Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

உயிரைப் பணயம் வைத்து ஒரு காதல்!

சினிமாவை மிஞ்சும் ரியல் ஸ்டோரிஎம்.புண்ணியமூர்த்தி, படங்கள்: க.தனசேகரன்

காதல் திருமணங்கள் என்றாலே த்ரில்தான். அப்படி ஒரு த்ரில் திருமணம்தான், மாதேஷ் அனிதாவுடையதும்! வலுக்கட்டாயமாக இன்னொரு வருடன் மணமேடை வரை கொண்டு செல்லப்பட்ட தன் காதலியை, உயிரைப் பணயம் வைத்துப் போராடி தன் மனைவியாக்கியிருக்கிறார் மாதேஷ்!

கிருஷ்ணகிரி மாவட்டம், சூளகிரியை அடுத்துள்ள ராமாபுரத்தில் வசிக்கும் இந்த புதுமணத் தம்பதியை, வியப்பு கலந்த வாழ்த்துகளுடன் சந்தித்தோம்.  

''நீங்க கொஞ்ச நேரத்துல சாகப்போறீங்க; உங்க காதலிக்கு வேறொருத்தரோட கல்யாணம் நடக்கப் போகுது... இப்படி ஒரு சூழல்ல, என்ன பண்ணுவீங்க? 'என்னதான் ஆகுது பார்த்துருவோம்டா’னு ஒரு வீரம் வரும் பாருங்க... அந்த தைரியம்தான் இன்னிக்கு அனிதாவை எங்கிட்ட சேர்த்திருக்கு!''

வெட்கம் பூக்கிறது மாதேஷ் முகத்தில்.

''பத்தாவது வரைக்கும் படிச்சிருக்கேன். அப்பா, அம்மா, ரெண்டு தம்பிங்க... இதுதான் என் குடும்பம். லோன் போட்டு ஒரு சுமோ கார் வாங்கி, ஓசூர்ல ஓட்டினேன். பெங்களூருல இருக்குற ஒரு கார்மென்ட் கம்பெனிக்கு வேலையாட்களை அழைச்சிக்கிட்டுப் போற கான்ட்ராக்ட் கிடைச்சது. அப்படி ஆணும் பொண்ணுமா ஏத்திட்டுப் போன 10 பேர்ல ஒருத்தர்தான், அனிதா!''

அறிமுகம் தந்து நிறுத்தினார் மாதேஷ்.

அனிதாவுக்குப் பூர்விகம் ஆந்திரா. ''குடும்பத்தோட சூளகிரிக்கு பக்கத்துல இருக்குற கொரளத்தொட்டிக்கு வந்துட்டோம். ஒரு அண்ணன், ரெண்டு தங்கச்சி, நான்னு வீட்டுல மொத்தம் நாலு பசங்க. அப்பாவுக்கும் அம்மாவுக்கும் கூலி வேல. பத்தாவதுக்கு மேல எனக்கு படிப்பு வரல. கார்மென்ட் கம்பெனி வேலைக்குப் போக ஆரம்பிச்சேன். அப்போதான் இவரைப் பார்த்தேன். ரெண்டு பேரும் காதலிக்க ஆரம்பிச்சோம்.

ரெண்டு பேரோட குடும்பச் சூழலையும் ஒருத்தருக்கு ஒருத்தர் புரிஞ்சுக்கிட்டதால, கடமைகளை கொஞ்சம் முடிச்சிட்டு, ரெண்டு வருஷம் கழிச்சு கல்யாணம் பண்ணிக்கலாம்னு முடிவெடுத்தோம். எங்கூட வேலைபார்க்குற ஒருத்தர், இதை எங்கம்மாகிட்ட சொல்லிட்டாங்க. உடனே சட்டுனு கல்யாணம் பேசி முடிச்சிட்டாங்க. மாதேஷுக்கு போன் பண்ணி, 'எப்படியாச்சும் என்னைக் கூட்டிட்டுப் போயிடுங்க’னு அழுதேன். ஜனவரி 22-ம் தேதி பந்தல் நாள், 23-ம் தேதி சூளகிரியில கல்யாணம். '22-ம் தேதி ராத்திரி என் ஃப்ரெண்ட்ஸை அனுப்புறேன். அவங்ககூட வந்துடு’னு சொன்னார் மாதேஷ்.

