Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

சிம்பு எதற்காக மன்னிப்பு கேட்கவேண்டும்? விஷாலிடம் கேட்கிறார் டி.ராஜேந்தர்

 

 நடிகர்சங்கத்திலிருந்து விலகுகிறேன் என்று சிம்பு சொன்னதைத் தொடர்ந்து அவருக்கு ஆதரவாகவும் எதிர்ப்பாகவும் பல கருத்துகள் வந்துகொண்டிருக்கின்றன. சங்கத்திலிருந்து சிம்பு விலகக்கூடாது என்று ராதிகா சொல்லியிருந்தார். அவரைத் தொடர்ந்து அதே கருத்தைச் சொல்லி சிம்புவின் தந்தை டி.ராஜேந்தரும் ஒரு அறிக்கை வெளியிட்டிருக்கிறார். அந்த அறிக்கையில், எனது மகன் சிம்பு தென்னிந்திய திரைப்பட நடிகர் சங்கத்திலிருந்து விலக இருப்பதாக ஒரு தகவல் வெளியானதற்கு பின்னால், நடிகர் சங்கத்தின் செயலாளர் விஷால் அவர்கள் ஒரு அறிக்கை வெளியிட்டு இருந்தார். அதிலே நடிகர் சங்க தலைவர் நாசர், விஷால், கார்த்தி ஆகியோர் என்னைத் தொடர்பு கொண்ட போது நானும், எனது மகனும் இந்த பீப் சாங்க் விஷயத்தை சட்டரீதியாக எதிர் கொள்கிறோம் என்று சொன்னதாக சொல்லியிருந்தார்கள். அது உண்மை தான். நான் சட்டரீதியாக எதிர்கொள்கிறேன் என்று சொன்னேன், சொன்னபடியே இறைவன் அருளால் அத்தனை நீதிமன்றங்களில் ஏறி இறங்கி வழக்குகளையும், வந்த விமர்சனங்கள் அத்தனையும் சந்தித்தோம். இன்னும் வழக்கு நிலுவையில் இருக்கிறது.

இந்நிலையில் என் மகன் பீப் சாங்கை வெளியிடவில்லை.யாரோ திருடி வெளியிட்டு விட்டார்கள் என்பதே உண்மை. அதற்காக தான் வழக்கு மன்றத்திலேயே போராடி கொண்டு இருக்கிறோம். அப்படியிருக்க உண்மை நிலை என்ன என்பதை, உள்நோக்கி ஆராய்ந்து பார்க்காமல் விஷால் அவர்கள், சிம்பு அவர்கள் மன்னிப்பு கேட்க வேண்டும் என்று ஒரு கருத்து சொன்னது என்ன நியாயம்? செய்யாத தப்புக்கு ஏன் மன்னிப்பு கேட்க வேண்டும் என்பதே எங்கள் வாதம். இந்த வருத்தம் எனக்கும் இருந்தது, என் மகனுக்கு இருந்தது. ஒரு சங்கம் என்று இருந்தால், ஒன்று பாதிக்கப்பட்டவருக்கு உதவி செய்ய வேண்டும். இல்லையென்றால் ஒதுங்கிக் கொள்ள வேண்டும். விஷால் அவர்கள் எதிர்காலத்திலாவது என் மகன் விஷயத்தில் நடந்து கொண்டதைப் போல, மற்ற உறுப்பினர்கள் ஒருவேளை யாராவது பாதிக்கப்படும் விஷயத்தில் நடந்து கொள்ளாமல் இருப்பதே நல்லது. என் மகன் சிம்பு நடிகர் சங்கத்திலிருந்து விலகுகிறேன் என்று அறிவித்தவுடன் என்னையும், என் மகனையும் தொடர்பு கொண்டு இந்த முடிவை மறுபரிசீலனை செய்ய வேண்டும் என்று எடுத்துச் சொல்லி, எங்கள் மீது அக்கறை காட்டிய மூத்த நட்சத்திரங்களுக்கும், கலைஞர்களுக்கும், பத்திரிகையாளர்களுக்கும் நலம் விரும்பிகளுக்கும் என் நன்றியை தெரிவித்துக் கொள்கிறேன். இந்த வேளையில் ஒரு மூத்த கலைஞன் என்ற முறையில் ஒரு கருத்தை மட்டும் பதிவு செய்ய விரும்புகிறேன். என் மகன் சிம்பு ஆனாலும் சரி, யாராக இருந்தாலும் சரி தேர்தலில் வெற்றி பெற்ற அணியினரை மட்டும் பார்க்ககூடாது. மிக குறைந்த வாக்கில் வெற்றி வாய்ப்பை இழந்தாலும் கூட, சிம்புவுக்காக வாக்களித்த அத்தனை நல்ல நெஞ்சங்களையும் எண்ணிப் பார்க்க வேண்டும். எல்லாவற்றிற்கும் மேலாக என் மகனுக்காக தாயுள்ளத்தோடு முன்வந்து, நான் மன்னிப்பு கேட்கிறேன் என்று நல்ல மனதுடன் சொன்ன நடிகர் சங்கத் தலைவர் நாசர் அவர்களையும் எண்ணிப் பார்க்க வேண்டும். அப்படி நல்ல இதயம் படைத்த நாசர் அவர்களும் நடிகர் சங்கத்தில் தான் இருக்கிறார்.

