Vikatan.com

www.vikatan.com would like to send you push notifications.

Notifications can be turned off anytime from browser settings.

உதயநிதிக்குக் கிடைத்த எதிர்பாரா வெற்றி

உதயநிதி ஸ்டாலின் தயாரித்து நடித்துள்ள 'கெத்து' திரைப்படம் பொங்கலன்று வெளியானது. உதயநிதி தயாரிக்கும் படங்கள் மற்றும் அவர் வாங்கி வெளியிடும் படங்களுக்கு அரசு வரிச்சலுகை வழங்குவதில்லை.  இந்த படத்துக்கும் 'கெத்து' என்பது தமிழ்ச் சொல் இல்லை என்று கூறி வரிச்சலுகை வழங்க மறுத்து தமிழக அரசு கடந்த ஜனவரி 14–ந்தேதி உத்தரவிட்டது.

இந்த உத்தரவை எதிர்த்து உதயநிதி வழக்கு தொடர்ந்தார். முதலில் நீதிபதி மகாதேவன் முன்பு விசாரணைக்கு வந்தது. அப்போது 'கெத்து' என்பது தமிழ்ச் சொல்தான். திருப்புகழில் 'கெத்து' என்ற வார்த்தை வருகிறது என்று நீதிபதி ஆர்.மகாதேவன் கருத்து தெரிவித்தார். பின்னர் இந்த வழக்கு நீதிபதி துரைசாமி முன்பு விசாரணைக்கு வந்தது.

அப்போது தமிழக அரசு தாக்கல் செய்த பதில் மனுவில், 'கெத்து' தமிழ்ச் சொல் அல்ல. அது கன்னட மொழிச் சொல். திருப்புகழிலில் 'கெத்து' என்ற வார்த்தை வருகிறது. இருந்தாலும், திருப்புகழில் 33 பிற மொழிச் சொற்கள் இடம் பெற்றுள்ளன. மேலும், தமிழ் ஆராய்ச்சித் துறை அனுப்பியுள்ள கடிதத்தில், 'கெத்து' தமிழ்ச் சொல் அல்ல. சென்னைப் பல்கலைக்கழகம் வெளியிட்டுள்ள அகராதியில் இந்த வார்த்தையே இல்லை என்று கூறியுள்ளது. எனவே, மனுதாரர் படத்துக்கு வரிச்சலுகை வழங்க மறுத்து அரசாணை பிறப்பிக்கப்பட்டது’ என்று கூறப்பட்டு இருந்தது.

உதயநிதி சார்பில் ஆஜரான  பி.வில்சன், ‘திருநெல்வேலி தென்னிந்திய சைவ சிந்தாந்த நூற்பதிப்புக்கழகம் வெளியிட்டுள்ள அகராதியில் 'கெத்து' என்ற வார்த்தைக்கு தந்திரம் என்று அர்த்தம் கூறியுள்ளது. இதுபோலப் பல அகராதிகளில் இந்த வார்த்தைக்கு அர்த்தம் கூறப்பட்டுள்ளது. அரசு உள்நோக்கத்துடன் வேண்டுமென்றே வரிச்சலுகை வழங்க மறுக்கிறது’ என்று வாதிட்டார்.

இருதரப்பு வாதங்களையும் கேட்டறிந்த நீதிபதி துரைசாமி இன்று காலையில் தீர்ப்பு வழங்கினார். அதில் நீதிபதி கூறியிருப்பதாவது:

'கெத்து' என்ற சொல் தமிழ்தான். பல அகராதிகளில் இந்த வார்த்தைக்கு அர்த்தம் கூறப்பட்டுள்ளது. ஆனால், தமிழ் வளர்ச்சித்துறை அகராதிகளை சரி பார்க்காமல், 'கெத்து' என்பது தமிழ்ச் சொல் அல்ல. அது கன்னட மொழிச் சொல் என்று கூறியுள்ளது. தமிழ் வளர்ச்சித்துறையின் இந்தச் செயல்பாடு வேதனை அளிக்கிறது. மனுதாரர் தன் விண்ணப்பத்தில் ஆங்கிலத்தில் குறிப்பிட்டுள்ளதாகவும், இதன் படி பார்த்தால் கெத்து என்பது தமிழ்ச் சொல் இல்லை என்று அரசு தரப்பில் கூறியுள்ளது.