கல்யாணத்துக்கு முதல் நாள் நைட், மண்டபத்துல திடீர்னு லைட் ஆஃப் ஆயிருச்சு. ஒரே சத்தம். வெளிய வந்து பார்த்தா, மாதேஷோட ஃப்ரெண்ட்ஸ் ரெண்டு பேர், எங்க சொந்தக்காரங்க பிடியில இருக்காங்க. லைட்டை ஆஃப் பண்ணிட்டு என்னைக் கூட்டிட்டுப் போக என் ரூமுக்கு வந்திட்டிருந்ததை எங்க மாமா பார்த்துட்டார். பொண்ணைத் தூக்க வந்திருக்காங்கனு தெரிஞ்சுபோச்சு. ஆனா, அதை வெளிய சொல்ல முடியாதுங் கிறதால, திருடனுங்கனு சொல்லி போலீஸ்ல பிடிச்சுக் கொடுத்துட்டாங்க. என்னையும் ரூம்ல அடைச்சு வெச்சுட்டாங்க. மாதேஷ் வருவார்ங்கிற நம்பிக்கை எனக்கு சுத்தமா போயிருச்சு. மறுநாள் காலையில முகூர்த்த நேரத்துக்கு நான் மணமேடைக்கு வந்துட்டேன். மாப்பிள்ளையும் வரப்போறார். திடீர்னு என் எதிர்ல வந்து நிக்குறார் மாதேஷ்!''  சினிமா காட்சியின் விறுவிறுப்போடு சென்றது கதை!

''அப்புறம் என்ன நடந்துச்சுன்னா...''

மாதேஷ் குரலில் பூரிப்பு.

''நான் அனுப்பின மூணு ஃப்ரெண்ட்ஸ்ல ரெண்டு பேர்தான் மாட்டினாங்க. இன்னொருத்தன் போன் பண்ணி விஷயத்தைச் சொல்லிட்டான். என்ன பண்றதுனு தெரியாம, இயலாமையில விடியக்காத்தால விஷத்தைக் குடிச்சிட்டேன். சாகப்போற பயம் ஒரு பக்கம்; என் காதலிக்குக் கல்யாணம்ங்கிற வலி ஒரு பக்கம். என்னதான் நடக்குதுனு பார்த்துடலாம்னு ஒரு தைரியம் வந்துருச்சு.

மஞ்சகொம்புல தாலி ஒண்ணு ரெடி பண்ணி பாக்கெட்ல வெச்சிக்கிட்டு, மொய் கவரோட மேடைக்குப் போனேன். என்னைப் பார்த்ததும் அதிர்ச்சியான அனிதா ஒரே அழுகையா அழுதா. ஆகுறதைப் பாத்துக்கலாம்னு பாக்கெட்ல வெச்சிருந்த தாலியை எடுத்து அவ கழுத்துல போட்டுட்டேன். அவ சொந்தக்காரங்க எல்லோரும் சேர்ந்து என்னை வெளுத்தப்போ, அதுல ஒருத்தர் என் பாக்கெட்ல இருந்த விஷ பாட்டிலை பார்த்துட்டார். 'பையன் விஷம் குடிச்சுருக்கான்'னு அவர் சொல்ல, அடிச்சவங்க எல்லோரும் விலகிட்டாங்க. போலீஸுக்குத் தகவல் கொடுத்து, என்னை ஆஸ்பத்திரிக்கு அனுப்பி வைக்க, அங்க நான் பொழச்சுட்டேன்!''

மாதேஷ் நிறுத்த...

"எனக்கு முடிவாகியிருந்த மாப்பிள்ளை, என்னைக் கல்யாணம் பண்ணிக்க முடியாதுனு சொல்லி, அதே மேடையில அவரோட அத்தை பொண்ணைக் கல்யாணம் பண்ணிக்கிட்டார். அப்பக்கூட எங்க வீட்டுல என்னை இவருக்கு கல்யாணம் பண்ணி வைக்க நினைக்காம, எங்க அத்தை பையனுக்கு கல்யாணம் பண்ணி வைக்கலாம்னு பேசினாங்க. எங்க அத்தை ஒப்புக்கல. அப்புறம் கிராமத்து ஆளுங்க எங்க ரெண்டு வீட்டுலயும் பேசி கல்யாணத்தை முடிச்சு வெச்சாங்க!''

ஒருவழியாக சுப க்ளைமாக்ஸ் விழுந்ததைச் சொன்னார் அனிதா!

''ரெண்டு பேரும் வேற வேற ஜாதி. கல்யாணத்துக்கு அப்புறம் அனிதா வீட்டுக்காரங்க எங்கிட்ட, 'இந்தாப்பா... எங்க கிராமத்துக் காரங்க உங்களை ஏத்துக்க மாட்டாங்க. நீங்க எங்க வீட்டுக்கு வர முடியாது, வரவும் வேண்டியதில்ல. நல்லாயிருந்தா சரி!’னு சொல்லிட்டுப் போயிட்டாங்க. ஒரு நாள் அவங்களே தேடி வந்து எங்களை ஏத்துக்குற மாதிரி நாங்க வாழ்ந்து காட்டுவோம்!''

அனிதாவின் கைகோத்துச் சொல்கிறார் மாதேஷ்!

வாழ்வின் உத்வேகம் காதல்தானே!

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
``கேட்டுக் கேட்டு காதே செத்துப் போச்சு!''
காதல் என்பது...
Advertisement
Advertisement

அதிகம் படித்தவை

Advertisement

எடிட்டர் சாய்ஸ்

Advertisement
[X] Close