Vikatan.com

www.vikatan.com would like to send you push notifications.

Notifications can be turned off anytime from browser settings.

சேலை, வேட்டி, சுடிதார் டோர் டெலிவரி: இது ஆர்கேநகர் ஸ்டைல்!

சென்னை ஆர்.கே. நகர் அ.தி.மு.க தொண்டர்களின் கூடாராமாக மாறி இருக்கிறது. தொகுதியில் எந்த தெருக்களிலும், ஏன் சந்துக்களிலும் அ.தி.மு.க கரை வேட்டிகள் கூடி நிற்கிறார்கள்.

ஒவ்வொரு வீடுகளுக்கு முன்பும் நாற்காலியில் அமர்ந்து அ.தி.மு.கவினர் திண்ணை பிரச்சாரம் செய்கிறார்கள். நான்கு, ஐந்து தெருக்களுக்கு ஒரு அமைச்சர் என்ற விகிதத்தில் தேர்தல் பொறுப்புகள் கொடுக்கப்பட்டுள்ளன.
 

தமிழகத்தில் உள்ள எல்லா மாவட்டங்களிலிருந்தும் நிர்வாகிகள், தொண்டர்கள் ஆர்.கே. நகரில் குழுமி இருக்கிறார்கள். இவர்களை கடந்துதான் கம்யூனிஸ்ட் வேட்பாளர் சி.மகேந்திரன் தொடங்கி, டிராபிக் ராமசாமி உள்ளிட்ட இதர வேட்பாளர்கள் பிரசாரத்துக்கு செல்லும் சூழ்நிலை தொகுதியில் நிலவுகிறது. இதன்காரணமாக தொகுதியில் அ.தி.மு.க தொண்டர்களுக்கும், மற்ற கட்சி தொண்டர்களுக்கும் இடையே வாய்தகராறு சர்வசாதாரணமாக நடக்கிறது. இதில் ஆளுங்கட்சியினருக்கு ஆதரவாகவே காவல்துறையினரும், தேர்தல் கமிஷனும் செயல்படுவதாக குற்றம் சாட்டப்படுகிறது.

தொகுதி முழுவதும் ரவுண்டு அடித்ததில் அப்பட்டமாக தேர்தல் விதிமீறல்கள் தென்படுகின்றன. அந்தப்பகுதியை கடந்து, 'தேர்தல் அவசரம்' என்ற ஜீப்களில் அதிகாரிகள் வேகமாக எங்கே செல்கிறார்கள்..? எதற்காக இந்த அவசரம்? என்று மட்டும் தெரியவில்லை. பாதாள சாக்கடையிலிருந்து கிடப்பில் போடப்பட்ட அனைத்து பணிகளும் ஜரூராக நடந்து வருகின்றன.
 

ஒவ்வொரு வீடாக செல்லும் அ.தி.மு.கவினர், முதலில் கேட்கும் கேள்வி, 'உங்களுக்கு என்ன குறை?' அந்த வீட்டில் என்பதுதான். தெருவில் உள்ளவர்கள் சொல்லும் குறைகளுக்கு அடுத்த அரைமணி நேரத்தில் தீர்வு காண அரசு இயந்திரம் முடுக்கிவிடப்படுகிறது. தேர்தல் அறிவிக்கப்படுவதற்கு முன்பு வரை இந்த தொகுதியில் பிரதான பிரச்னை குடிநீர். குடிநீர் லாரிகளுக்காக மக்கள் காத்திருந்த காலம் இப்போது மாறி, மக்களுக்காக குடிநீர் லாரிகள் காத்துக்கிடக்கின்றன.

கழிவறை தேங்கி நிற்பதாக ஒரு தகவல் சொன்னால்போதும் அடுத்த சில நிமிடங்களில் அதை அகற்ற வாகனங்கள் வந்து நிற்கின்றன. தொகுதியில் 500 ரூபாய், ஆயிரம் ரூபாய் புத்தம் புதிய நோட்டுக்கள் சர்வசாதாரணமாக புரளுகின்றன. 500 ரூபாய் நோட்டு கொடுத்து டீ குடிக்கின்றனர் ஆளுங்கட்சியினர்.

ஜவுளி நகரமான வண்ணாரப்பேட்டையில் உள்ள கடைகளில் வியாபாரம் படு ஜரூராக நடக்கிறதாம். இங்கு சேலை, வேட்டி, சுடிதார் மற்றும் துணிகளாக மொத்தமாக ஆர்டர் கொடுக்கிறார்களாம் ஆளுங்கட்சியினர். அந்த கடையிலிருந்தே குறிப்பிட்ட தெருவுக்கு டோர் டெலிவரி செய்யப்படுகிறதாம்.
 

