Vikatan.com

www.vikatan.com would like to send you push notifications.

Notifications can be turned off anytime from browser settings.

'உளவு'ப்பிடியில் மடங்கிய லீடர்! - (இன்டலிஜென்ஸ் அரசியல்: மினி தொடர்- 1)

ரசியலில் எதுவும் நடக்கலாம் என்பதை விட போலீஸ் நினைத்தால்தான் அதுவும் நடக்கும் என்பதே நடைமுறை சொல்லும் நிஜம்.  அவர்தான் டம்மியாக ஊர்க்காவல் படையில் இருக்கிறாரே அது ஊறுகாய் போன்ற இடம்தானே... ஏதோ லா அண்ட் ஆர்டரில் நல்ல போஸ்ட்டில் இருந்தால் கூட பரவாயில்லை என்று எந்த ஐபிஎஸ் -ஐயும் ஒதுக்கி வைத்துப் பார்க்க  முடியாது. எல்லாமே ஏதோ ஒரு காரண-காரியம் குறித்தவைதான் என்பதே, ஸ்மெல் பணிகள் குறித்த இந்த தேடல்  பயணத்தில் நான் அறிந்து கொண்டது.
 
விலைவாசி உயர்வு, வேலை இல்லை, சட்டம்- ஒழுங்கு சரியில்லை, பணப் புழக்கம் இல்லை...  இப்படி பல இல்லைகள் குறித்த கவலைகள் மக்களில் ஒரு சாராரிடமும், அதான் எல்லாம் இருக்கிறதே என்ற  திருப்தியான பதில் இன்னொரு சாராரிடமும் மாறுபட்ட  இருவேறு கருத்தாக வெளிப்படுவதை காணமுடிகிறது.

யார், யாருடன் கூட்டணி வைப்பார்கள், யாருக்கு எங்கே வெற்றி வாய்ப்பு, யாருக்கு கட்சியில் சீட் கிடைக்கும், கூட்டணிக்கு எந்தத் தொகுதி கை விட்டுப் போகும், கூட்டணி மந்திரி சபையா, தனித்தே ஆட்சியமைப்பா... இப்படி ஆயிரம் கேள்விகள். அடிமட்டத் தொண்டன் முதல் கட்சிக்கு தொடர்பே இல்லாத மக்கள் வரை இந்த கேள்விகள் கடந்த பத்து நாட்களாக ஹார்ட் பீட்டை எகிற வைக்கிறது.

நேரடியாக இதில் ஆதாயம் அடைய வாய்ப்பில்லாத மக்களுக்கே இப்படி என்றால், ஆட்சி அதிகாரம் என்கிற ராஜகிரீடத்தை இத்தனை ஆண்டுகாலம் மாற்றி, மாற்றி அனுபவித்தவர்களுக்கும், ஒருமுறையாவது அந்த  'அதிகாரத்தை' ருசித்து விட வேண்டும் என்ற எண்ணத்தில் இருப்பவர்களுக்கும் தேர்தல் என்பது லேசுப்பட்ட விஷயமல்ல.  

ஒரு பேஷண்டை பிழைக்க வைக்கவே தேர்ந்த மருத்துவர்குழு தேவைப்படுகிற போது, இப்படி கட்சியைப் பிழைக்க வைக்கவும், ஆட்சியைக் கைப்பற்றவும் நடக்கும் ஆபரேசனுக்கு ஒவ்வொரு பார்ட்டியிலும் ஒவ்வொரு பெயரை வைத்திருக்கிறார்கள். அதில்தான் எத்தனை வண்ணங்கள்...

மகாபாரதமே தோற்கும் வியூகங்கள்

ராமாயணத்திலும், மகாபாரதத்திலும் இன்னபிற காவியங்களிலும் வெளிப்படுகிற அரசியல் தன்மைகளை,  நிகழ்கால அரசியல் ஆபரேசனோடு ஒப்பிடுகையில்,  அந்த 'காவியங்கள்' கடுகளவே என்பது தெரிந்து விடும். அதில் சில காட்சிகள்தான் இங்கே....

