Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

இது கதிர்வேலன் காதல் - சினிமா விமர்சனம்

ஞ்சநேய பக்தர் அலேக்காக காதலில் விழுந்து, பிரச்னைகளில் இருந்து மீண்டெழுவதே... 'இது கதிர்வேலன் காதல்’!

அக்காவின் காதல் திருமணப் பஞ்சாயத்தைத் தீர்க்க மதுரையில் இருந்து கோவை (மாமா வீட்டுக்கு) செல்லும் உதயநிதிக்கு எதிர் வீட்டு அழகி நயன்தாராவைக் கண்டதும் காதல். ஆனால், நயன்தாரா குடும்பத்துக்கும் மாமாவுக்கும் 'பார்டர்’ பகை. உதயநிதி அப்பாவுக்கு 'காதல்’ என்றாலே கொள்ளை கோபம். நயன்தாராவுக்கோ தன் நண்பன் சுந்தர் மீது ஒரு மையல் பிரேமம். இப்படி ஏகப்பட்ட டோல் கேட்களைத் தாண்டி 'கதிர்வேலனின் காதல்’ ஜெயிக்கிறதா என்பதே... கதை!

உதய்-சந்தானம் காமெடி, காதலி சேஸிங், டீஸிங், வெளிநாட்டுப் பாடல்கள், குடும்ப சென்ட்டிமென்ட்கள் என 'ஒரு கல் ஒரு கண்ணாடி’யின் ஜெராக்ஸாகவே கதிர்வேலனைக் காதலிக்கவைத்திருக்கிறார் இயக்குநர்

எஸ்.ஆர்.பிரபாகரன். துளி கிளாமர் இல்லாமல், வெட்டு-குத்து, வம்பு-தும்பு இல்லாமல், குடும்ப உறவுகளின் ஈகோ யுத்தத்தை, அதன் சிம்பிள் தீர்வுகளைச் சொல்லியிருப்பது நல்ல விஷயமே. ஆனால், அதை சீரியஸ் சீரியல்தொனியில் சொல்லி இருப்பதுதான்..!? அதிலும் மகனைத் தலை முழுக, அப்பா தண்ணீரைத் தலையில் கவிழ்த்துக்கொள்வதெல்லாம்... அப்பப்பா!

முந்தைய படத்துக்கு இதில் உதயநிதி 'டபுள் ஓ.கே.’ பெர்ஃபார்மன்ஸ் கொடுக்கிறார். நயன்தாராவுக்காக உருகும்போதும், அப்பா தன்னை 'தலை முழுகிவிட்டார்’ என்று மருகும்போதும் தேர்ந்த வித்தியாசங்கள். சிரிக்கும்போது, முறைக்கும்போது, அழும்போது... எப்போதும் அழகாக இருக்கிறார் நயன். ஆனால், ஃப்ரேமுக்கு ஃப்ரேம் அழகாக வந்து போவதைத் தவிர, வேறு எந்த வேலையும் இல்லை. அட, ஒரு பளிச் வசனம்கூட நயனுக்கு இல்லையே!

'என் காதலுக்கு நல்லது - கெட்டது எது நடந்தாலும் நீயும் கூடவே இருக்கணும்!’ என்று படத்தில் சந்தானத்திடம் அடிக்கடி சொல்கிறார் உதயநிதி. அது ரீலுக்கு மட்டுமல்ல, ரியலுக்கும் பொருந்தும். டூயட்களைத் தவிர அனைத்துக் காட்சிகளிலும் உதயநிதியுடனே இருக்கிறார் சந்தானம்!

'இப்போ எதுக்கு, பாக்யராஜ் சண்டை போடப் போறப்போ செயின், வாட்ச்லாம் கழட்டிவைக்கிற மாதிரி நீ பண்ற?’, 'அப்புறம் சட்னி, சாம்பார்லாம் எப்படிக் கேப்பீங்க?’, 'அப்பா... நீங்க ஒரு நல்ல அப்பா’ என்று டபுள் மீனிங், அடல்ட்ஸ் ஒன்லி காமெடி இல்லாமல் நச்நச்சென விழுகின்றன சந்தானத்தின் பன்ச்கள்!

சரண்யா, ஜெயப்பிரகாஷ், நரேன், முருகதாஸ் என டீசன்ட் நடிகர்களுக்கு எந்த ஸ்கோப்பும் அளிக்கவில்லை திரைக்கதை!

உதயநிதி காதலுக்கு மிரட்டல் வில்லனாக இருக்க வேண்டிய சுந்தர் கேரக்டரை டம்மி ஆக்கிவிட்டு, அப்பா, மாமா கேரக்டரை சீரியல் வில்லன் ஆக்கியதெல்லாம்  காலங்காலமாக தமிழ் சினிமா காதல் கண்ட எதிர்ப்புகள்தானே!

காதல், காமெடி, சென்டிமென்ட் மசாலா பேக்கேஜில் மிக்ஸிங் சறுக்கியதில், இது கதிர்வேலனுக்கு மட்டுமே காதல்!

- விகடன் விமர்சனக் குழு

MUST READ

எடிட்டர் சாய்ஸ்

[X] Close