ஒவ்வொரு வீடு, வீடாக ஓட்டு கேட்க செல்லும் ஆளுங்கட்சியினர், வீட்டில் உள்ளவர்களின் விவரங்களை குறிப்பெடுத்து கொள்ள மறப்பதில்லை. அந்த விவரங்கள்தான் இந்த டோர் டெலிவரிக்கு பயன்படுகிறதாம். அடுத்து தொகுதியில் உள்ள ஆளுங்கட்சி முக்கிய நிர்வாகிகள் கையில், அந்த தொகுதி வாக்காளர்களின் பட்டியல் இருக்கிறது. அதில் எத்தனைபேர் ஆளுங்கட்சிக்கு ஓட்டுப்போடுவார்கள், நடுநிலையாளர்கள் எத்தனை பேர், இதர கட்சியை சேர்ந்தவர்கள் யார்? தொகுதியை விட்டு வெளியில் குடியிருப்பவர்கள் யார்? உள்ளிட்ட அனைத்து விவரங்களையும் லேப்டாப்பில் சேகரித்து வைத்திருக்கிறார்கள் ஆளுங்கட்சியினர். லேப்டாப் இல்லாதவர்கள் கையில் பிரிண்ட்அவுட் இருக்கிறது. அதன்அடிப்படையில் தேர்தல் கவனிப்புகளுக்கு ஏற்பாடு செய்யப்பட்டுள்ளதாம்.

ஆளுங்கட்சியின் நட்சத்திர பேச்சாளர்கள், நடிகைகள், நடிகர்களின் பிரசாரம் படுகேவலமாக இருக்கிறதாம். அதில் அதிகளவில் கலாய்க்கப்படுகிறார் டிராபிக் ராமசாமி. '92 வயது கிழவனையே படுக்க வைத்துவிட்டோம். 87 வயதாகும் உன்னை என்ன செய்யப்போகிறோம் என்பதை பொறுத்திருந்து பாரு'. அடுத்து, 'குடிகார விஜயகாந்த்தே... முதலில் நிதானமாக நின்று மைக்கைப்பிடித்து பேசு. வசனம் போல வெட்டி வீரம் பேசும் வைகோவே, 5 மாவட்டங்களில் செல்வாக்கு வைத்திருக்கும் ராமதாசே... உனக்கு தமிழகத்தை ஆள ஆசை எதற்கு. உன்னுடைய மகன் மீதே ஊழல் குற்றச்சாட்டு இருக்கும் போது ஊழலைப்பத்தி பேச உனக்கு என்ன அருகதை இருக்கு...?' என்பதே நட்சத்திர பேச்சாளர்களின் பேச்சாக இருக்கிறதாம்.
 

கம்யூனிஸ்ட் கட்சியின் வேட்பாளர் சி.மகேந்திரன் பிரச்சாரத்தின் போது 4 பக்க நோட்டீஸையும் எடுத்து செல்கிறார். அதில் அந்த தொகுதியில் உள்ள பிரச்னைகளை புட்டு புட்டாக வைத்து போட்டியிடும் ஜெயலலிதாவுக்கும் சில கேள்விகளை முன்வைத்து இருக்கிறார்.

சமூக வலைத்தளம் வழியாகவும் கம்யூனிஸ்ட்கள் ஓட்டு சேகரிப்பில் ஈடுபட்டு இருக்கிறார்கள். முகநூலில், 'ஜெயாவுக்கு வேட்டு கம்யூனிஸ்ட்டுக்கு ஓட்டு', 'ஆர்.கே. நகர் தேர்தல்- சிஎம் VS சிஎம்' என்று அக்கவுண்ட் தொடங்கி, அதில் தொகுதியில் உள்ள பிரச்னைகளை அலசி ஆராய்ந்து புகைப்படத்துடன் வெளியிட்டு இருக்கிறார்கள். இதற்கு கமென்ட்ஸ்களும் பொது மக்கள் தரப்பில் அள்ளி குவிக்கப்படுகிறது.

"ஈழத்தில் சிங்கள ராணுவத்தின் பிடியில் மக்கள் இருந்ததைப் போல ஆர்.கே. நகர் தொகுதி மக்கள் கரைவேட்டி, வெள்ளை சட்டை அணிந்த ஆளுங்கட்சியினரின் பிடியில் இருக்கிறார்கள்" என்கிறார் தோழர் ஒருவர்.

-எஸ்.மகேஷ்

படங்கள்: வீ.நாகமணி

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