Vikatan.com

www.vikatan.com would like to send you push notifications.

Notifications can be turned off anytime from browser settings.

காஞ்சிபுரம் டூ கோயம்பேடு! - 1000 கி.மீ. டார்கெட்டால் தவிக்கும் அரசுப்பேருந்து ஓட்டுநர்கள்

சென்னை கோயம்பேடு முதல் காஞ்சிபுரம் வரையிலும்,காஞ்சிபுரம் முதல் கோயம்பேடு வரையிலும் தினமும் 1000 கிலோமீட்டர் வரை பேருந்துகளை இயக்கவேண்டும் என்று டார்கெட் நிர்ணயிக்கப்பட்டு, காஞ்சிபுரம் மண்டல பேருந்து ஓட்டுநர்களுக்கும் நடத்துநர்களுக்கும் உத்தரவு போடப்பட்டுள்ளதாகவும் இதற்கு மறுக்கும் ஊழியர்கள் மீது மேல் அதிகாரிகள் டார்ச்சர் நடவடிக்கை எடுப்பதாகவும் புகார்கள் எழுந்துள்ளன. 

இது தொடர்பாக சென்னை கோயம்பேடு பணிமனையில் உள்ள காஞ்சிபுரம் மண்டல பேருந்து ஓட்டுநர்கள் மற்றும் நடத்துநர்கள் அளித்துள்ள புகார் மனுவில், " கோயம்பேடு பணிமனையில் அதிகாரியாக உள்ள மீனாட்சி சுந்தரம், ஒரு பேருந்தின் ஷெட்யூல் கிலோமீட்டரை விட கூடுதல் கிலோ மீட்டர்கள் ஓட்டச் சொல்லி கட்டாயப் படுத்துகிறார். ஷெட்யூல் கிலோமீட்டர் 575 தான். ஆனால் அதைவிட கூடுதலாக 1000 கி.மீ. வரை ஓட்டுவதால் ஓட்டுநரும் நடத்துநரும் தூக்கமின்றி கடுமையாகப் பாதிக்கப்பட்டு அல்லல்படுகின்றனர். இதனால் சாலைகளில் விபத்துக்கள் ஏற்படும்   ஆபத்து உள்ளது. மேலும் எங்கள் குடும்பத்தினரை காணவும் பேசவும் கூட நேரமில்லாமல் தவிக்கிறோம். 

மேலும், பழுது அடைந்த பேருந்துகளை இயக்கச் சொல்லிக் கட்டாயப்படுத்தப் படுகிறோம். இதுதான் விபத்துக்கள் ஏற்பட காரணமாகவும் அமைந்துவிடுகிறது. இது மேல் அதிகாரிகளின் டார்ச்சரால் தினமும் தொடருகிறது. அதே நேரத்தில் அதிகாரி மீனாட்சி சுந்தரம், ஊழியர்களைக் கேவலமாகப் பேசி அடிமை போல நடத்துகிறார். இதனால் நாங்கள் மிகுந்த மனஉளைச்சலுக்கு ஆளாகியுள்ளோம். ஒரு டியூட்டி முடிந்து கலெக்சன் பணத்தைக் கட்ட போனால் அதை வாங்க மறுத்து இன்னொரு டியூட்டியை பார்த்துவிட்டு வா என்று எங்களைக் கட்டாயப்படுத்துகிறார். இப்படி நாள்தோறும் எங்களின் துன்பம் தொடர்ந்துகொண்டுதான் இருக்கிறது." என்று குறிப்பிடப்பட்டுள்ளது.

உண்மையிலேயே சென்னை கோயம்பேடு பேருந்து நிலையத்தில் இப்படித்தான் நடக்கிறதா என்று விசாரித்தோம். அதில் பல்வேறு அதிர்ச்சித் தகவல்கள் கிடைத்தன. S.E.T.C. பிரிவிலும் இதே போன்ற பிரச்னைகள் ஊழியர்களுக்கு நெருக்கடிகளைக் கொடுத்துவருகிறது  என்கிறார்கள் அதில் பணியாற்றும் தொழிலாளர்கள்.

இது தொடர்பாக நம்மிடம் பேசிய கோயம்பேடு S.E.T.C. பிரிவின் சி.ஐ.டி.யூ. சங்க பிரதிநிதி ரவி, " சென்னை கோயம்பேடு பணிமனையில் இருந்து பெங்களூரு உள்ளிட்ட வெளி மாநிலங்களுக்கும்,தமிழகத்தின் வெளி மாவட்டங்களுக்கும் செல்லும் விரைவுப் போக்குவரத்துக் கலகத்தின் நடத்துநர்கள் ஓட்டுநர்களுக்கு ஓய்வு அறை இல்லை. இருக்கும் அறையும் சுத்தமின்றி, நோய் உண்டாக்கும் நிலையில்தான் இருக்கின்றன. கழிவறை கூட இல்லை. இந்த பணிமனையில் உள்ள ஜி.எம். கென்னடி ஆளும் கட்சியின் செகரெட்டரி போல செயல்படுகிறார். ஆளும் கட்சித் தரப்பில் வரும் நபர்களுக்கு மட்டுமே, ரூட் நல்லதாக கொடுப்பது, ஓ.டி.க்கு அனுமதி கொடுப்பது,புதிய நபர்களுக்கு மரியாதையும், ஏற்கெனவே பணிபுரியும் சீனியர்களுக்கு வசவுச் சொற்களும் கொடுத்து மன உளைச்சல் கொடுத்துவருகிறார். பழுது அடைந்த வண்டிகளை உடனே பழுது பார்த்துக் கொடுக்க அறிவுறுத்துவதில்லை.

