Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

பீப் பாடலுக்காக சிம்புவுக்கு சம்மன். காவல்நிலையத்தில் ஆஜராவாரா?

பீப் பாடல் விவகாரம் தொடர்பாக, வரும் 19 ம் தேதி கோவை காவல் நிலையத்தில் நேரில் ஆஜராகி விளக்கம் அளிக்க நடிகர் சிம்புவுக்கு கோவை போலீசார் சம்மன் அனுப்பியுள்ளனர். சிம்பு இல்லாததால் அவரின் தந்தை டி.ராஜேந்தரிடம் சம்மன் வழங்கப்பட்டுள்ளது. இசையமைப்பாளர் அனிருத் இசையில், நடிகர் சிம்பு எழுதி, பாடியதாகச் சொல்லப்படும் ஆபாச வரிகளைக் கொண்ட பாடல் ஒன்று, இணையத்தில் வேகமாக பரவி வருகிறது. இந்தப் பாடலுக்கு பல்வேறு தரப்பினரும் கடும் எதிர்ப்பு தெரிவித்து வருகின்றனர். மேலும் கோவை,தூத்துக்குடி,கோவில்பட்டி உள்ளிட்ட இடங்களில் மாதர் சங்கத்தினர் போரட்டங்களும் நடத்தினர்.

இந்நிலையில் நடிகர் சிம்பு, அனிருத் மீது வழக்குப்பதிவு செய்து நடவடிக்கை எடுக்க வேண்டும் என கோவை மாநகர காவல் ஆணையரிடம் அனைத்திந்திய ஜனநாயக மாதர் சங்கத்தினர் புகார் கொடுக்க, உடனடியாக வழக்குப்பதிவு செய்து விசாரிக்க உத்தரவிட்டார் காவல் ஆணையர் அமல்ராஜ். இதையடுத்து சிம்பு, அனிருத் மீது 3 பிரிவுகளில் வழக்குப்பதிவு செய்யப்பட்டது. இந்நிலையில், இந்த வழக்கு குறித்து நேரில் ஆஜராகி விளக்கமளிக்க வேண்டும் என நடிகர் சிம்புவுக்கு கோவை போலீசார் சம்மன் அனுப்பி உள்ளனர்.

வரும் 19-ம் தேதி காலை கோவை ரேஸ் கோர்ஸ் காவல் நிலையத்தில் ஆஜராகி விளக்கமளித்திட வேண்டும் என அந்த சம்மனில் தெரிவிக்கப்பட்டுள்ளது. சம்மனை விநியோகிக்க கோவை போலீசார், சென்னையில் உள்ள சிம்புவின் வீட்டுக்கு இன்று காலை சென்றனர். சிம்பு வீட்டில் இல்லாததையடுத்து, அவரது தந்தை டி.ராஜேந்தரிடம் சம்மனை போலீசார் அளித்தனர். அதன்படி வரும் 19-ம் தேதி சிம்பு நேரில் ஆஜராகி விளக்கமளிப்பார் என எதிர்பார்க்கப்படுகிறது.

இது தொடர்பாக மாநகர காவல் ஆணையர் அமல்ராஜ் கூறுகையில், "பெண்களை இழிவுபடுத்தும் வகையில் ஆபாச பாடலை இணையத்தில் வெளியிட்டது தொடர்பான விசாரணையை தொடங்கியுள்ளோம். இது தொடர்பாக சிம்புவிடம் விசாரிக்க வரும் 19-ம் தேதி அவரை நேரில் ஆஜராக கோரி சம்மன் அனுப்பியுள்ளோம். விசாரணைக்கு பின்னர் அடுத்த கட்ட நடவடிக்கை எடுக்கப்படும்" என்றார். தமிழகம் முழுவதும் பல்வேறு காவல் நிலையங்களில் சிம்பு, அனிருத் மீது நடவடிக்கை கோரி புகார்கள் வழங்கப்பட்டு வருவது குறிப்பிடத்தக்கது.

-ச.ஜெ.ரவி-

MUST READ

எடிட்டர் சாய்ஸ்

[X] Close