கடைசியாக ஒன்று, சிம்புவை பள்ளிக் கூடத்தில் கொண்டு சேர்த்த தந்தையும் நான் தான். இளம் பருவத்திலேயே நடிகர் சங்கத்திலே சென்று நடிகனாக சேர்த்துவிட்ட கலைஞனும் நான் தான். நடிகர் சங்கத்திற்கு நாம் என்ன செய்தோம் என்பதை தான், நாம் எண்ணிப் பார்க்க வேண்டும். நடிகர் சங்கம் நமக்கு என்ன செய்தது என்பதைப் பற்றி நாம் கவலைப்படக் கூடாது. இளம் பருவத்திலிருந்து இந்நாள் வரை நடிகர் சங்கத்திற்காக சிம்பு, நீ ஆடி இருக்கிறாய், பாடி இருக்கிறாய், ஒடி ஒடி உழைத்திருக்கிறாய், இது வரலாறு. நம்முடைய முன்னோர்கள் மறைந்து விட்ட கலைவாணர், எம்ஜி.ஆர், சிவாஜி கணேசன், எஸ்.எஸ்.ஆர், எம்.ஆர்.ராதா போன்ற எண்ணற்ற தென்னிந்திய கலைஞர்கள் கட்டிக் காத்தது நமது தென்னிந்திய நடிகர் சங்கம். அதை விட்டு விலக வேண்டாம், உன் முடிவை மறுபரிசீலனை செய்ய வேண்டும் என்பதே உன் தந்தை என்ற முறையில் என் கருத்து. இதற்கு மேல் உனக்கென்று தனிக் கொள்கை இருக்கலாம், சுயமரியாதை உணர்வு இருக்கலாம். அதை நான் மதிக்கிறேன். ஈழத்தமிழர் பிரச்சனைக்காக மந்திரி பதவிக்கு இணையான மாநில சிறுசேமிப்புத்துறை துணைத்தலைவர் பதவியை ராஜினாமா செய்தவன் நான். ஆனாலும் கடவுள் அருளால் காலம் என்னை பக்குவப்படுத்தியிருக்கிறது. அதனால் தான் ஒன்று சொல்கிறேன். வேகத்தை விட விவேகம் தான் வெல்லும்" என்று அந்த அறிக்கையில் டி.ராஜேந்தர் தெரிவித்திருக்கிறார்.

MUST READ

எடிட்டர் சாய்ஸ்

அப்போலோ டூ எம்.ஜி.ஆர் சமாதி... ஜெயலலிதாவுக்கு அரண் அமைத்த மன்னார்குடி!
[X] Close