Vikatan.com

www.vikatan.com would like to send you push notifications.

Notifications can be turned off anytime from browser settings.

வரலாற்றைத் திரிக்கிறாரா ’லகான்’ இயக்குநர்? -ஹிருத்திக் ரோஷனின் 'மொகஞ்சதாரோ' சர்ச்சை

பிரபல இயக்குநர் அசுதோஷ் கௌரிகரின் இயக்கத்தில், நடிகர் ஹிருத்திக் ரோஷன் நடிப்பில் நாளை வெளியாக இருக்கிறது மொகஞ்சதாரோ. ' சிந்துசமவெளி நாகரிகத்தையே உலகின் முதன்மையான நாகரிகம் என திரித்துப் படம் எடுத்திருக்கிறார் இயக்குநர். படத்தின் டிரைலரில் காட்டப்படும் காட்சிகளில் இருந்தே இதை உணர்ந்து கொள்ள முடிகிறது' எனக் கொந்தளிக்கின்றனர் வரலாற்று ஆசிரியர்கள்.

பாஜிராவ் மஸ்தானியும் மொகஞ்சதாரோவும்...

ஹிருத்திக் ரோஷனின் நடிப்பில் உருவாகி உள்ள மொகஞ்சதாரோ, மிகப் பெரிய எதிர்பார்ப்பை உருவாக்கியிருக்கிறது. யூ டியூப்பில் வெளியிடப்பட்ட இந்தப் படத்தின் டிரைலரை 1.3 கோடி பேர் பார்த்து ரசித்திருக்கின்றனர். லகான், ஜோதா அக்பர் போன்ற புகழ்பெற்ற படங்களை இயக்கிய அசுதோஷ் கௌரிகரின் அடுத்த படைப்பு என்பதால் பாலிவுட் ரசிகர்கள் மொகஞ்சதாரோவுக்காகக் காத்திருக்கின்றனர். இந்தப் படத்திற்காக மிகவும் மெனக்கிட்டிருக்கிறார் நடிகர் ஹிருத்திக் ரோஷன்.

" மொகஞ்சதாரோ திரைப்படத்திற்காக மிகப் பெரிய நட்சத்திரப் பட்டாளங்களை வைத்துக் கொண்டு இயக்கியிருக்கிறார் அசுதோஷ். ஆனால்,  எது உண்மையான வரலாறு என்பதை அறியாமல், இந்துத்துவ கோட்பாட்டாளர்களின் போக்கில் படம் எடுக்கப்பட்டதாகவே டீசர் வாயிலாக அறிகிறோம்" என்கின்றனர் வரலாற்று ஆசிரியர்கள்.

அவர்கள் நம்மிடம், " வரலாற்றுக் கதைகளை மையப்படுத்தி படம் இயக்குவதை நாங்கள் கேள்வி கேட்கவில்லை. உண்மையான வரலாற்றைச் சொல்லாமல் மறைக்கும் வேலையில் ஈடுபடுகின்றனர். சஞ்சய் லீலா பன்சாலியின் 'பாஜிராவ் மஸ்தானி' என்ற படத்தில் சளைக்காத இந்து போர்வீரனாக கதாநாயகன் வடிவமைக்கப்பட்டார். நவீன இந்தியா உருவாகாத நிலையில், முகலாயப் பேரரசு பற்றி சஞ்சய் லீலா பன்சாலியால் திரிக்கப்பட்டது இந்தப் படம். இப்போதும் மொகஞ்சதாரோ படம், பொதுமக்களின் கவனத்தை ஈர்த்திருக்கிறது. படத்தின் டிரைலரில் சிந்து சமவெளி நாகரிகம் குறித்து உண்மைக்கு மாறாக திரிக்கப்பட்டிருக்கிறது.

ஹரப்பா காலத்தில் சமஸ்கிருதமா?

சிந்து வெளி அல்லது ஹரப்பா நாகரிகத்தின் மிகப் பெரும் நகரங்களில் ஒன்றாக மொகஞ்சதாரோ இருந்துள்ளது. உலகின் தொன்மையான நகரம் ஒன்றின் கதை எனச் சொல்லிவிட்டு, இதன் காலத்தை கி.மு 2016 எனத் தெரிவிக்கிறார் அசுதோஷ். இதில் காட்டப்படும் விஷயங்கள் அனைத்தும் தவறானவை. படத்தில் சமஸ்கிருதமயமாக்கப்பட்ட ஹிந்தியை பயன்படுத்தியுள்ளனர். 'இதே போன்ற ஒரு மொழிதான் சிந்துவெளியில் பேசப்பட்டிருக்கும்' என எளிதாக ஒருவர் நம்புவதற்கு வாய்ப்பு உண்டு. இதுபற்றிய அறிவிப்பும் டிரைலரில் காண்பிக்கப்படவில்லை. ஆனால், தொல்லியல் ஆய்வாளர்களோ, 'வெண்கல யுகத்தில் பல மொழி பயன்பாடு இருந்திருக்கலாம் அல்லது மொழியே இல்லாமல் இருந்திருக்கலாம்' என்கிறார்கள். அங்கே சமஸ்கிருதத்தைப் போன்ற ஒரு மொழி பேசப்பட்டதாகவோ எழுதப்பட்டதாகவோ எந்தவித ஆதாரங்களும் இல்லை.

