Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

பிரா அணிவது மார்பகப் புற்றுநோயைத் தூண்டுமா? மருத்துவம் என்ன சொல்கிறது?! #MustKnowFact

பெண்களை அதிகம் பாதிப்பது மார்பகப் புற்றுநோய். இதற்கு முக்கியக் காரணம் வியர்வை நாற்றம் போக்க அக்குள் பகுதியில் ஸ்ப்ரே செய்துகொள்ளும் டியோடரன்ட்கள் (Deodorants), முகப்பூச்சுகள், அழகுசாதனப் பொருள்கள்.. போன்றவைதான் என்று எத்தனையோ ஆய்வுகள் சொல்லிவிட்டன. `இதற்கெல்லாம் ஆதாரம் இல்லை’ என்றுதான் நம் ஊர்க்காரர்கள் தொடங்கி அமெரிக்காவின் ஃபுட் அண்ட் டிரக் அட்மினிஸ்ட்ரேஷன் (US Food and Drug Administration) வரைக்கும் அழுத்தமாகச் சொல்கிறார்கள். இவற்றால் பாதிப்பில்லை என்கிற வாசகத்துக்குப் பின்னணியில் இருப்பது, முகப்பூச்சு, டியோடரன்ட், அழகுசாதனப் பொருள்களுக்கு இருக்கும் உலகளாவிய சந்தை. சந்தேகப்படும் நிலையில் ஒன்று இருந்தால், அதைத் தவிர்ப்பதுதான் ஆரோக்கியத்துக்கு அழகு. அதேபோல, பிரா அணிவது மார்பகப் புற்றுநோயைத் தூண்டுமா என்பது பலருக்கும் ஏற்படும் முக்கியமான சந்தேகம்! இது குறித்து கிளினிக்கல் ஆன்காலஜிஸ்ட் (Clinical Oncologist) சதீஷிடம் பேசினோம்... 

பிரா

“உண்மையில் மார்பகப் புற்றுநோய் என்பது மோசமான ஒரு நோய்தான். அது ஏற்பட என்னென்னவோ காரணங்கள் இருக்கின்றன. பிரா அணிவதால் மார்பகப் புற்றுநோய் வரும் என்பது கட்டுக்கதை. அதிலும், ‘அண்டர்வொயர் பிரா’ (Underwire Bra) என்கிற வகைதான் மார்பகப் புற்றுநோய்க்குக் காரணமாகிறது என்று சொல்கிறார்கள். இந்த வகை பிராவின் அடிப்பகுதியில் பொருத்தப்படும் வொயர் உலோகம், பிளாஸ்டிக், ஒருவகையான பிசினால் செய்யப்படுகின்றன. மார்பகங்களுக்கு உள்ளே இருக்கும் நிணநீர் சுரப்பியை (Lymph Fluid) அடைத்துவிடும் என்று சொல்லப்படுகிறது. இதனால் புற்றுநோய் ஏற்படலாமாம். பெண்களுக்கு இது உண்மையிலேயே கவலையை அளிக்கக்கூடிய விஷயம்தான். பிரா என்பது உள்ளாடை. அது பெண்களுக்கான பிரத்யேகமான ஒன்று. பிரா அணிவதால் மார்பகப் புற்றுநோய் வருமா... நிச்சயம் வராது. ஆனால், மார்பகப் புற்றுநோய் ஏற்படுவதற்கு முக்கியமான ஐந்து காரணங்கள் உள்ளன. அவை... 

சதீஷ்பாலினம் 

மார்பகப் புற்றுநோய் ஏற்படுபவர்களில் பெண்கள் 99 சதவிகிதத்துக்கும் மேல் என்றால், ஆண்கள் 1 சதவிகிதத்துக்கும் கீழ். ஆண்களுக்கு ஈஸ்ட்ரோஜென் ஹார்மோன்களின் அளவு மிக மிகக் குறைவு. எனவே, அவர்களின் மார்பகத்தில் உள்ள செல்கள் செயலற்றவையாக இருக்கும். பெண்களுக்கு ஈஸ்ட்ரோஜென் ஹார்மோன்கள் அதிகம்; இவைதான் அவர்களின் குழந்தைப்பேறுக்கு ஆதாரம். எனவே, இவர்களின் மார்பகங்களில் இருக்கும் செல்கள் எப்போதும் தூண்டப்படக்கூடியவையாக, செயலாற்றக்கூடியவையாக இருக்கும். அதனால், பெண்களுக்கு மார்பகப் புற்றுநோய் வருவதற்கான அபாயம் அதிகம். 

