Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

தண்ணீர் பற்றாக்குறை: நம் குழந்தைகளின் இறப்பிற்காக காத்திருக்கும் பருந்துகள்!

வெயில் காலம் வந்துவிட்டது. இப்போதே பல கிராமங்களில், பல மைல் தூரம் ஒரு குடம் தண்ணீருக்காக நடக்க துவங்கிவிட்டனர். இத்தனை நாள், இது எங்கோ கிராமத்தில் இருக்கும்,  நமக்கு சம்மந்தம் இல்லாத மக்களின் பிரச்னை என்று பேசிவந்தோம். ஆனால், இனி நாம் அப்படி மாற்றான் பிரச்னையாக கருத முடியாது. ஒவ்வொரு வீட்டு வாசலுக்கும் ஆபத்து வந்துவிட்டது. இந்த ஆண்டு பிறக்கும் குழந்தைகள் அதன் பத்து வயதில் தண்ணீருக்காக பிச்சை எடுக்க கூட நேரலாம். ஆம், 2025 -ல் இந்தியாவில் மோசமான தண்ணீர் பற்றாக்குறை ஏற்படக்கூடும்.

அரசே ஒத்துக் கொள்கிறது:

சில ஆண்டுகளுக்கு முன்பு, The world watch என்ற அமைப்பு, “நாம் வாழும் காலத்தில் மிகவும் முக்கியத்துவம் கொடுக்கப்படாத உலகளாவிய சுற்றுச்சூழல் சவால் தண்ணீர் பற்றாக்குறையாக இருக்கலாம்” என்றது. ஆனால், அது நிஜமாகிவிட்டது. அரசின் புள்ளிவிபரங்களே, '2050 ல், இந்தியா ஒரு மோசமான தண்ணீர் பற்றாக்குறையை சந்திக்கும்' என்கிறது. இனியும், தண்ணீருக்காகதான் போர் ஏற்படும் என்று பேசுவதை மற்றொரு அபத்தம் என்று நாம் சுலபமாக கடந்து சென்றுவிட முடியாது.

அண்மையில், பாராளுமன்ற கேள்வி நேரத்தில் பேசிய நீர் வளங்களுக்கான மத்திய இணை அமைச்சர் சன்வார் லால் ஜாட், “ஒரு தனியார் ஆலோசனை நிறுவனம் எடுத்த ஆய்வில், இந்தியா 2025 ல், தனது மக்களுக்கு அளிக்க போதுமான நீர் இன்றி தவிக்கும்" என்கிறது. ஆனால், 1999-ம் ஆண்டு முதல் உள்ள புள்ளி விபரங்களின்படி, அவ்வளவு விரைவில் தண்ணீர் பிரச்னை வராது. ஒரு வேளை, 2050 ல் வரலாம்.” என்றார்.

அவர் சொல்லும் கணக்கையே எடுத்துக் கொண்டால் கூட,  நிச்சயம் அடுத்த தலைமுறை மோசமான தண்ணீர் பிரச்னையை சந்திக்கும். ஆனால், நடந்து கொண்டிருக்கும் அபத்தங்களை ஆய்வு செய்தால் பிரச்னை அவ்வளவு தொலைவில் இல்லை என்று தெரிகிறது.

நாசா எச்சரிக்கிறது:

இது மட்டுமல்லாமல், அண்மையில் நாசா வெளியிட்டுள்ள செயற்கைகோளிலிருந்து எடுக்கப்பட்ட படம், வட மாநில மாநகரங்களான டெல்லி, ஜெய்ப்பூரில் நிலத்தடி நீர் அளவு மோசமாக குறைந்து வருவதை காட்டுகிறது. நாம் உடனடி நடவடிக்கை எடுக்க தவறுவோமாயின், ஏறத்தாழ 11 கோடி மக்கள் இதனால் மோசமாக பாதிக்கப்படுவார்கள் என்று சுட்டி காட்டுகிறது.    

பல்வேறு வடிவங்களில், ஒவ்வொரு ஆண்டும் நமக்கு கிடைக்கும் நீரின் அளவு 1123 பில்லியன் கன மீட்டர். சென்னை மாநகரத்தை ஒரு பெரிய தண்ணீர் தொட்டியாக மாற்றினால், இந்த தண்ணீரை நிரப்பிவிடலாம். இதில் 690 பில்லியன் கன மீட்டர் நீர், மேற்பரப்பு நீர் ஆதாரங்களான, ஏரிகள், ஆறுகள் மூலம் பெறப்படுகிறது. மிச்ச நீரை நாம், நிலத்தடி நீர் மூலமாக பெறுகிறோம். ஆனால், நாம் தொடர்ந்து உறிஞ்சுவதால், நிலத்தடி நீர் படு மோசமாக குறைந்து வருகிறது.

1999 ம் ஆண்டு அரசாங்கத்தால் எடுக்கப்பட்ட கணக்கெடுப்பின்படி,  2025 ல் இந்தியாவின் தண்ணீர் தேவையாக 843 பில்லியன் கன மீட்டர் இருக்கும். இது 2050 ம் ஆண்டு, 1180 ஆக உயரும். ஆனால், அதன் பின்புதான் இந்தியாவில் அதிகமான தொழிற்சாலைகள் துவங்கப்பட்டன, இந்தியாவின் முக்கிய நீராதரமாக இருக்கும் கங்கையும் படு மோசமாக பாழடைந்தது. கங்கை மட்டும் அல்ல, தொழிற்சாலைகள் தனது கழிவுகளை எந்த சுத்திகரிப்பும் செய்யாமல் ஆறுகளில் விடுவதாலும், பெரும் அணைகள் கட்டப்படுவதாலும், இந்தியாவில் உள்ள 275 ஆறுகள் படுமோசமாக மாசடைந்துள்ளன. அதனால், நிச்சயம் தண்ணீர் பற்றாக்குறை அரசு கணித்திருப்பதற்கு முன்பே வரும்.

