Vikatan.com

www.vikatan.com would like to send you push notifications.

Notifications can be turned off anytime from browser settings.

மீண்டும் உயிர்த்தெழுதல் - மாதொருபாகன் தடையும்... தீர்ப்பும்!

 

வர் மீண்டும் உயிர்த்தெழுதலில் நம்பிக்கை இல்லாமல்தான் இருந்தார். ஆனால், அவர்  இன்னும் சில தினங்களில் உயிர்த்தெழுவார். வெக்கையான ஒரு நாளிலோ அல்லது  பெருமழை நாளிலோ அவர் உயிர்த்தெழக்கூடும்.  அவரும், தாம் உயிர்த்தெழப் போகிறேன் என்பதை நம்பத் துவங்கிவிட்டார். அதனால், அவர் நிச்சயம் மீண்டும் உயிர்த்தெழுவார்.

இலக்கியத்தின் மீதும் சுதந்திரத்தின் மீதும் காதல் கொண்ட எவராலும், அந்த தற்கொலை கடிதத்தை  மறந்துவிடமுடியாது.  இல்லை அதை தற்கொலை கடிதம் என்றும் சொல்லிவிட முடியாத, வேண்டுமானால் நீத்தார் செய்தி அறிவிப்பு எனலாம்.  எழுத்தாளர்  பெருமாள் முருகனுக்காக, ஆசிரியர்  பெ. முருகன் வெளியிட்ட அந்த நீத்தார் அறிவிப்பு, இப்படியாகதான் துவங்கியது, “எழுத்தாளன் பெருமாள் முருகன் செத்துவிட்டான். அவன் கடவுள் அல்ல, ஆகவே உயிர்த்தெழப் போவதில்லை. மறுபிறவியில் அவனுக்கு நம்பிக்கையும் இல்லை. இனி அற்ப ஆசிரியனாகிய பெ.முருகன் என்பவன் மட்டுமே உயிர் வாழ்வான்.” என்று தன் ஆன்மா அழிந்ததை அல்லது அழிக்கப்பட்டதை அறிவித்த செய்தி அறிவிப்பு அது.

ஆனால், நீதி ஒரு ஊக்கியாக  அவரை மீண்டும் உயிர்த்தெழ தூண்டி உள்ளது. அவரும் அதன் கரங்களை இறுகப்பற்றி உள்ளார். அதன் ஒளியில் அவர் மீண்டும் உயிர்த்தெழுவார். தன் ஆன்ம இறப்பை அறிவித்த அவர்தான், இதையும் மீண்டும் அறிவித்துள்ளார்,  " எழுத்தாளர் உயிர்த்தெழுந்து மீண்டும் எழுதட்டும்  என்னும் இறுதி வாசகத்தின் ஒளியைப் பற்றிப் பிடித்தெழ முயல்கிறேன். எழுந்துவிடுவேன். ஒன்றுமில்லை, மகிழ்ச்சிப் பரவசம் காரணமாக இன்னும் கொஞ்சம் அவகாசம் கேட்கிறது மனம்.”

 

அவகாசம் எடுத்துக் கொள்ளட்டும். மகிழ்ச்சி பரவசத்தில் கொஞ்சம் திளைத்துக் கொள்ளட்டும். அந்த மகிழ்ச்சியையும், சாவிற்கும் உயிர்தெழுதலுக்குமான கால இடைவெளி தந்த வலியையும், பின் அனுபவத்தையும் மீண்டும் தன் பேனாவில் நிரப்பி, தம் படைத்தல் தொழிலை துவங்கட்டும்.