காட்சி-1

சென்னையில் மிக உயரிய காவல் பொறுப்பில் இருக்கிறவர் அந்த அதிகாரி. (முதலில் இவரிடமிருந்தே ஆரம்பிப்போம்)  காவல் உயர் அதிகாரிகள் கூட அவரிடம் மரியாதையும், பயமுமாக நடந்து கொள்வார்கள். அந்த மரியாதைக்கு கொஞ்சமும் குந்தகம் விளைவிக்காதபடி அவரும் அதே மரியாதையை திரும்பக் கொடுக்கிறவர்தான்.

விஷயம் அதுவல்ல,  அனைவரும் மதிக்கும் அவரிடம் மட்டும்தான் குறிப்பிட்ட அந்த தலைவர் பேசுவார்... அவரை பேச வைக்க இவரால் மட்டுமே முடியும்.

 ஆம்... யார் பேசினாலும் முரண்டு பிடிக்கிறவர் என்ற முத்திரையுடன் வலம் வரும்  அந்த 'வடமாவட்ட 'ஃபவர்- லீடர்' , இந்த அதிகாரி  டி.எஸ்.பி.யாக  சர்வீசில் சேர்ந்தபோதே அறிமுகம் ஆனவர். இவருடைய நேர்மை, கண்ணியமான வார்த்தைகளால் ஈர்க்கப்பட்ட அந்த தலைவர்,  இவரிடம் மட்டும் 'ஊசி' யால் குத்தும் வார்த்தைகளை தவிர்த்து வந்தார்.  இன்றுவரை அந்த உறவு நீடிக்கிறது
                                                                                                                                                                                                                                                                               தலைவர்களை மடக்கும் டெக்னிக்:

பெயரளவில் வெறும் சங்கம்,  ஒரு அமைப்பு போல சமுதாயத்தை வழி நடத்திக் கொண்டு இருந்தவர், அதை அரசியல் கட்சியாக மாற்றும்போது இவரிடம்தான் அடுத்த கட்ட நடவடிக்கை, சட்டம்-ஒழுங்கு போன்ற  ஆலோசனைகளை கேட்டு அதன்படியே அந்த சங்கத்தை கட்சியாக கொண்டு போனார் என்கிறார்கள்.

இவர்களின் மதிப்பான இந்த உறவை,  இந்த நெருக்கத்தை ஒவ்வொரு கால கட்டத்திலும் மாறி, மாறி ஆட்சி புரிந்தோர் தங்களுக்கான கூட்டணி முடிவுக்கு பயன்படுத்தி  வந்துள்ளனர்.

அந்த அதிகாரியும் சம்பாதிக்கும் எண்ணத்தை விட்டு விலகி நிற்கிற கேரக்டர் என்பதால், மாவட்டத்தில் அதிகார பதவிகளுக்கு ஆசைப்படாமல் ஏதோ அமைதியாகப் போகிறதே என்று இந்த சீட்டை நாடி வந்து நின்றவர். அதனால்  இது போன்ற டீலிங்குகளை அவர் பேசியே தீரவேண்டிய நிர்ப்பந்தத்துக்கு தள்ளப் பட்டு விட்டார் என்கிறார்கள்.

கூட்டணியைப் பொறுத்தவரை பல வியூகங்களை அரசியல் கட்சிகள் கடைப்பிடிக்கின்றன. குறிப்பிட்ட காவல் அதிகாரியோ, நம்பகமான  சிறு, சிறு அரசியல் கட்சித் தலைவர்களோ,  சில தொழிலதிபர்களோ கூட்டணி குறித்த பேச்சு வார்த்தைகளில் தூதுவராக செயல்பட்டு வியூகம் அமைத்து  வந்துள்ளனர்.
 
இந்த வியூகத்திலும் ஒன் பிளஸ் த்ரீ என்ற பாதுகாப்பான அம்சமே இதுவரையில் கையாளப்பட்டு வந்திருக்கிறது. இவர் இல்லையென்றால் அவரை வைத்து முடிக்கலாம் என்ற ஆல்டர் நேட்டிவ் மூவ் எப்போதுமே கைவசம் "அதிகார" மையங்களை வைத்திருப்போர் கைகளில் இருந்திருக்கிறது.

