Vikatan.com

www.vikatan.com would like to send you push notifications.

Notifications can be turned off anytime from browser settings.

கோடைக்கு ஏற்ற உத்சவம்!

கோடை என்பது மக்களுக்கு மட்டுமில்லாமல் கடவுளுக்கும் மிகவும் கஷ்டமான காலம் போல. மக்களாகிய நம்மால்தான் வெயிலை சமாளிக்க முடியவில்லை. இறைவனாலும் முடியவில்லை போல. அதற்காக தான் ஸ்ரீரங்கத்து பெருமானும் பிராட்டியும் பூச்சாற்றி உத்சவம் கொண்டாடிக்கொள்கின்றனர். சித்திரை மாதம் சூரியனின் மாதம். அவனது முழு கதிர்களையும் மக்கள் மீது செலுத்துகிறான்.

 கோடை காலத்தின் தொடக்கத்தில் அதாவது சித்திரை மாதத்தில், முதலில் பெருமாளுக்கும் அதனை தொடர்ந்து தாயாருக்கும் இந்த உத்சவம் நடக்கும். பத்து நாட்கள் நடக்கும். பக்தர்கள் தரும் பூக்கள் அனைத்தையும் இறைவனுக்கு சாற்றுவார். அனைத்தையும் சாற்றி இறுதியாக அரையர் அவர்கள் வீட்டிலிருந்து வந்த பூக்கள் போர்வையை சாற்றுவர். இதில் பெரும்பாலும் மல்லிகை மலர்களே இடம் பெறும். தாயார் பெருமாள் விக்ரஹம் முழுவதும் மலர்களால் மூடப்பட்டு இருக்கும.

இந்த உத்சவம் குறித்து ஸ்ரீரங்கத்து வாசிகள் கூறுவது, '' இது கோடைக்கான உத்சவம். இது மாலை ஆறு மணிவாக்கில் நடைபெறும். இதனால் வெயிலின் தாக்கம் கொஞ்சம் குறைந்து ஆசுவாசமாக இறைவனை தரிசிக்கலாம். மேலும் பக்தர்கள் இடையே பாகுபாடில்லாமல் அனைவரும் தரும் மலர்களை சாற்றுவார்கள். மனதிற்கு இதமான மல்லிகை மனமும் மாலை வேளையும் சூரியனின் தாக்கத்திலிருந்து கொஞ்சம் நிம்மதி அளிக்கிறது. ஆன்மீகம் என்பதையும் மீறி கொடுமையான உஷ்ணத்திலிருந்து சிறிது மாற்றம் தரும் உத்சவம். மல்லிகைக்கு இயற்கையாகவே சூட்டை தணிக்கும் தன்மை உள்ளது. ஆகவே இதை மக்களுக்கு  உணர்த்தவே இப்படி ஒரு உத்சவம் கொண்டாடப்படுகிறது. ஸ்ரீரங்கம் மட்டுமல்லாமல் திருவெள்ளரை போன்ற வைணவத் தலங்களிலும் இந்த உத்சவம் கொண்டாடப்படுகிறது.  மாலை ஆறு மணி முதல்  இரவு எட்டு மணி வரை இந்த பூச்சாற்றி உத்சவ கோலத்தில் இறைவனை தரிசிக்கலாம்.  மேலும் சன்னதியில் கருவறைக்குள் தொலைவிலிருந்து தரிசிப்பதைவிட மிகவும் அருகில் சேவிக்கலாம்.

பெருமாள் மணல் வெளியிலும் தாயார் தனது சன்னிதியின் பிரகாரத்திலும் இந்த உத்சவத்தை கொண்டாடுவார். பெருமாள் மீது சாற்றப்பட்ட பூக்கள் அந்த நாள் முடிவில் பக்தர்களுக்கு வழங்கப்படும். இது மிகவும் விசேஷமானது. மாலை 5 மணி முதல் கோவில் சார்பாக பக்தர்களிடம் பூக்கள் வாங்கப்படும். இதற்காக கோவிலின் அனைத்து வாசலிலும் பக்தர்கள் காத்திருப்பார்கள். மிகவும் குளிர்ச்சியான உத்சவம் இது. உடலிற்கும் மனதிற்கும் குளுமையான உத்சவம்.

மு.கோதாஸ்ரீ, மாணவ பத்திரிகையாளர்,

படங்கள்: தே.தீட்ஷித்