப்படுத்துகிற மாதிரி பணவீக்கமும் கட்டுக்குள் வந்திருக்கிறது. இதனால் வட்டி விகிதங்கள் குறைக்கப்படலாம் என்ற எதிர்பார்ப்பு சந்தையில் பலமாகவே இருக்கிறது.

ந்த நிலைமையில் சந்தை எதை நோக்கி செல்லும், வட்டி விகிதங்களைக் குறைக்க ஆர்.பி.ஐ. முடிவு செய்யும் பட்சத்தில் எந்தெந்த துறைகளுக்கு சாதகமாக இருக்கும், அந்தத் துறைகளில் இப்போதைக்கு முதலீடு செய்ய ஏற்ற பங்குகள் எவை என்கிற பல கேள்விகளோடு பங்குச் சந்தை நிபுணர் ஸ்ரீராமை சந்தித்தோம்.

சந்தையின் போக்கினை உன்னிப்பாக கவனித்துக் கொண்டிருந்தவர் நம் கேள்விகளுக்கு விளக்கமாகவே பதில் சொன்னார். ''கடந்த ஒரு மாதத்துக்குள் சந்தை 1000 புள்ளிகளை கடந்திருக்கிறது. ஆஹா, பஸ்ஸை மிஸ் பண்ணிவிட்டோமே என்று நினைத்து சந்தையைத் துரத்த வேண்டாம். காரணம், சந்தை மீண்டும் உங்களுக்கு ஒரு பொன்னான வாய்ப்பைத் தர காத்திருக்கிறது. கடந்த ஒரு மாதத்தில் ஆயிரம் புள்ளிகள் உயர்ந்ததால் அதில் பாதியாவது குறைய நிறைய வாய்ப்பிருக்கிறது.  

நிஃப்டி ஐநூறு புள்ளிகள் குறையாவிட்டாலும், 300 புள்ளிகளாவது குறைந்து அதன்பிறகு மேலே செல்ல வாய்ப்பிருக்கிறது. சந்தை எந்த புள்ளியில் நிலை பெறுகிறதோ, அந்த புள்ளியில் இருந்து குறைந்தபட்சம் 1000 புள்ளிகள் வரை மீண்டும் மேலே செல்ல வாய்ப்பிருக்கிறது. அதாவது, சந்தை 5200 புள்ளிகள் வரை சென்று திரும்பினால், 6200 புள்ளிகள் வரை மேலே செல்ல வாய்ப்பிருக்கிறது. இந்த ஏற்றம் அதிகமாக இருக்கும் பட்சத்தில் 6765 புள்ளிகள் வரைகூட செல்லலாம்'' என்றவர்,  வட்டி விகிதங்கள் குறைந்தால் எந்தெந்த துறைக்கு லாபம் என்கிற முக்கியமான கேள்விக்கு பதில் சொல்ல ஆரம்பித்தார்.

''மார்ச் மாதத்திலோ அல்லது ஏப்ரல் மாதத்திலோ வட்டி விகிதங்கள் குறைய வாய்ப்பிருக்கிறது. அப்படி குறையும்போது ஆட்டோ, ரியால்டி, ஒயிட் குட்ஸ்  உள்ளிட்ட துறைகளில் இருக்கும் பங்குகள் சிறப்பாக செயல்பட வாய்ப்பிருக்கிறது.

வட்டி விகிதங்கள் குறைந்தால் வங்கிப் பங்குகள் சிறப்பாக இருக்கும் என்று நினைக்கிறார்கள் பலர். நான் அப்படி நினைக்கவில்லை. வங்கிகளின் வேலை, குறைவான வட்டிக்கு மக்களிடமிருந்து டெபாசிட் வாங்கி அதிக வட்டிக்கு கடன் கொடுப்பதுதான். ஏழு சதவிகிதத்திற்கு மக்களிடமிருந்து டெபாசிட் வாங்கினால் 10 சதவிகிதத்துக்கு கடன் கொடுப்பார்கள். மக்களிடமிருந்து 10 சதவிகிதத்திற்கு டெபாசிட் வாங்கினால், 13 சதவிகிதத்துக்கு கடன் கொடுப்பார்கள். ஆக, வட்டி விகிதம் எத்தனை சதவிகிதமாக இருந்தாலும், வங்கிகளுக்கு கிடைக்கப் போகிற லாபம் 3 சதவிகிதம்தான். இது மாறாது என்கிறபோது வட்டி விகிதம் குறைவதால் வங்கிகளின் லாபம் எப்படி அதிகரிக்கும்?