தூதுவர்கள் மாறுவர்

உதாரணமாக சொல்வதென்றால், கடந்த முறை "கட்சியை உருவாக்க"  காரணமாய் இருந்தவர் பேச்சையே அந்த  ஊசிக்குத்து பேச்சுக்காரர் கேட்காமல் போய்விட்டாராம். ஆகவே அடுத்தகட்டமாக "ஆல்டர்நேட்டிவ்" மூவ் கையிலெடுக்கப் பட்டது. ஆல்டர்நேட்டிவ் டீமைப் பொறுத்தவரை எப்போதுமே வாழ்வா, சாவா என்கிற இறுதியான காலகட்டத்தில்  களத்தில் இறக்கி விடப்படுகிறது.

அப்படி அவர்கள்  கொடுத்த  ஒரு ரூட் தான்,   அந்த ஊசிக் குத்து தலைவரின் குடும்ப திருமணத்துக்கு போவதற்கு முன்பே கூட்டணி உறவுக்குள் போக வேண்டியதாயிற்று என்கிறார்கள். இதை சாதித்தவர் 'இந்த' கால கட்டத்தில் ஒதுக்குப்புறமாக கடலோரத்திலும், முகாமிலும் ஒதுங்கி இருக்க வேண்டிய சூழ்நிலையில் இருக்கிறார். அந்த கதையை பின்னர் பார்ப்போம்.


இந்த தேர்தலிலும் அதே தலைவர், அதே அதிகாரி... சீன் ஒன்றுதான்... ஆனால் அதிகார மையம் வேறு.  அசைன் மென்ட் கைக்கு வந்ததும், எப்போதும் போல இந்த அதிகாரி பல மூவ்களை மேற்கொண்டும் அந்த ஊசிகுத்தல் பேச்சுக்காரர் இறங்கி வரவில்லை. வேறு வழியில்லாமல் விஷயத்தை அவர் மேலே கொண்டு போய் விட்டார். இதையடுத்து அந்த ஆல்டர்நேட்டிவ் ஸ்மெல் டீம் களம் இறங்கியது.

ட்விஸ்ட் : 1

ஊசிகுத்து பேச்சுக்காரரை ஒட்டுமொத்த சமுதாயமும் சேர்ந்து எதிர்ப்பதாக ஒரு சூழல் உருவாக்கப்பட்டது.   ஊசிக்குத்து பேச்சு தலைவரை எதிர்த்து,  சமுதாய தலைவர்கள் ஒட்டுமொத்தமாக திரண்டதாக ஒரு 'காரிய'  பிரஸ் மீட்டுக்கு ( பிப்ரவரி 1, 2016)  மீடியாக்களில் விளம்பரங்கள் கொடுக்கப்பட்டது.
 
ட்விஸ்ட் :2

அதிகபட்சமாக  ஐநூறு  பேர் வரை  இந்த பிரஸ் மீட்டுக்குப் போகலாம் என்பது பொதுவான எதிர்பார்ப்பு. ஆனால்,  ஐம்பதாயிரம் பேர் வரை இந்த பிரஸ் மீட்டுக்கு வரும்படி தலைக்கு இன்ன ரேட் என்ற அடிப்படையில் கூட்டம் திரண்டிருக்கிறது.  "இரண்டு லட்சம் பேருக்கு மேலே வந்திருப்பாங்க போலிருக்கே" என்று உண்மையாக வியப்பது போல "ஸ்மெல் டீமினர்" அதிகமாக கூவிக் கூவி  வியந்து, அந்த வியப்பை ஊடகங்களிலும், யாருக்குப் போய் சேர வேண்டுமோ அவர்களிடமும் சரியாய்க் கொண்டுபோய் சேர்க்க ஆரம்பித்தனர்.
  
“சரியோ, தவறோ ஏற்றுக் கொண்ட கருத்தில், விஷயத்தில் இவர் காட்டும் உறுதியை எனக்கு நிரம்பவே பிடிக்கும்” என்று அந்த தலைவரின் ஊடக திறப்பு விழாவின் போது முரசொலித்து குறிப்பிட்டார், அந்த மூத்தத் தலைவர். அதில் ஒன்றுதான்  இப்போது நடந்து முடிந்த மாநாட்டில், இவரையும், இருக்கிற பெரும்பாலான லீடர்களையும் அந்த ஊசிக்குத்து பேச்சுத் தலைவர் போட்டுத் தாக்கியதும் கூட..

-ந.பா.சேதுராமன்

எடிட்டர் சாய்ஸ்

MUST READ