Vikatan.com

www.vikatan.com would like to send you push notifications.

Notifications can be turned off anytime from browser settings.

யுத்த முனையில் ஒரு மாரத்தான்!

மாரத்தான் என்பது சமவெளியிலும் நடக்கிறது; மலைப் பகுதியிலும் நடக்கிறது; கரடு முரடான பகுதியிலும் நடக்கிறது. ஆனால் ஒரு யுத்தக் களத்தில் மாரத்தான் நடத்துவது சாத்தியமா? ‘சாத்தியம்’ என்கிறது 'பாலஸ்தின் மாரத்தான்' டீம். சோதனைச் சாவடிகள், தடுப்புக் கட்டைகள், அகதி முகாம்கள் நிறைந்த உலகின் நீண்ட கால பதற்றப் பகுதியான பாலஸ்தீன பகுதியில் வெற்றிகரமாக மூன்றாவது ஆண்டாக நடந்து முடிந்திருக்கிறது 'பாலஸ்தின் மாரத்தான்'.

டென்மார்க்கைச் சேர்ந்த லார்க் ஹெய்ன், சைன் பிஷெர் என்ற இருவர் தொடங்கி வைத்த ஓட்டம் இது. மக்கள் பொதுவெளியில் சுதந்திரமாக உலவுவது ஓர் அடிப்படை உரிமை. அது பாலஸ்தீன மக்களுக்கும் கிடைக்க வேண்டும் என்ற எண்ணத்தில்,  மூன்று ஆண்டுகளுக்கு முன்பு இவர்கள் Right to Movement என்ற பெயரில் ஒரு மாரத்தானைத் தொடங்கினார்கள். முதல் ஆண்டு ஆதரவுக் குறைவாக இருந்தது. இஸ்ரேல் முட்டுக் கட்டைப் போட்டது. இருப்பினும் ஒரு போட்டி என்ற வகையில் 'பாலஸ்தின் மாரத்தான்' வெற்றிகரமாக நடந்தது.

அடுத்த ஆண்டே பாலஸ்தின் மாரத்தான் சூப்பர் ஹிட் ஆனது. போட்டியாளர்களின் எண்ணிக்கை ஆயிரங்களைத் தாண்டியது. மொத்தப் போட்டியாளர்களில் 39 சதவிகிதம் பேர் பெண்கள். உலகின் இதரப் பகுதி மாரத்தான்களுடன் ஒப்பிடும்போது,  சதவிகிதம் மிக அதிகம். இதற்குக் காரணம்,  போட்டியில் வெற்றிபெறுவது என்பதைக் காட்டிலும், ஓடுவது என்பது பாலஸ்தீன பெண்களுக்கு ஒரு தற்காலிக விடுதலை. அதேபோல, இந்த அமைதிக்கான ஓட்டம் எப்போதும் ஒரு பயங்கரவாத தாக்குதலுக்கு உள்ளாகலாம் என்பதையும், தங்கள் உயிருக்கே ஆபத்து இருப்பதையும் இந்த ஓட்டக்காரர்கள் அறிந்துள்ளனர். இருப்பினும், ஒரு பொது நோக்கத்தை முன்னிட்டு அவர்கள் இந்த அச்சத்தை எதிர்கொள்கின்றனர்.

2016-ல், இந்த பாலஸ்தின் மாரத்தானில் வெற்றிபெற்ற அல் மஸ்ரி, ‘’நான் மாரத்தானில் வெற்றிபெற்றது மகிழ்ச்சி. அதைவிட, காஸா ஸ்ட்ரிப்பில் இருந்து வெளியில் வர முடிந்தமைக்கும், மேற்குக் கரையில் உள்ளே நுழைய முடிந்தமைக்கும்தான் நான் கூடுதல் மகிழ்ச்சி அடைகிறேன்.’’ என்கிறார். காஸா ஸ்ட்ரிப்பில் உள்ளவர்களை மாரத்தான் போட்டியில் பங்கேற்க செய்ய, போட்டிக் குழுவினர் தொடர்ந்து முயற்சி செய்கின்றனர். ஆனால், இஸ்ரேல் இதற்கு ஒத்துழைக்க மறுக்கிறது. அதனால்தான் இந்த ஆண்டு போட்டியில் வெற்றிபெற்ற அல் மஸ்ரி கூட, "அடுத்த முறை என்னால் காஸா ஸ்ட்ரிப்பில் இருந்து வெளியில் வந்து போட்டியில் பங்கேற்க முடியுமா என்பது தெரியவில்லை" என்கிறார்.

மூன்றாவது ஆண்டாக நடைபெறும் இந்த பாலஸ்தின் மாரத்தானில்,  இந்த ஆண்டு உலகம் எங்கிலும் இருந்து வந்த 3,000-த்துக்கும் அதிகமானவர்கள் ஓடினார்கள்.  இந்த மூன்றாவது ஆண்டு ஓட்டத்தில்,  காஸா ஸ்ட்ரிப் பகுதியில் இருந்து மொத்தம் 46 பேர் வந்து கலந்துகொண்டிருக்கின்றனர். சிக்கல் தீர்ந்துவிடவில்லை. ஆனால் பொதுவெளிக்கு வந்து மூச்சிரைக்க ஓடுவதன் மூலம் பாலஸ்தீன மக்கள்,  தங்கள் குரலை வெளி உலகுக்கு சொல்வதற்கான ஒரு புதியக் கருவியைக் கண்டுபிடித்திருக்கிறார்கள்.

இவர்களைப் பொறுத்தவரை மாரத்தான் என்பது போருக்கு எதிராக இவர்கள் நடத்தும் யுத்தம்.

- ரூபன்

எடிட்டர் சாய்ஸ்

MUST READ