ஆனால் ஆட்டோ, ரியால்டி, ஒயிட் குட்ஸ் போன்ற துறைகள் வட்டி விகித குறைப்பினால் நேரடியாக பயனடையும். வட்டி விகித குறைப்பினால் வாகனங்கள் வாங்குவது, வீடு கட்டுவது, வீட்டுக்குத் தேவையான பொருட்களை வாங்குவது போன்றவை அதிகரிக்கும். அதனால் இத்துறையில் இருக்கும் நிறுவனங்களின் வருமானம் அதிகரித்து பங்குகளின் விலை உயர வாய்ப்பு இருக்கிறது.

ஆட்டோ துறை!

தற்போதைய நிலையில் டாடா மோட்டார் மற்றும் ஹீரோ மோட்டோ கார்ப் உள்ளிட்ட பங்குகள் வாங்குவதற்கு ஏற்றவையாக இருக்கிறது.

டாடா மோட்டார் கொஞ்சம் அதிகமாகவே ஏறி இருப்பதாகத் தோன்றும். ஆனால், அந்த பங்கு தற்போதைய விலையிலும்கூட நல்ல பங்குதான். இருந்தாலும் கொஞ்சம் கொஞ்சமாக முதலீடு செய்யலாம். இந்த பங்கு எவ்வளவு குறைந்தாலும் 200 ரூபாய்க்கு கீழே குறைய வாய்ப்பில்லை.

ஹீரோ மோட்டார் தற்போது 2,100 ரூபாய்க்கு அருகில் இருக்கிறது. அதிகபட்சம் 1,800-1,850 அருகில் வர வாய்ப்பிருக்கிறது. அந்த விலைக்கு அருகில் வரும்போது முதலீடு செய்யலாம்.


கட்டுமானத் துறை!

சமீப காலங்களில் இத்துறை நன்றாகவே உயர்ந்து வருகிறது. அந்த ஏற்றம் வட்டி விகிதம் குறையும்போது இன்னும் அதிகரிக்கும் என்றே சொல்லலாம். இதில் டி.எல்.எஃப்.

மற்றும் ஹெச்.டி.ஐ.எல். போன்ற பங்குகளை தற்போதைய நிலையில்கூட வாங்கலாம். ஒருவேளை இது ரிஸ்க் என்று நினைத்தால் இன்ஃப்ரா துறையில் இருக்கும் மியூச்சுவல் ஃபண்டுகளில் முதலீடு செய்யலாம். கனரா ராபிகோ இன்ஃப்ரா, பிர்லா சன் லைஃப் இன்ஃப்ரா போன்ற ஃபண்டுகளில் முதலீடு செய்யலாம். அடுத்த சில வருடங்களில் இன்ஃப்ரா துறை நல்ல வருமானத்தைத் தரப்போகிறது. அதனால் முதலீட்டாளர்கள் பலன்பெற வேண்டும் என்றுதான் இன்ஃப்ரா ஃபண்டுகளை பரிந்துரை செய்கிறேன்.


ஒயிட் குட்ஸ்!

வட்டி விகிதங்கள் குறையும் போது, இ.எம்.ஐ.யில் டி.வி., பிரிட்ஜ் போன்றவை வாங்குவது அதிகரிக்கும். அப்படி அதிகரித்தால் இந்நிறுவனங் களின் வருமானம் அதிகரிக்கும். இதன் காரணமாக வேர்ல்பூல், ஹிட்டாச்சி போன்ற பங்குகள் அதிகரிக்கும். கூடுதலாக இன்னுமொரு பங்கு சொல்ல வேண்டுமென்றால் டி.டி.கே பிரெஸ்டீஜ். இப்போது இந்த பங்கு புல்லிஷ் டிரெண்டில் இருப்பதை மறந்துவிடாதீர்கள்.

ஐ.டி.சி., ஹெச்.யூ.எல். போன்ற பங்குகளையும் முதலீட்டாளர்கள் கொஞ்சம் கவனிக்கலாம். அவை பல்வேறு பொருட்களை உற்பத்தி செய்வதால் ஓரளவுக்கு நிறையவே லாபம் தரும் என்று எதிர்பார்க்கலாம்.

சந்தையில் முதலீடு செய்ய இன்னொரு வாய்ப்பு கிடைப்பது போல தெரிகிறது. இந்த முறையும் வாய்ப்பைத் தவற விட்டுவிடாதீர்கள்!

-வா.கார்த்திகேயன்.

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
ஃபண்ட் ரிசர்ச்!
எம்.சி.எக்ஸ். ஐ.பி.ஓ. லாபம் தருமா?

எடிட்டர் சாய்ஸ்