வரிச்சலுகை கேட்டு மனுதாரர் செய்த விண்ணப்பத்தில், திரைப்படத்தின் பெயரை ஆங்கிலத்திலும், தமிழிலும் குறிப்பிட்டுள்ளார். தமிழில் குறிப்பிட்டுள்ளபடி, அதை தமிழ் வார்த்தை என்று கருதி வரிச்சலுகை வழங்கியிருக்கலாம். ஆனால், அவ்வாறு அரசு செய்யவில்லை. ஆங்கில வார்த்தையின் அடிப்படையில்தான், விண்ணப்பம் பரிசீலிக்கப்பட்டது என்பதை தன்னுடைய அரசாணையில் தமிழக அரசு குறிப்பிடவில்லை. எனவே, ஆங்கிலத்தில் எழுதப்பட்ட வார்த்தைகளின்படி இது தமிழ்ச் சொல் அல்ல என்று கூறுவதை ஏற்க முடியாது.

இதை ஏற்றுக் கொண்டால், தமிழ்நாட்டை ஆங்கிலத்தில் TAMILNADU என்றுதான் எழுதப்படுகிறது. இதன்படி பார்த்தால் ‘டமில்’ என்றுதான் வாசிக்கவேண்டும். எனவே ஒரு காலக்கட்டத்தில், இது தமிழே இல்லை என்று கூடக் கூறி விடுவார்களோ! என்று தோன்றுகிறது. எனவே, இந்த மனுவை ஏற்றுக் கொள்கிறேன். 'கெத்து' என்பது தமிழ் வார்த்தைதான். அதனால், 'கெத்து' படத்துக்கு வரிச்சலுகை வழங்கவேண்டும். இந்த வரிச்சலுகை அந்தப் படம் வெளியான நாள் முதல் வழங்கப்படவேண்டும். வரிச்சலுகை வழங்க மறுத்து பிறப்பித்த அரசாணையை ரத்து செய்கிறேன். இவ்வாறு நீதிபதி தன் உத்தரவில் கூறியுள்ளார்.

இந்த உத்தரவு வந்ததும் அதைத் தன்னுடைய டிவிட்டரில் போட்டு  மகிழ்ச்சியை  வெளிப்படுத்தியிருந்தார் உதயநிதி.

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ

எடிட்டர் சாய்ஸ்

பரப்பன அக்ரஹாரா சிறை முதல் அப்போலோ அறை வரை...! - ஜெயலலிதாவின் இரண்டு வருட டைம்லைன் #2YearsOfBangaloreVerdict
placeholder

தமிழகமே எதிர்பார்த்துக்கொண்டிருந்த வழக்கில், இரண்டு ஆண்டுகளுக்கு முன் இதே நாளில்தான் தீர்ப்பு வந்தது. வருமானத்துக்கு அதிகமாகச் சொத்து சேர்த்ததாகத் தொடரப்பட்ட அந்த வழக்கில், அ.தி.மு.க பொதுச் செயலாளர் ஜெயலலிதாவுக்கு, நான்கு ஆண்டுகள் சிறைத் தண்டனையும், 100 கோடி ரூபாய் அபராதமும் விதித்து, பெங்களூரு சிறப்பு நீதிமன்றம் தீர்ப்பு அளித்தது. தீர்ப்பு வந்து 731 நாட்கள் ஆகிவிட்டன. அந்த வழக்கிலிருந்து அவர் விடுதலையும் செய்யப்பட்டு, அதன்பின் ஒரு பொதுத் தேர்தலில் மீண்டும் வென்று முதல்வராகவும் பொறுப்பேற்றுவிட்டார். எல்லாம் அவருக்கு நன்றாகப் போய்க்கொண்டிருந்தபோது, ஒரு வியாழக்கிழமை இரவு உடல்நிலை சுகவீனம் அடைந்து அப்போலோவில் அனுமதிக்கப்பட்டார்.