Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

சல்வடோர் டாலியும் வடிவேலுவின் புலிகேசி மீசையும் #SalvadorDali

'சர்ரியலிஸம்' என்ற கலை வடிவக் கோட்பாட்டிற்கு தன் தூரிகைகள் மூலம் முலாம் பூசிய, ஸ்பெயின் ஓவியர் சல்வடோர் டாலி (Salvador Dali) பிறந்த தினம் இன்று. ஓவியர் சரி... அதென்ன 'சர்ரியலிஸ' ஓவியர்? சல்வடோர் டாலி-யைத் தெரிந்துகொள்வதற்கு முன் கொஞ்சம் வரலாற்றைப் புரட்டுவோம்.

முதலாம் உலப்போர் நடந்துகொண்டிருந்த காலகட்டத்தில் சுவிட்சர்லாந்தில் தொடங்கப்பட்டது 'டாடா' என்ற இயக்கம். கலை இலக்கியங்கள், வினோத ஆடல் பாடல்கள், துண்டுப் பிரசுரங்கள் வழியாக யுத்தத்திற்கு எதிரான பிரச்சாரத்தை முன்னெடுத்த இந்த இயக்கத்தின் வேறொரு வடிவமாக, ஆன்ட்ரே ப்ரீடன் (André Breton) என்பவரால் ஃபிரான்ஸில் தொடங்கப்பட்டது 'சர்ரியலிஸம்'. 1920-களில் தொடங்கிய இந்தக் கலை வடிவக் கோட்பாடு, 'மனித மனத்தை விடுதலை செய்வதன் மூலம் தனிமனிதனையும், சமூகத்தையும் விடுதலை செய்யலாம்' என்கிறது. எப்படி? கனவுகளோ, கற்பனைகளோ... மனிதனின் ஆழ்மனதில் தோன்றும் எண்ணங்களை கதை, கவிதை ஓவியம் போன்ற கலைகளின் வழியாகப் பிரதிபலிப்பது. உதாரணத்திற்கு, நமக்குத் தோன்றும் கனவுகளை ஓவியமாகத் தீட்டலாம். உலகம் எப்படி இருக்கவேண்டும் என்று உள்ளத்தில் நினைப்பதைக் கவிதை, கதையாகக் கட்டமைக்கலாம். இந்தக் கட்டுரையின் நாயகனான சல்வடோர் டாலி, தனது ஆழ்மனச் சிந்தனைகளை ஓவியங்களாக வடித்து, வரலாற்றில் தன்னை இணைத்துக்கொண்டார். ஆம், சர்ரியலிஸ ஓவியங்களின் ஹீரோ இவர்! 

சல்வடோர் டாலி

மே 11, 1904-ல் பிறந்த சல்வடோர் டொமிங்கோ பிலிப்பே ஜசிண்டோ டொமெனிக்... உச்சரிக்க கொஞ்சமல்ல ரொம்பவே கஷ்டமா இருக்கும். அதனால், சுருக்கமாக  சல்வடோர் டாலி ஆனார். சிறு வயதிலேயே எதையாவது கிறுக்குவதிலும், திரைப்படங்களைப் பார்ப்பதிலும் ஆர்வமாக இருந்த சல்வடோருக்குப் பிடித்ததைச் செய்ய அவரது அம்மா ஃபெலிபா உறுதுணையாக இருந்தார். ஓவியப் பள்ளிக்கு அனுப்பி வைத்தார். டாலியின் தந்தையும், வழக்கறிஞருமான சல்வடோர் டாலி இ குஷி, தாயோடு சேர்ந்து மகனின் ஓவியத் திறமையை உச்சிமுகர்ந்தார். தனது மகன் வரைந்த ஓவியங்களைக் கண்காட்சியாக வைத்து அழகு பார்த்ததில் இருந்தது அவரது பெருமிதம். 

சல்வடோர் டாலியின் மூத்த சகோதரர், இவர் பிறப்பதற்கு முன்பே இறந்துவிட்டார். சல்வடோர் டாலிக்கு ஐந்து வயது ஆகும்போது, அவனது மூத்த சகோதரரின் கல்லறைக்கு அழைத்துச்சென்ற அப்பா, 'உன் அண்ணனுடைய மறுபிறவிதான் நீ' என்று கூறினார். அதைத் தீவிரமாக நம்பத் தொடங்கிய சிறுவன் சல்வடோருக்கு, 'மறுபிறவி' என்ற சிந்தனையின் தாக்கம் பெரிதாக இருந்தது. அந்தச் சிந்தனைகளைத் தான் வரையும் ஓவியங்களில் பிரதிபலிக்கத் தொடங்கினார். 'சகோதரரின் மறுபிறவி நான்' என்ற சிந்தனை பல காலங்களுக்கு  அவரின் மனதில் தங்கி இருந்தது, 1963-ஆம் ஆண்டு 'மறைந்த என் சகோதரன்' என்ற பெயரில் அண்ணனை அவர் ஓவியமாகத் தீட்டியதில் தெரிந்துகொள்ளலாம். 