வயது 

பெண்கள் 14-17 வயதுக்கு இடைப்பட்ட, பூப்பெய்தும் பருவத்தில்தான் பிரா அணிய ஆரம்பிக்கிறார்கள். மார்பகப் புற்றுநோய் வருவதற்கான அபாயங்களில் வயதும் ஒன்று. ஆனால், அதற்கும் பிராவுக்கும் சம்பந்தமில்லை. சமீபத்தில் அமெரிக்காவின் நேஷனல் இன்ஸ்டிட்யூட் ஆஃப் கேன்சர் (National Institute of Cancer) வெளியிட்ட ஆய்வு முடிவு இப்படிச் சொல்கிறது... `40 வயது நிரம்பிய 68 பெண்களில் ஒருவருக்கு மார்பகப் புற்றுநோய் ஏற்பட்டிருக்கிறது; 50 வயதுள்ள 42 பெண்களில் ஒருவருக்கு மார்பகப் புற்றுநோய்; 60 வயதுள்ள 28 பெண்களில் ஒருவருக்கு மார்பகப் புற்றுநோய். பெண்களின் மாதவிடாய் நிற்கும் காலத்துக்குப் பிறகு (Menopause) உடலில் ஏற்படும் ஹார்மோன் மாற்றங்கள் இந்தப் புற்றுநோய் வருவதற்குக் காரணமாகின்றன. 60 வயதுக்குப் பிறகு பெண்களுக்கு மார்பகப் புற்றுநோய் வருவதற்கான அபாயம் வெகுவாகக் குறையும்.

மார்பகப் புற்றுநோய்

பரம்பரைக் காரணங்கள் 

பரம்பரையில் யாருக்காவது மார்பகப் புற்றுநோய் இருந்தாலும், இது வரக்கூடும். அதிலும் நெருங்கிய சொந்தமான சகோதரி, அம்மா போன்றவர்களுக்கு இந்தப் புற்றுநோய் இருந்தால், அந்தக் குடும்பத்தில் உள்ள மற்ற பெண்களுக்கு புற்றுநோய் வரும் வாய்ப்புகள் அதிகம். அதிலும் அம்மாவுக்கு இந்தப் பிரச்னை இருந்தால், மகளுக்கு வருவதற்கு வாய்ப்பு அதிகம்; அதாவது, பொதுவானவர்களுக்கு வருவதைவிட 10 மடங்கு அபாயம் அதிகம். இரு மார்பகங்களையும்கூட புற்றுநோய் பாதிக்கலாம். பொதுவாக பெண்களுக்கு 30 வயதைத் தாண்டிய பின்னர்தான் இது பாதிக்கும். 

கர்ப்ப காலம்

கர்ப்ப காலத்தில் பெண்களை மார்பகப் புற்றுநோய் பாதிப்பது அரிதானது. இந்தக் காலத்தில் மார்பகச் செல்களை முதிர்ச்சி அடைந்து, புற்றுநோய் வராமல் பாதுகாக்கவும் உதவும். தாமதமாகத் திருமணம் செய்துகொண்டவர்கள், தாமதமாக கருவுற்றவர்கள், குழந்தைக்கு அதிகம் பால் கொடுக்காதவர்களுக்கு இது ஏற்படலாம்.

பிரா

அதிக எடை மற்றும் உடல்பருமன் 

உடல்பருமனும் உடல் எடை அதிகமாகவும் உள்ள பெண்களுக்கு மார்பகப் புற்றுநோய் வருவதற்கான வாய்ப்பு அதிகம். கொழுப்பு செல்கள்தான் ஈஸ்ட்ரோஜென் ஹார்மோன்களை உருவாக்குகின்றன. அதிகக் கொழுப்பு உள்ளவர்களுக்கு ஈஸ்ட்ரோஜெனில் பாதிப்பு ஏற்பட்டு புற்றுநோய் ஏற்படும் அபாயம் அதிகம். அதிலும் கொழுப்பு இடுப்புப் பகுதியில் அதிகமாக இருந்தால், இந்த அபாயம் மிக அதிகம். 

ஆக, பிரா அணிவதற்கும் பெண்களுக்கு மார்பகப் புற்றுநோய் ஏற்படுவதற்கும் சம்பந்தம் இல்லை. மேலே சொல்லப்பட்ட காரணங்களை மட்டும் மனதில் கொண்டு, இந்த அபாயங்கள் அணுகாமல் பார்த்துக்கொள்ளுங்கள். அதிகக் கொழுப்புள்ள உணவுகள், உடல் உழைப்பு அதிகம் இல்லாத வாழ்க்கை ஆகியவையும் பெண்களுக்கு இந்தப் பிரச்னை ஏற்படுவதற்கான வாய்ப்பை அதிகரிக்கும். ஆரோக்கியமான உணவுகள், சீரான வாழ்க்கை முறை இவையெல்லாமே மார்பகப் புற்றுநோய் வராமல் உங்களைக் காப்பாற்றும்.’’ என்கிறார் மருத்துவர் சதீஷ்.

Advertisement
Advertisement
Advertisement
Advertisement
Advertisement

எடிட்டர் சாய்ஸ்

என்ன செய்தார்கள் தமிழ்நாட்டின் 39 எம்.பி-க்கள்? - முழுமையான பெர்ஃபாமன்ஸ் ரிப்போர்ட்
Advertisement

MUST READ

Advertisement
[X] Close