Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

இசைக்கு சேவகம் செய்பவன் நீயல்லவா... வித்யாசாகர்!

நீங்கள் 1100 மொபைல் அறிமுகமான காலத்தில் காலர் டியூன் வைத்திருந்தவர் என்றால், நிச்சயம் ஒரு முறையேனும், இவரது பாடல்கள் உங்கள் மொபைலின் காலர் டியூனாக இருந்திருக்கும். மில்லினியம் ஆண்டு தொடக்கத்தில் காதலித்தவர் என்றால், இவரது பாடல்களை வாக் மேனில் பதிவு செய்து ஃபீல் செய்திருப்பீர்கள். கமல், ரஜினி படங்களின் பத்து பாடல்களை பட்டியலிடுங்கள் என்றால், நிச்சயம்  இவர் இசையமைத்த பாடல்கள் அந்த பட்டியலில் இருக்கும்...? ஆம் காலம் தந்த அற்புத கலைஞன் ‘வித்யாசாகர்’. 

சமூகத்தில் ஒருவர் மீது இன்னொருவர் ஆதிக்கம் செலுத்துவது வன்மமானது, அது திரை இசைக்கும் பொருந்தும். திரைப் பாடல்களில், இசை மட்டும் ஆதிக்கம் செலுத்தக் கூடாது, வரிகளும் முக்கியம் என்று நினைத்து சமநிலையை பேணி வரும் மகா கலைஞன் இவர்.

வசூலை வாரிக்குவிக்காத பல படங்கள் இன்னும் நம்மால் நினைக்கப்படுகிறதென்றால், அதற்கு இவரது இசையும் முக்கிய காரணம். தொண்ணூறுகளின் இறுதியில் காதலித்தவர்களுக்கு, ‘நூறாண்டுக்கு ஒரு முறை பூக்கின்ற பூவல்லவா... இந்தப் பூவுக்கு சேவகம் செய்பவன் நானல்லவா...’, என்ற பாடல் தேசிய கீதமாகவே இருந்தது.

ராஜாவும், ரஹ்மானும் கோலாச்சுகின்ற தமிழ் சினிமாவில், இசையமைப்பாளர்கள் தங்களது இருப்பை தக்க வைத்துக் கொள்வது மிகக் கடினம். அதுவும், நமக்கு அனைத்தும் அளவுக்கு மீறி கிடைக்கும் இந்த காலக்கட்டத்தில், பாடல்கள் வந்த வேகத்தில், நமது நினைவுகளிலிருந்து மறைந்து விடுகிறது. ஆனால், மில்லினியத்தில் பருவம் அடைந்தவர்கள் இன்றும் ‘காதல் பிசாசே, காதல் பிசாசே...’ பாடலை முணுமுணுத்து கொண்டிருப்பார்கள். மெலடியின் காதலர்கள் என்றால், ‘பொய் சொல்ல கூடாது என் காதலி... பொய் சொன்னாலும்... நீயே என் காதலி...’ என்ற பாடல் தங்கள் விருப்ப பட்டியலில் இருக்கும்.

தஞ்சையில் ஒரு முறை பாடலாசிரியர் யுகபாரதி, வித்யாசாகர் பற்றி , “வித்யாசாகர்... பாடலாசிரியர்களிடமிருந்து பாடல்களை வாங்குவதில் வல்லவர். வரிகளில் சின்ன சமரசம் கூட செய்து கொள்ளமாட்டார். மீரா ஜாஸ்மீனை நினைத்து காதல் பிசாசை எழுதவில்லை... உண்மையில் வித்யாசாகர் சாரை நினைத்துதான்  எழுதினேன்...” என்றார். ஆம் இவருக்கு இசை மட்டுமல்ல... பாடல் வரிகளும் அவ்வளவு முக்கியம்.

வரிகளுக்கு முக்கியம் தந்த அதே வேளையில், அர்த்தம் புரியாத ஒரு பாடலை உலகமே முணுமுணுக்க வைத்தவர் அவர். ஆம். “ரா .. ரா .. சரசுக்கு ரா ரா ..” பாடலைதான் சொல்கிறேன். “ஏ பந்தமோ இதி ஏ பந்தமோ... ஏ ஜென்ம பந்தால சுமகந்தமோ...” என்ற இந்த தெலுங்கு பாடல் வரிகளுக்கான அர்த்தம் நம்மில் பலருக்கு இப்போது தெரியாது. ஆனால், சாகர் செய்த மாயாஜாலத்தால், அந்த பாடல் ஓடும் போதெல்லாம், நம்மையும் அறியாமல் நம் இதழ்கள் முணுமுணுக்கிறது.

கொண்டாட்டமான பாடல்கள் மட்டும் தந்தவர் அல்ல சாகர்.  “யார் யார் சிவம்.... நீ நான் சிவம்...” என்று பாடலை கமல் பாட துவங்கும் போது, நம்மில் பலருக்கு கண்கள் கலங்கி இருக்கும்.

இவர் இசை அமைத்த மொழி படத்தில், “காற்றின் மொழி ஒலியா இசையா...” என்று துவங்கும் ஒரு பாடல் இருக்கும். இசைதான் என்று காலம் கூறியதென்றால், அந்த இசையின் அனைத்து பரிமாணங்களிலும் நீங்கள் நிரம்பி இருப்பீர்கள்.

வாழ்த்துகள் வித்யாசாகர்.

(இன்று இசையமைப்பாளர் வித்யாசாகர் பிறந்த நாள்)

- மு.நியாஸ் அகமது

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ

எடிட்டர் சாய்ஸ்

திருப்பதியிலிருந்து திருமலைக்கு நடந்து செல்பவர்களின் கவனத்துக்கு..! 
[X] Close