சால்வதோர் தலி ஓவியங்கள்

சல்வடோரின் ஓவியங்களில் ஆரம்ப காலத்தில் இல்லாத சர்ரியலிஸம், 1930-க்குப் பிறகு தீவிரம் ஆனது. தனக்குள் முளைக்கும் சிந்தனைகளை ஓவியமாகத் தீட்டிப் புகழ் பெற்றார். 'சர்ரியலிஸ' ஓவியமாக இருந்தாலும், சல்வடோர் டாலியின் ஓவியங்களில் இருந்த கவர்ச்சி, அவரது ஓவியங்களைப் பேசுபொருள் ஆக்கியது. இக்காலத்தில் இவர் வரைந்த 'நீங்கா நினைவு (the persistence memory)' என்ற ஓவியம், சர்ரியலிஸ ஓவியங்களுக்கான கிளாஸிக் உதாரணம் எனப் போற்றுகிறார்கள். இந்த ஓவியத்தின் அர்த்தத்தை உள்வாங்கிக்கொண்ட பலரும், இது ஆல்பர்ட் ஐன்ஸ்டீனின் 'சார்பியல் கொள்கை'யை அடிப்படையாகக் கொண்டு வரையப்பட்டது எனப் பேசிக்கொண்டிருக்க, 'அப்படியா? நான் வெயியில் வைத்த பாலாடைக் கட்டியை மனதில் வைத்து வரைந்துவிட்டேனே?' என விளக்கம் கொடுத்தார்.

the persistence memory

கிறித்துவக் கொள்கைகளில் தீவிர நாட்டம் கொண்டிருந்த சல்வடோர் டாலி, 1951-ல் வரைந்த 'Christ of Saint John of the Cross' என்ற இயேசு கிறிஸ்து ஓவியம் உலகப் புகழ் பெற்றது. ஆணிகள் அறையப்படாமல், ரத்தம் சிந்தாமல், முள் கிரீடம் இல்லாமல் சிலுவையில் தொங்கும் இந்த இயேசு ஓவியத்தை, கனவில் கண்ட இயேசுவின் உருவத்தை அடிப்படையாக வைத்து வரைந்ததாகக் கூறினார் டாலி. தவிர, 1955-ல் ஒன்பது மாத உழைப்பிற்குப் பிறகு இவர் வரைந்த ''The Sacrament of the Last Supper' என்ற இயேசு கிறிஸ்துவின் ஓவியம், வாஷிங்டன் தேசியக் கலைக்கூடத்தில் இருக்கும் முதன்மையான ஓவியங்களில் ஒன்றாக அலங்கரித்துக்கொண்டிருக்கிறது.

Christ of Saint John of the Cross

'நவீன மனநல மருத்துவத்தின் தந்தை' எனப் போற்றப்படும் சிக்மண்ட் ஃபிராய்டின் கொள்கைகளை உள்வாங்கி, தனது ஓவியங்களில் பிரதிபலித்திருக்கிறார் சல்வடோர். ஓவியங்கள் மட்டுமல்லாது, சிற்பம், திரைப்படக் கலை, புகைப்படக் கலைகளிலும் ஆர்வமாக இயங்கினார். அவற்றிலும் சர்ரியலிஸமே முதன்மையாக இருந்தது. தொலைபேசியின் பேசும் பகுதியில் பெரிய இறால் மீன் வடிவத்தை இணைத்தது, உதடு வடிவத்தில் வடிவமைக்கப்பட்ட ஷோஃபா... இவை இரண்டும் சல்வடோர் டாலியின் 'பெஸ்ட்' லிஸ்டில் இருக்கும் வடிவமைப்புகளில் முக்கியமானவை. 

1929-ல் வெளியான 'Un Chien Andalou' என்ற ஒரு குறும்படத்தில், சவரக் கத்தி ஒன்றைக் கூர்தீட்டி, பெண் ஒருத்தியின் கருவிழியைக் கிழிப்பார்கள். அந்தக் காட்சி நிலவு இரண்டாகக் கிழிந்து தொங்குவதொடு தொடர்பு படுத்தப்பட்டு காட்சிப்படுத்தப்பட்டிருக்கும். இப்படி ஒரு சர்ரியலிஸக் காட்சியை  'சர்ரியலிஸ சினிமாவின் பிதாமகன்' எனக் கொண்டாடப்படும் லூயி என்பவருடன் இணைந்து, சல்வடோர் டாலிதான் உருவாக்கினார். இந்தக் காட்சி, இன்று உருவாகும் பரிசோதனை முயற்சியான படங்களுக்குக் கொஞ்சமும் சளைத்தது அல்ல. தவிர, சினிமா பிதாமகன்களில் ஒருவரான ஹிட்ச் காக்கின் 'ஸ்பெல் பவுண்ட்' படத்தின் கனவுக் காட்சிகளும், சல்வடோரால் வடிவமைக்கப்பட்டவையே. 

Un Chien Andalou

சர்ரியலிஸக் கலைஞர்களில் முதன்மையானவரும், அதைப் பலருக்கும் கொண்டுசேர்த்தவர்களில் முக்கியமானவருமான சல்வடோர் டாலி, தனது மீசையை அலங்கரித்துக்கொண்ட விதம் ரகளையான ரசனை. ஆம், மேல்நோக்கிச் செங்குத்தாக நிற்கும் இவரது மீசையை அடிப்படையாகக் கொண்டுதான், 'இம்சை அரசன் 23-ஆம் புலிகேசி' படத்தில் வடிவேலுவின் மீசை வடிவமைக்கப்பட்டது. ஓவியங்கள், சினிமா, சிற்பம்... எனப் பல வடிவங்களிலும் ஆழ்மன சிந்தனைகளை கலையாகக் கொடுத்த சல்வடோர் டாலி, சர்ரியலிஸக் கலையின் சின்னம்!

Advertisement
Advertisement
Advertisement
Advertisement
Advertisement

MUST READ

Advertisement

எடிட்டர் சாய்ஸ்

வெறும் ஆறே ரன்கள்.. போட்டியில் தோல்வி! ஆனாலும் அனைவரின் மனதையும் நெகிழவைத்த அந்த கிரிக்கெட் மேட்ச்! #MustRead #MondayMotivation
[X] Close