நிலத்தடி நீர் வற்றுகிறது:

இந்தியா,  தன் 40 சதவீத தண்ணீர் தேவைக்காக, நிலத்தடி நீரை நம்பி இருக்கிறது. அதுவும் குறிப்பாக, டெல்லி, ஹரியானா, பஞ்சாப் மற்றும் ராஜஸ்தான் 100 சதவீதமும், தமிழ்நாடு, குஜராத் மற்றும் கர்நாடகா 70 சதவீதமும் தம் தேவைக்காக நிலத்தடி நீரை நம்பி இருக்கிறது. இதுதான் படுமோசமாக நிலத்தடி நீர் குறைந்து போக காரணமாக இருக்கிறது. முன்பே, தமிழகத்தில் 95 சதவீத கிணறுகள் வற்றிவிட்டன. மிச்சம் இருக்கும் கிணறுகளில் ஆண்டுக்கு 5 அடி வேகத்தில் தண்ணீர் குறைந்து வருகிறது.

உலக சுகாதார அமைப்பின் ஆய்வின்படி, இந்தியாவில் ஏறத்தாழ 10 கோடி மக்கள், 2012 லிருந்தே சுத்தமான தண்ணீர் இல்லாமல் திண்டாடுகிறார்கள்.

பிரச்னைகளுக்கான தீர்வு எளிமையாக இருக்கும்போது, கடவுள் பதிலளிக்கிறார் - இது என்ஸ்டீன் சொல்லியது. ஆனால், நம் பிரச்னைகளை சிக்கல் ஆக்கி விட்டோம். இப்போது கடவுளிடம் தீர்வை கேட்க முடியாது. அதற்கான, தீர்வை நாம்தான் தேட வேண்டும்.

நீர் வெறும், நீரல்ல...:

டெல்லியில் உள்ள ஜாமியா மில்லியா இஸ்லாமியா பல்கலைக்கழக ஆய்வு, டெல்லியில் ஒவ்வொரு வீட்டிலும், மழை நீர் சேகரிப்பு கட்டமைப்பை ஏற்படுத்துவதன் மூதம், அதன் 70 சதவீத நீர் தேவையை பூர்த்தி செய்யலாம் என்கிறது. சர்வதேச அளவில் ஒருவருக்கு பரிந்துரைக்கப்பட்ட 250 லிட்டரை மட்டும் டெல்லி மக்கள் நுகவார்கள் என்றால், 89 சதவீத தேவையை பூர்த்தி செய்யலாம்.

ஆனால் அதிக கேடுகளை விளைப்பது, தொழிற்சாலைகளும் மிகு உற்பத்தியும்தான். இந்தியாவின் 1.5 சதவீத நீர்வளம், மறைநீராக ஏற்றுமதி ஆகிறது. இங்கிருந்து வெளிநாட்டிற்கு ஏற்றுமதி ஆகும் மறை நீரை நாம் நிறுத்தினால், அதாவது அதிக தண்ணீரை உறிஞ்சும் ஆடைகள், வாகனங்கள் ஏற்றுமதிக்கான உற்பத்தியை உடனடியாக நிறுத்தினால் 1.3 கோடி மக்களுக்கான குடிநீர் கிடைக்கும். அதாவது, மொத்த மும்பை மக்களுக்கும் நாம் தங்கு தடை இன்றி குடிநீர் வழங்கலாம்.

இதில் அரசாங்கம் தலையிட்டு சில கட்டுபாடுகளை விதிக்க வேண்டும். அதே வேளை, நம் தேவையில்லாத நுகர்வதையும் குறைக்க வேண்டும். ஒரு செல்ஃபோன் உற்பத்தி செய்ய ஏறத்தாழ 10 ஆயிரம் லிட்டர்களும், ஒரு ஜீன்ஸ் தயாரிக்க 9 ஆயிரம் லிட்டர்களும், கார் உற்பத்தி செய்ய 1 இலட்சம் லிட்டர்களும் தேவைப்படுகிறது. ஆனால், நாம் தேவைக்கு அதிகமாக எவ்வளவு பொருட்களை வாங்கி குவிக்கிறோம்....?நம் தேவையில்லாமல் நுகர்வதை தவிர்ப்பதன் மூலம், நம் குழந்தைகளுக்கு அமைதியான வாழ்வை அளிக்கிறோம்.

தண்ணீர் என்பது வெறும் நீரல்ல...அது நாகரிகம், பண்பாடு சம்பந்தப்பட்டது. ஆம், உலக நாகரீகங்கள் எல்லாம், நீர் நிலை ஓரத்தில் தான் தோன்றியது. நீரை அழிக்கிறோமென்றால், நாம் நாகரீகங்களை அழிக்கிறோம் என்று அர்த்தம். தண்ணீர் இல்லை என்றால், இடபெயர்வுகள் நடக்கும், கலகம் வெடிக்கும்.

உங்களுக்கு கெவின் கார்டர் எடுத்த, புலிட்சர் விருது வென்ற, உலகை உலுக்கிய, குழந்தையின் மரணத்திற்காக காத்திருக்கும் பருந்து புகைப்படம்... நினைவிருக்கிறதா...?  நாம் இந்த தண்ணீர் சிக்கலை தீர்க்காமல் போனால், நாளை நம் குழந்தைகளின் இறப்பிற்காகவும், அந்த பருந்து காத்திருக்கும். அதற்கு முன்னால் விழித்துக் கொள்வோம்.


- மு. நியாஸ் அகமது

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close