நாயகன் பேசும் இந்தி வசனங்கள் பேசுவது பாலிவுட் திரைப்படங்களுக்கான சுதந்திரம் என்பதாக ஏற்றுக் கொண்டால்கூட, கல்வெட்டுகளில் எழுதப்பட்டதாகக் காட்டப்படும் சமஸ்கிருதம் தோய்ந்த ஹிந்தி எழுத்துகள், ரிக் வேத காலத்துக்கும் ஹரப்பா நாகரிக காலத்துக்கும் முடிச்சுப் போடும் இந்துத்துவ கோட்பாட்டாளர்களின் கருத்துக்கு வலு சேர்க்கவே உதவும். நாயகன் ஹிருத்திக் ரோஷன், நாயகி பூஜா ஹெக்டேவிடம், 'து மெரி சங்ஹானி ஹை' (நீ என்னுடைய இணை) என்கிறார்.  இந்த வசனம், நடைமுறையில் உள்ள மொழிக்கும் எழுத்து மொழிக்கும் மாறி மாறி பயணிக்கிறது. மொழி அரசியல் இந்த விவகாரத்தில் முக்கியமானது. இது திட்டமிடப்பட்ட வேலையாகவே பார்க்க வேண்டியுள்ளது" எனக் கொந்தளித்தவர்கள் , தொடர்ந்து,

" இதைவிட மிக முக்கியமான வரலாற்றுப் பிழை, குதிரை முத்திரை தொடர்பானது.  1999-ம் ஆண்டு, அமெரிக்க வாழ் இந்துத்துவ கோட்பாட்டாளர் என். எஸ். ராஜாராம் மற்றும் தொல்லியல் வரைபட நிபுணர் நட்வர் ஜா ஆகியோர் இணைந்து எழுதிய The Deciphered Indus Script என்ற நூலில், ' ஹரப்பா எழுத்து சமஸ்கிருத குடும்பத்திலிருந்து வந்தது' என்கிறார்கள். அவர்கள் ஹரப்பாவின் தொல்லியலை வேத இலக்கியங்களுடன் தொடர்புபடுத்தி எழுதியுள்ளனர். சிந்து சமவெளி நாகரிகத்துக்கு 2000 ஆண்டுகளுக்குப் பிறகே, ரிக் வேத காலம் வந்திருக்க வேண்டும் என்பதுதான் தொழில்முறை வரலாற்று அறிஞர்களின் ஆய்வாக இதுவரையில் உள்ளது. இந்த இரண்டுக்கும் இயற்கையான உறவு எதுவும் இல்லை என்பதும் அவர்களின் தீர்க்கமான கருத்தாக இருந்தது. ராஜாராமின் கருதுகோள் இந்து வலதுசாரிகளைக் கொண்டாடச் செய்தது. தொழில்முறையிலான வரலாற்று ஆசிரியர்கள் முன்வைத்த, ' ஆரியர்கள் இந்தியப் பூர்வக்குடிகள் அல்ல; அவர்கள் குடியேறிகள்' என்கிற கோட்பாட்டை தள்ளிவைத்துவிட்டு, 'இந்தியாவின் ஒளிமயமான இறந்த காலத்தை சிதைத்தது முஸ்லிம் படையெடுப்பே' என்றும், ஆரியர்கள் இந்தியாவில் வசித்தவர்களே, அவர்களே ‘அறிவியல்பூர்வமான’ வேத காலத்தை நிறுவியர்கள் என்றும் நம்ப வைக்கும் முயற்சியில் இறங்கினர்.


குதிரையா... ஒற்றைக் கொம்பு காளையா?

