Vikatan.com

www.vikatan.com would like to send you push notifications.

Notifications can be turned off anytime from browser settings.

ஸ்ரீவீணா தட்சிணாமூர்த்தி - துடையூர் (திருச்சி)

 
கல்வி ஞானம் அருள்வாய்... சரணம்!
ஸ்ரீவீணா தட்சிணாமூர்த்தி - துடையூர் (திருச்சி)

தென்முக தெய்வமாம் ஸ்ரீதட்சிணாமூர்த்தியை ஞானக் கடவுள் என்று போற்றுகின்றன புராணங்கள். சனகாதி முனிவர்களுக்கு மௌன உபதேசம் செய்த தட்சிணாமூர்த்தியை வழிபட கல்வி- ஞானம் பெருகும் என்கின்றன ஞானநூல்கள். அதிலும் வீணையுடன் காட்சி தரும் தட்சிணாமூர்த்தியை தரிசிப்பது கூடுதல் விசேஷம்!

திருச்சி- நாமக்கல் செல்லும் பாதையில், சுமார் 15 கி.மீ. தொலைவில்... குணசீலத்துக்கு முன்னதாக வரும் ஊர் துடையூர். புராணச் சிறப்புகள் நிறைந்த திருத்தலம். ஸ்ரீராமன், தனது அம்பால் அசுரன் மாரீசனின் துடையைத் துளைத்த தலம் ஆதலால், துடையூர் என்று பெயராம்.

 

இங்கே காவிரி- கொள்ளிட நதிகளுக்கு நடுவே அழகுற அமைந்திருக்கும் ஸ்ரீமங்களாம்பிகை உடனுறை ஸ்ரீநஞ்சுண்டேஸ்வரர் ஆலயத்தில், வீணையுடன் நின்ற கோலத்தில் அருளும் ஸ்ரீதட்சிணாமூர்த்தியை தரிசிக்கலாம். இவரை, 'திகிசண்டளா வீணா தட்சிணாமூர்த்தி' என்கின்றனர். ஜாதகத்தில் குரு பலம் இல்லாதவர்கள், நல்ல வேலைக்காக காத்திருப்போர், உத்தியோகத்தில் சிக்கல்கள் நீங்கவும் கல்வியில் மந்த நிலை மாறவும் விரும்புவோர் இவரை வழிபட்டு பலன் பெறலாம் என்கிறார்கள். செவ்வாய், வியாழன், ஞாயிறு, பௌர்ணமி, அமாவாசை மற்றும் திருவோண நட்சத்திர நாட்களில் இவருக்கு விசேஷ வழிபாடுகள் செய்வது நலம். இந்த நாட்களில், மனோரஞ்சித மலர்களால் ஆன மாலை சார்த்தி, தேன் அபிஷேகம் செய்து வழிபட வேண்டும். அபிஷேகத் தேனை வாங்கி வந்து, அதிகாலை வேளையில் இவரை மனதில் தியானித்தபடி பருகினால், மேற்சொன்ன பிரார்த்தனைகள் யாவும் பலிக்கும் என்பது நம்பிக்கை.

குறிப்பாக... மனம் ஒருமுகப்பட்டு படிப்பதற்கும், சிந்தனையில் தெளிவு வேண்டியும்... சுற்றுவட்டார மாணவ- மாணவியர் இந்தக் கோயிலுக்கு வந்து ஸ்ரீவீணா தட்சிணாமூர்த்தியை மனமுருக வழிபட்டுச் செல்கின்றனர். இவர்களின் வேண்டுதல்களை தட்டாமல் நிறைவேற்றுகிறார் இந்த ஞானக் கடவுள்!

- சண். சரவணக்குமார்
படங்கள் கோ. மணிவண்ணன்