Vikatan.com

www.vikatan.com would like to send you push notifications.

Notifications can be turned off anytime from browser settings.

உயிர்க்கொல்லிக்கு விடைகொடுப்போம்! உலக எய்ட்ஸ் தினம் - டிசம்பர் 1 #WorldAidsDay

உலக எய்ட்ஸ் தினம்

`ஹெச்.ஐ.வி பாதிப்பும் மற்றும் எய்ட்ஸ் நாளுக்கு நாள் அதிகமாகிக்கொண்டே இருக்கின்றன. இவை குறித்த அக்கறையின்மையும் மக்களிடம் அதிகமாக இருக்கிறது. ஏற்கெனவே எத்தனையோ நண்பர்களையும் சக தோழர்களையும் எய்ட்ஸால் இழந்து நிற்கிறோம்.’ - டேவிட் ஜெஃபன், அமெரிக்க தொழிலதிபர், சமூக ஆர்வலர். 

‘மிக மோசமான உயிர்க்கொல்லி’ என வர்ணிக்கப்படுவது எய்ட்ஸ். மற்ற நோயாளிகளுக்கு இல்லாத சில சங்கடங்கள் எய்ட்ஸ் நோயாளிகளுக்கு உண்டு. அவை, இழிவாகப் பார்க்கப்படுதல்; சமூகப் புறக்கணிப்பு; தனிமைப்படுத்தப்படுதல். உலகம் முழுக்க, இன்றைக்கும் இந்த நிலையில் பெரிய அளவுக்கு மாற்றம் இல்லை. இந்தச் சூழலில்தான் டிசம்பர் 1-ம் தேதியை ‘உலக எய்ட்ஸ் தின’மாக எதிர்கொள்கிறோம். 

 

1988-ம் ஆண்டில் இருந்து உலக சுகாதார நிறுவனம், டிசம்பர் 1-ம் தேதியை ‘உலக எய்ட்ஸ் தினம்’ என அனுசரித்து வருகிறது. `உலக அளவில் 3 கோடியே 67 லட்சம்பேர் ஹெச்.ஐ.வி பாதிப்போடு வாழ்கிறார்கள்; அவர்களில் 18 லட்சம் பேர் குழந்தைகள்’ என்கிறது, 2015-ம் ஆண்டுக்கான ஒரு புள்ளிவிவரம். அதே 2015-ம் ஆண்டில்தான் 11 லட்சம் பேர் எய்ட்ஸ் பாதிப்புக்கு ஆளாகி இறந்து போயிருக்கிறார்கள்.

வருவாயில் பின் தங்கிய மற்றும் நடுத்தர நாடுகளில்தான் பெரும்பான்மையானோர் ஹெச்.ஐ.வி-யால் பாதிக்கப்பட்டிருக்கிறார்கள். 2015-ம் ஆண்டு, இந்தியாவில் ஹெச்.ஐ.வி பாதிப்புக்கு ஆளானோர் எண்ணிக்கை 21 லட்சம்; எய்ட்ஸ் தொடர்பான நோய்களால் இறந்தவர்கள் 68,000 பேர். இதில் கொடுமை என்னவென்றால், உலகில், ஹெச்.ஐ.வி பாதிப்போடு வாழ்கிறவர்களில் 40 சதவிகிதத்தினருக்கு, தங்களுக்கு இப்படி ஒரு பாதிப்பு இருப்பதே தெரியாது என்பதுதான். 

ஒரு தினத்தை நினைவுபடுத்தி அனுசரிப்பதன் நோக்கம், அதற்கான முக்கியத்துவத்தை எல்லோருக்கும் உணரவைப்பதாகும். மருத்துவம், தொழில்நுட்பம் எனப் பல துறைகளில் எவ்வளவோ முன்னேற்றம் ஏற்பட்டுவிட்ட இன்றையச் சூழலில் நமக்குத் தேவை, எய்ட்ஸ் மற்றும் ஹெச்.ஐ.வி குறித்த போதிய விழிப்பு உணர்வு. இந்த ஆண்டு, இந்த தினத்துக்கான கருப்பொருளாக அறிவிக்கப்பட்டிருப்பது, `ஹெச்.ஐ.வி-யைத் தடுக்கக் கைகளை உயர்த்துவோம்' (Hands up for #HIV Prevention). ஹெச்.ஐ.வி வராமல் தடுத்துவிட்டால், எய்ட்ஸில் இருந்து தப்பித்துவிடலாம்.

அதைத் தடுக்க என்ன செய்யவேண்டும்; நம் வாழ்க்கைமுறையில் பின்பற்றவேண்டியவை என்னென்ன என்பதை ஒரு பெரும் பிரசாரமாகச் செய்யவேண்டியிருக்கிறது. திரும்பத் திரும்ப அவற்றை கிளிப்பிள்ளைக்குச் சொல்வதைப்போல் மக்களுக்குச் சொல்லி விழிப்பு உணர்வை ஏற்படுத்தவேண்டியது அவசியம். இந்த நாளில் அதற்கு நாம் ஒவ்வொருவரும் உறுதி ஏற்போம். எதிர்கால சந்ததியினருக்காகவாவது உயிர்க்கொல்லிக்கு வைப்போம் ஒரு முற்றுப்புள்ளி! 

- பா.பிரவீன்குமார், பாலு சத்யா 
 

எடிட்டர் சாய்ஸ்

MUST READ