ராஜாராமும் நட்வர் ஜாவும், ' ஹரப்பா நாகரிகத்தில் குதிரை இருந்தது' என்றார்கள். Mackay 453 என்ற முறையைப் பயன்படுத்தி ஒற்றைக் கொம்பு காளையை, கொம்பு முளைத்த குதிரை என மாற்றினார்கள். ஆனால் ஆய்வின்படி ஆரியர்களின் புலம்பெயர்வுக்குப் பிறகே குதிரைகள் இங்கே கொண்டுவரப்பட்டன. குதிரைகள் கி.மு. 1500-ம் ஆண்டில்  ஆரியர்களால் கொண்டுவரப்பட்டவை. மாடுகளின் மூலம் நகர்ந்த இந்திய மக்களை அடிபணிய வைக்க, வேகமான குதிரைகளை ஆரியர்கள் பயன்படுத்தினர். ஆனால் வலதுசாரி வரலாற்றாசிரியர் இவற்றை நிராகரித்து, 'இந்திய கலாசாரத்தில் குதிரைகளும் அங்கமானவையே' என்கிறார்கள். வேதகால இலக்கியங்கள் குதிரைகள் குறித்து நிறையவே பேசுகிறது. ஆனால் வேத காலத்துக்கு முன்பு இந்த விலங்கு குறித்து எவ்வித ஆதாரங்களும் கிடைக்கப்பெறவில்லை.

ஹார்வர்டு பல்கலைக்கழகத்தின் இந்தியவியல் ஆய்வாளர் மிக்கேல் விட்ஸெல் மற்றும் வரலாற்று ஆசிரியர் ஸ்டீவ் ஃபார்மர் ஆகியோர், ராஜாராமின் கருத்துக்களுக்கு ஆதாரங்களை முன்வைத்து நிராகரித்தார்கள்.  ராஜாராம் இந்த குதிரை முத்திரையை கணினி மூலம் மெருகேற்றி ஜோடித்ததை நிரூபித்தது மட்டுமல்லாமல், ஏற்றுக்கொள்ளப்பட்ட வழிமுறைகளில் இவற்றைச் சொல்லவில்லை என்பதையும் சுட்டிக்காட்டினர். ராஜாராமின் கருதுகோள்கள், மொழியியல், தொல்லியல் ஆகிய துறைகளின் ஆய்வுகளிலிலிருந்து முற்றிலும் மாறுபடுகிறது. முதிர்ச்சியடைந்த ஹரப்பா கலாசாரத்திற்கு, இரண்டாயிரம் ஆண்டுகளுக்குப் பிறகுகூட  வேத இறுதிக்காலம் இல்லை என்பதே உண்மை" என்கின்றனர் அவர்கள்.

மொகஞ்சதாரோ படம் முன்வைக்கும் அரசியல் குறித்து நம்மிடம் விவரித்த வழக்கறிஞர் சிவக்குமார், " ஆரிய கலாச்சாரத்தின் தொட்டிலாக சிந்து சமவெளி நாகரிகத்தை திரித்துக் காண்பிக்கும் வேலைகள் நடந்து வருகின்றன. கடந்த ஆண்டு விமானம் என்பது வேதகாலத்தில் கண்டறியப்பட்ட ஒன்று என்று கூறி, ஹவாய்ஜாதா என்ற திரைப்படமே எடுக்கப்பட்டது. அதில் ரைட் சகோதரர்களுக்கு முன்பே இந்தியாவில் விமான சாஸ்திரம் என்ற வேதகால நூல் ஒன்றை வைத்துக் கொண்டு மராட்டிய இளைஞன் ஒருவன் விமானத்தை தயாரித்தாகவும் அதை மும்பை கடற்கரையில் வெற்றிகரமாக பறக்கவிட்டார் என்றும் படத்தில் காட்டப்பட்டிருந்தது. தற்போது பண்டைய திராவிடர் பண்பாட்டின் சின்னமாகத் திகழும் மொகஞ்சதாரோ என்னும் அழிந்து போன திராவிட நாகரிககத்தின் நகரை, ஆரிய நகரமாகக் காண்பித்துள்ளனர். திரைப்படத்தின் பின்னனியில் மாடு பூட்டிய அலங்கார வண்டி, பருத்தியினால் செய்யப்பட்ட ஆடைகள், உலோக ஆயுதங்கள், உழவுக் கருவிகள் போன்றவை அன்றைய காலகட்டத்தில் (கி.மு.3000) கிடைத்த புதைபொருட்களை அடிப்படையாக வைத்து உருவாக்கப்பட்டவை' என்கிறார் இயக்குநர் அசுதோஷ் கௌரிகர்.