அவர்  இப்படியாகதான் கொல்லப்பட்டார்:

அது டிசம்பர் 26, 2014.  அன்று உங்கள் ஊரில் எப்படி சூரியன் தன் மெல்லிய ஒளிக்கீற்றை உமிழ்ந்து, ஒரு புதிய விடியலை பிரசவித்ததோ, அதுபோல்தான் திருச்செங்கோட்டிலும் , அந்த விடியல் பிறந்தது. ஆனால் எல்லா விடியலும் எல்லோருக்குமானதாக இருந்துவிடுவதில்லைதானே...? சில விடியல் சிலருக்கு இருளை பரிசளிக்கும். அந்த விடியல் பெருமாள் முருகனுக்கானதாக இல்லை. ஆம் அந்நாளில்தான், 2010 ம் ஆண்டு அவரால் எழுதப்பட்டு, காலச்சுவடு பதிப்பகத்தால் வெளியிடப்பட்ட மாதொருபாகனின் சில பக்கங்கள் நகலெடுக்கப்பட்டு, சில தீவிர வலதுசாரி குழுக்களால் விநியோகிக்கப்பட்டன. அவர்கள் அதை மட்டும் செய்யவில்லை, அத்துடன், 'பெருமாள்முருகன் கொங்கு பகுதி சமூக பெண்களை தம் மாதொருபாகன் நாவலின் மூலம் அசிங்கப்படுத்திவிட்டார்' என்று வன்மம் கக்கும்  துண்டறிக்கைகளையும் சேர்த்தே விநியோகித்தனர்.

அந்த நாவல், குழந்தை இல்லாத ஒரு தம்பதியின் வலியை பேசும் நாவல். பெருமாள் முருகன்  கொங்கு மண்டலத்தை சேர்ந்தவர் என்பதால், அந்தப் பகுதியையே கதையின் களமாக மாற்றி, கதையைச் சொல்லி இருப்பார். சில பண்பாட்டு பழக்கவழக்கங்களையும் புனைந்திருப்பார். இந்தப் பகுதிதான் சர்ச்சைக்கு உள்ளாகியது.

முதலில் இந்த ஆர்ப்பாட்டக்காரர்களை அப்பகுதி மக்கள்  பெரிதாக எடுத்துக் கொள்ளவில்லை. ஆனால், நன்கு திட்டமிடப்பட்டு, பெருமாள்முருகனுக்கு எதிராக வன்ம பிரசாரம் முடுக்கிவிடப்பட்டது. அவருக்கு எதிரான போராட்டம் தீவிரம் அடைந்தது. இந்த கொடுந்தீ அடங்கிவிடும் என்றுதான் முதலில் பெருமாள் முருகனும் நம்பினார். ஆனால், அந்த தீ, எண்ணெய் ஊற்றி சிலரால் வளர்க்கப்படுகிறது என்பதை பின்னர்தான் உணர்ந்தார். பெருமாள்முருகனுக்கு இலக்கிய அமைப்புகள் துணை நின்றன. ஆனால், எளிமையான பெருமாள்முருகன், காலம் முழுவதும் இந்த எதிர்ப்புடன் வாழ விரும்பவில்லை.

ஜனவரி 7, 2015 சர்ச்சைக்குரிய அந்தப் பகுதியை, மாதொருபாகன் நாவலிலிருந்து நீக்கிவிட முன் வந்தார். அப்போது அவர், ”என்னைப் பற்றி தவறான பிம்பத்தை ஏற்படுத்த முயல்கிறார்கள். நான் இப்போது அதை எதிர்கொள்ளும் நிலையில் இல்லை. நான் அப்பகுதியை எனது நாவலில் இருந்து நீக்கிவிடுகிறேன்” என்றார். ஆனாலும் ஆர்ப்பாட்டக்காரர்கள் அமைதி அடையவில்லை. முதலில் அவரது புத்தக பிரதியை எரித்தவர்கள், பின்னர் அவரது உருவப்பொம்மையை எரித்தார்கள். அவருக்கு எதிராக ஜனவரி 9 ம் தேதி, கடையடைப்புக்கு அழைப்பு விடுத்து, அதை வெற்றிகரமாகவும் நிகழ்த்தி காட்டினார்கள். இந்த அழுத்தங்கள் தாங்காமல், பெருமாள்முருகன் திருச்செங்கோடு,  மோகனூர் சாலையில் இருக்கும் அவரது வீட்டிலிருந்து வெளியேறினார். பின்புதான் தெரிந்தது, காவல்துறை வற்புறுத்தலால்தான் அவர் வெளியேறினார் என்று.