டெக்னிக்கல் பணியாளர்கள் போதுமான அளவில் இல்லை. ஒரு வண்டிக்கு சராசரியாக 7.5 பேர் இருக்கவேண்டும். இதில், நடத்துனர்கள்,ஓட்டுநர்கள்,தொழில் நுட்ப பணியாளர்கள் அடக்கம். ஆனால் இப்போது ஒரு வண்டிக்கு  5.5 பேர்தான் இருக்கிறார்கள். இது பெரும் சிக்கலை உண்டாக்குகிறது. பணிச்சுமை ஏற்படுத்தி மன ரீதியாக  பாதிக்கப்படும் வகையில் நெருக்கடி கொடுக்கப்படுகிறது.

மாநிலத்தின் பிற போக்குவரத்துக் கோட்டங்களுக்கு ஆண்டுதோறும் புதிய பேருந்துகள் ஒதுக்கீடு செய்யப்படுகின்றன. விரைவுப் போக்குவரத்துக் கழகத்திற்கு மட்டும் பேருந்துகள் ஒதுக்கீடு செய்யப்படுவதில்லை.  இருக்கும் வண்டிகளையே புதிய பெயிண்ட் அடித்து எப். சி. கொடுத்து வழித்தடங்களில் ஓட்டப்படுகின்றன.  பெயிண்ட் மட்டுமே புதியது. அந்தப் பேருந்து எந்த கண்டிஷனில் இருக்கிறது என்று ஆர். டி .ஓ.  பார்ப்பதில்லை. தனியார் பேருந்துகளை மட்டும் ஓட்டி பார்த்து எப்.சி. வழங்கும் ஆர்.டி.ஓ. ,  அரசுப்பேருந்துகளை மட்டும்  ஓட்டியே பார்ப்பதில்லை. இது பயணிகளுக்கு அச்சம் தரும் விஷயம். பொதுமக்களின் உயிரோடு விளையாடும் வேலையை செய்கிறார்கள் அதிகாரிகள்.

மேலும் புதிய பொருட்கள்,பேருந்துகளுக்குத் தேவையான உதிரி பாகங்கள் வாங்குவதிலும் பெருமளவில் முறைகேடுகள் நடக்கின்றன. கமிஷன் அதிகம் தரும் கம்பெனிகளிடம் கோடிக்கணக்கில் உதிரி பாகங்கள் வாங்குவார்கள். பொருட்களின் தரத்திற்கு முக்கியத்துவம் கொடுக்காமல் தங்களுக்கு வரும் கமிஷனையே இலக்காக வைத்து  போக்குவரத்துக்கு கழகத்தை நடத்துகிறார்கள்." என்றார் கொதிப்போடு.

ஓட்டுனர்கள் நடத்துனர்கள் மீது  தொடுக்கப்படும் துறை ரீதியிலான நடவடிக்கைகள், புகார்கள் குறித்து கோயம்பேட்டில் உள்ள  காஞ்சிபுரம் மண்டல டிப்போ மேனேஜர் மீனாட்சி சுந்தரத்திடம் தொடர்பு கொண்டு விசாரித்தோம்.

அவர் கூறுகையில், "கூடுதல் கிலோமீட்டர்கள் பேருந்துகளை இயக்கவேண்டும் என்பதை காஞ்சிபுரம் தலைமை அலுவலகம் தான் முடிவுசெய்துள்ளது.கோயம்பேட்டில் எடுக்கப்பட்ட முடிவு அல்ல.அவர்கள் சொல்வதை நான்  கேட்கிறேன் அவ்வளவுதான். இவ்வளவுதூரம் ஓட்டவேண்டும் என்று நான் யாரையும் கட்டாயப்படுத்துவதில்லை.நிர்பந்தம் செய்யவும் இல்லை.அரசு என்ன அளவீடு வைத்துள்ளதோ அதுதான் நடைமுறையில் உள்ளது.அதைக் கூட்டி குறைக்கும் அதிகாரம் எனக்கு இல்லை. ஊழியர்களை டார்ச்சர் செய்வதாக  கூறப்படுவதில் உண்மை இல்லை.மேற்கொண்டு பதில் வேண்டும் என்றால் காஞ்சிபுரம் அலுவலகத்தில் கேளுங்கள் " என்றார்.

காஞ்சிபுரம் மண்டல தலைமை அலுவலகத்தினரைப் பலமுறை தொடர்புகொண்டோம். பதிலளிக்க மறுத்துவிட்டனர்.   

- தேவராஜன், சேதுராமன்                 

எடிட்டர் சாய்ஸ்

அப்போலோ டூ எம்.ஜி.ஆர் சமாதி... ஜெயலலிதாவுக்கு அரண் அமைத்த மன்னார்குடி!

MUST READ