இந்தப் படத்தில் குதிரைகள் காட்டப்பட்டுள்ளன. சிந்து சமவெளி நாகரிகத்தில் எந்த இடத்திலும் குதிரைகள் இல்லை. அகழ்வாராய்ச்சியில் சில இடங்களில் கட்ச் கழுதைகளின் எழும்புகள் கிடைத்துள்ளன. இவை விவசாயத்திற்குப் பயன்படுத்தப்பட்டிருக்கலாம் என்று ஒரு கருத்தை ஜெர்மானிய அகழ்வாராய்ச்சியாளர் கோசின்னா கூறியிருந்தார். ஆனால் அந்தக் கழுதை எழும்புகள் கிடைத்த காலம் குறித்து இன்றுவரை சரியான முடிவுகள் இல்லை. அப்படி இருக்க அந்தப் படத்தில் குதிரைகளைக் காண்பிப்பது ஏன் என்றால், ரிக்வேதத்தில் குதிரை முதன்மையான விலங்காக காட்டப்பட்டுள்ளது, முக்கியமாக அசுவமேத யாகத்தில் குதிரைகளின் முக்கியத்துவம் குறிப்பிடப்பட்டுள்ளது. அந்த வாசகத்தை உண்மையாக்க இந்த திணிப்புகளை திரைப்படத்தில் புகுத்தியுள்ளனர். திரைப்படத்தில் பல இடங்களில் சிவலிங்கங்களைக் காண்பித்துள்ளனர். இந்த சிவலிங்கங்கள் அனைத்தும் சமலா நதிக்கரையில் (கர்னாடகா) நேர்த்திக்கடன் என்ற பெயரில் பக்தர்கள் செதுக்கிவைத்த சிவலிங்கங்களாகும். அவற்றைக் காட்டி அந்த பகுதி மொகஞ்சாதாரா மக்கள் அனைவரும் சிவபக்தர்கள் என்று காட்ட முயற்சி செய்துள்ளனர். மிகவும் முக்கியாக அங்கு வாழ்ந்த மக்கள் பேசிய மொழி சமஸ்கிருதம் என்று பதிவுசெய்யப்பட்டுள்ளது. மொகஞ்சதாரோ படத்தின் மூலமாக திராவிட நாகரிகச் சான்றை அழிக்கும் முயற்சியில் இறங்கியிருக்கிறார் அசுதோஷ் கௌரிகர்.


இந்திக்கும் குதிரைக்கும் என்ன சம்பந்தம்?

மேலும், " சிந்துவெளி காலத்தில் பேசப்பட்ட மொழி சமஸ்கிருதமாக இருக்கலாம் என நிரூபிப்பதற்காக எடுக்கப்பட்ட முயற்சிகள் அனைத்தும் தோல்வியிலேயே முடிந்து போய்விட்டன எனவும் சுட்டிக் காட்டுகிறார் ரொமீலா தாப்பர். இந்துத்துவ பிரசாரத்திற்கு மொகஞ்சதாரோவின் டீஸர் பொருத்தாக உள்ளது. கெளரிகர் சொல்லும் வரலாற்று விவரங்கள், உண்மையிலிருந்து கணிசமான அளவு விலகியிருக்கின்றன.

சிந்துவெளி நாகரிகம்தான், உலகின் முதன்மையான நாகரிகம் என்பதை வலதுசாரிகள் நீண்ட காலத்திற்கு  முன்பே நிறுவப் பார்த்தனர். ஆனால், வரலாற்று ஆசிரியர்களின் கூற்றுப்படி மெசபடோமிய, எகிப்திய நாகரிகங்களே பழமையானவை. ஹரப்பா நாகரிகத்தை நன்கு ஆராய்ந்த பிறகு, அங்கு கண்டெடுக்கப்பட்ட மண்பாண்ட முத்திரைகள், செம்பின் பயன்பாடு, நகர வடிவமைப்பு மற்றும் பலவற்றை ஆய்வுக்கு உட்படுத்தினர். இந்துத்துவ உணர்வுக்கு தீனி போடுவதற்காகவே, இந்திக்கும் குதிரைக்கும் இந்தப் படத்தில் கூடுதல் கவனம் தந்திருக்கிறார் இயக்குநர் அசுதோஷ் கௌரிகர். சிந்து சமவெளி நாகரிகத்தைத் திரிப்பதன் மூலம் இந்துத்துவ சக்திகளுக்கு நல்ல வாய்ப்பை வழங்கியிருக்கிறார் மொகஞ்சதாரோ இயக்குநர்" என சொல்லி அவர் ஆதங்கப்பட்டார்.

நாளை காலையில் படம் வெளியான பின்னர், வரலாற்று ஆய்வாளர்களின் கண்டனத்தில் இருந்து தப்பிப்பாரா அசுதோஷ் கௌரிகர்?

-ஆ.விஜயானந்த்

இது தொடர்பா வேற என்னலாம் நடந்திருக்குனு தெரிஞ்சுக்கலாமா?

எடிட்டர் சாய்ஸ்

MUST READ