ஆர்ப்பாட்டக்காரர்கள், 'பெருமாள்முருகன் மன்னிப்பு கேட்க வேண்டும்' என்றார்கள். ஜனவரி 12 ம் தேதி, மாவட்ட நிர்வாகம், இதற்காக ஒரு சமாதான பேச்சுவார்த்தையை ஒருங்கிணைத்து இருந்தது. அந்த கூட்டத்தில், இது குறித்த ஒரு மன்னிப்பு கடிதம் பெருமாள்முருகனிடம் இருந்து எழுதிவாங்கப்பட்டது. அந்த கூட்டத்தில், பெருமாள் முருகன் தன் தரப்பை விளக்க எந்த வாய்ப்பும் வழங்கப்படவில்லை.

அந்த கூட்டத்திற்கு பெருமாள் முருகனுடன் சென்ற வழக்கறிஞர் தாமோதரன், “அவர்கள் எடுத்த  முன்முடிவிற்கு பெருமாள்முருகன் சம்மதம் தெரிவிக்க வைக்கப்பட்டார். அவரது கருத்தை கேட்க மாவட்ட நிர்வாகம் முன்வரவில்லை.” என்றார்.  இந்தக் கூட்டத்தை ஓய்வு பெற்ற நீதிபதி சந்துரு,  'சட்டத்திற்கு புறம்பான கூட்டம்' என்று வர்ணித்தார். 

இந்த நிகழ்வு பெருமாள்முருகனை பெரிதும் பாதித்தது. அவர் மாதொருபாகன் உட்பட தனது அனைத்து  படைப்புகளையும் திரும்ப பெற்றுக்கொள்வதாக அறிவித்தார். இதற்காக தன் பதிப்பாளர்களுக்கு இழப்பீடும் தந்துவிடுவதாக அறிவித்தார்.

அவர் நாமக்கலில் இருக்க பிடிக்காமல், 'வேறு ஏதாவது ஊருக்கு எங்களுக்கு பணி மாறுதல் வழங்குங்கள்' என்று விண்ணப்பித்து இருந்தார். பின்னர் பிப்ரவரி 13 ல், அவரையும்  அவரது மனைவியையும் சென்னைக்கு மாற்றி உத்தரவிட்டது தமிழக அரசு.

இப்படியாகதான் பெருமாள்முருகன் தன் மண்ணிலிருந்து துரத்தப்பட்டார்.

இதே காலகட்டதில், பெருமாள்முருகன் மீது குற்றவியல் வழக்கு பதியக் கோரி, கொங்கு வேளாள சங்கங்களின் கூட்டமைப்பு, செங்குந்த மகாஜன சங்கம், வேல்முருகன், வெள்ளயங்கிரி ஆகியோர் தனித்தனியாக வழக்கு தொடர்ந்தனர்.

ஏன் இத்தனை எதிர்ப்பு...?:

2013 ம் ஆண்டு, இந்த நாவல் ஆங்கிலத்தில் மொழிப்பெயர்க்கப்பட்டு, “One Part Woman" என்ற தலைப்பில் பென்குயின் பதிப்பகத்தால் ஆங்கிலத்தில் வெளியிடப்பட்டது. ஆங்கிலத்தில் இந்த நாவலை படித்த வெளிநாட்டில் இருக்கும் கொங்கு பகுதியை சேர்ந்தவர்கள், சர்ச்சைக்குரிய நாவலின் பகுதியை தம் சொந்தங்களிடம் பகிர்ந்தார்கள். அதன் பின்தான் கொங்கு பகுதியில் இந்த நாவலுக்கு எதிரானப் போராட்டம் முன்னெடுக்கப்பட்டது. இது ஆர்ப்பாட்டார்காரர்களால் சொல்லப்பட்ட காரணம். ஆனால், உண்மை அதுவல்ல என்கிறார்கள் கொங்கு பகுதியில் இருக்கும் முற்போக்காளர்கள்.

இந்த களேபரேங்கள் நிகழ்ந்து கொண்டிருந்த போது, நம்மிடம் பேசிய சிலர், “பெருமாள்முருகன் எப்போதும் ஒடுக்கப்பட்ட மக்களின் குரலாக இருந்தார், அவர்களுக்காக பேசினார். கல்லூரியில் அவரைச் சுற்றி எப்போதும் ஒடுக்கப்பட்ட  மாணவர்களே இருந்தனர். இதுதான் இவர்களின் ஆர்ப்பாட்டத்திற்கு காரணம்” என்றார்.

ஆம், அது உண்மையும் கூட. பெருமாள் முருகன் உடனான தங்களது அனுபவங்களை அவரின் பத்து மாணவர்கள் பகிர்ந்து இருக்கிறார்கள். அது  ‘எங்கள் ஐயா’ என்ற பெயரில் புத்தகமாக வந்திருக்கிறது. அதை படித்தாலே தெரியும், பெருமாள் முருகன் எவ்வளவு நெகிழ்ச்சியான மனிதர் என்பது.

உயிர்த்தெழ வைத்த தீர்ப்பு:

இவ்வளவு அழுத்தங்கள் தன்னுள் உள்ள படைப்பாளனை, தானேக் கொன்ற பெருமாள்முருனுக்கு, தலைமை நீதிபதி சஞ்சய் கிஷான் கவுல் மற்றும் நீதிபதி புஷ்ப சத்தியநாரயணா ஆகியோர் வழங்கிய  தீர்ப்பு ஒரு நல்ல ஒத்தடம். அந்த தீர்ப்பின் கடைசிப் பத்தியை தமிழாக்கம் செய்து,  இந்த கட்டுரையை முடிக்கிறேன்.

“எழுத்தாளர் பேராசிரியர் பெருமாள்முருகன் பயத்தில் இருக்கக் கூடாது. அவர் எழுத வேண்டும், அவரின் எழுத்துகள் பரந்துபட்ட அடுத்தக் கட்டத்திற்கு செல்ல வேண்டும். அவரது எழுத்துகளின் உள்ளடக்கம், அவற்றை அவர் வெளிப்படுத்தும் தன்மை ஆகியவற்றோடு  முரண்படுபவர்கள் இருந்தாலும்,   அவரது எழுத்துகள் இலக்கியத்திற்கு உன்னத பங்களிப்பாக அமையும். ஒரு எழுத்தாளனாக, தான் இறந்துவிட்டதாக பெருமாள் முருகன் அறிவிப்பது, அவரின் சொந்தமுடிவாக இருக்க முடியாது. அது உருவாக்கப்பட்ட சூழ்நிலையின்  காரணமாக எடுக்கப்பட்ட முடிவு. காலம்தான் நல்ல மருந்து, அது அவரையும், அவருக்கு எதிராக நின்றவர்களையும் உண்மையாக ஆற்றுப்படுத்தியிருக்கும் என நம்புகிறோம். இந்நேரம் இரு தரப்பும்,  முன்னோக்கி பயணிக்கும்  துடிப்பான ஜனநாயகத்தின் குடிமக்களாக  இந்த விஷயத்தை புதைத்து,  தங்கள் வாழ்வுடன் ஒன்றிப்போக பழகி இருப்பார்கள்.

அனைத்து தரப்பையும்  அலசி ஆராய்ந்த எங்கள் தீர்ப்பு, இந்த பிரச்னையை இத்துடன் மரணிக்க செய்துவிடும் என நாங்கள் நம்புகிறோம். காலம்  நாம் மறக்க... மன்னிக்க... கற்றுத் தரும். அதுமட்டுமல்லாமல் சேதங்களுக்கு அப்பாலும் நம்மை பார்க்க வைக்கவும் கற்பிக்கும். நாம், காலம் தன்னுடைய பணியை செய்வதற்கான வெளியைத் தந்தால், அது நம்மை அழகான இடங்களுக்கு  அழைத்துச்செல்லும்.

எழுத்தாளர் எதில் சிறந்தவரோ, அதில் உயிர்த்தெழட்டும்... எழுதட்டும்...!”


ஆம். விரைவில் உயிர்த்தெழுந்து வந்து எழுதட்டும்...!


-மு. நியாஸ் அகமது | ஓவியம் : பிரேம் டாவின்ஸி
 

எடிட்டர் சாய்ஸ்

ஜெயலலிதா வாழ்வின் சில ‘கடைசி’கள்!

MUST READ