Vikatan.com

www.vikatan.com would like to send you push notifications.

Notifications can be turned off anytime from browser settings.

அமைச்சரவை மாற்றத்திற்குத் தயாராகும் பா.ஜ.க! -அதிர வைக்குமா முதல்வரின் டெல்லி பயணம்?

முதலமைச்சர் ஜெயலலிதாவின் டெல்லிப் பயணம் அதிகாரப்பூர்வமாக அறிவிக்கப்பட்டுவிட்டது. ' தமிழகத்திற்கு தேவையான நிதி உதவியைக் கோருவது மட்டுமல்ல. நீண்டகாலமாக தீர்க்கப்படாமல் இருக்கும் பல விஷயங்களுக்கு நாளைய சந்திப்பு தீர்வைச் சொல்லும்' என்கின்றனர் தலைமைச் செயலக வட்டாரத்தில்.

சட்டமன்றத் தேர்தல் வெற்றிக்குப் பிறகு பிரதமர் நரேந்திர மோடியை நாளை சந்தித்துப் பேசுகிறார் தமிழக முதல்வர் ஜெயலலிதா. கடந்த காலங்களில் போயஸ் கார்டன் இல்லத்தில் மட்டுமே பிரதமர் மோடி, நிதி அமைச்சர் அருண் ஜெட்லி உள்ளிட்டோர் சந்தித்துப் பேசினர். தன்னைத் தேடி மற்றவர்கள் வரட்டும் என்ற மனநிலையில் இருந்தார் முதல்வர். தற்போது சட்டசபைத் தேர்தல் வெற்றிக்குப் பிறகு, முதல்வரின் டெல்லி பயணத்தை ஆச்சர்யத்தோடு பார்க்கின்றனர் அரசியல் பார்வையாளர்கள்.

"தமிழக அரசின் மின்வாரியக் கடன் மட்டும் ஒரு லட்சம் கோடியைத் தாண்டிவிட்டது. இதுதவிர, தமிழக அரசின் 2 லட்சம் கோடி கடன் சுமையைத் தீர்க்க வழியில்லாமல், அரசு நிர்வாகம் திண்டாடுகிறது. மத்திய அரசின் ஒத்துழைப்பு இருந்தால் மட்டுமே, தேர்தல் வாக்குறுதிகளை நிறைவேற்ற முடியும் என முதல்வர் நம்புகிறார். தவிர, நாடாளுமன்றத்தின் இரு அவைகளிலும் ஐம்பது எம்.பி.க்களின் பலத்தோடு மூன்றாவது பெரிய கட்சியாக அ.தி.மு.க இருக்கிறது. வரக் கூடிய கூட்டத் தொடர்களில் அ.தி.மு.க.வின் தயவு, மத்திய அரசுக்கு மிகவும் தேவையாக இருக்கிறது. அடுத்த ஆண்டு வரக் கூடிய குடியரசுத் தலைவர் தேர்தலில், அ.தி.மு.க.வின் ஒத்துழைப்பை மிக முக்கியமானதாகக் கருதுகிறார் மோடி. எனவே, அ.தி.மு.க.வின் தயவு மத்திய அரசுக்குத் தேவை. தமிழகத்தின் கடன் சுமையைத் தீர்ப்பதற்கு மத்திய அரசின் தயவும் தேவை. எனவே, இரு தரப்பும் தோழமையோடு இருந்தால் மட்டுதே சாத்தியம் ஆகும் என்பதால், முதல்வரின் டெல்லிப் பயணம் மிக முக்கியமானதாக இருக்கிறது" என்கிறார் தலைமைச் செயலக அதிகாரி ஒருவர்.

ஆனால், பா.ஜ.க.வைச் சேர்ந்த முக்கியப் பிரமுகர் ஒருவர் நம்மிடம், "எங்கள் கட்சியின் அகில இந்திய செயற்குழு கூட்டம் இன்று மாலை நிறைவடைய இருக்கிறது. அடுத்து வரக் கூடிய நாட்களில் கட்சி நிர்வாகிகள் மாற்றம் நடக்க இருக்கிறது. அதன்பிறகு, மந்திரிசபை மாற்றம் நடக்க இருக்கிறது. பிரதமருடனான முதல்வர் ஜெயலலிதாவின் சந்திப்பு மரியாதைக்குரியதாக மட்டுமே அமைவதற்கு வாய்ப்பு இருக்கிறது. இந்த சந்திப்பில், தமிழகத்திற்கு உடனடியாக தேவைப்படக் கூடிய நிதி விவரங்கள் குறித்து முதல்வர் தெரிவிக்க இருக்கிறார். தமிழக மின்வாரியத்தில் ஏற்பட்டுள்ள கடன் சுமைக்கு, மத்திய மின் தொகுப்பு நிதியில் இருந்து உதவிகளைக் கேட்க இருக்கிறார். இந்த சந்திப்பில் கூட்டணி குறித்த அறிவிப்புகள் வருவதற்கான வாய்ப்புகள் குறைவுதான்.

அடுத்து வரக் கூடிய நாட்களில், என்.டி.ஏ அமைச்சரவையில் சேருவதற்கான அறிவிப்பை முதல்வர் வெளியிடலாம். ஏனென்றால், அடுத்த மூன்று ஆண்டுகளுக்குப் பிறகுதான் நாடாளுமன்றத் தேர்தல் நடக்க இருக்கிறது. அக்டோபரில் நடக்க இருக்கும் உள்ளாட்சித் தேர்தலில் ஆளுங்கட்சி அசுர பலத்தோடு வெற்றி பெறவே முயலும். இந்தத் தேர்தலுக்கு கூட்டணிகள் அவசியமில்லை. அதற்குள், மத்திய அரசில் இணைவதாக அ.தி.மு.க அறிவித்தாலும், உள்ளாட்சி தேர்தலில் ஆளுங்கட்சிக்குப் பெரிய பிரச்னையாக இருக்காது. இந்த சட்டமன்றத் தேர்தலில்கூட சிறுபான்மையினரின் வாக்குகள் பெரும்பாலும் தி.மு.க, காங்கிரஸ் பக்கமே சென்றுள்ளன. இதைப் பற்றி ஆளுங்கட்சி பெரிதாக எடுத்துக் கொள்ளவில்லை. மத்திய அரசில் இணைவது என்பது முன்கூட்டியே எடுக்கப்பட்ட மிக முக்கியமான முடிவு. தமிழக முதல்வரின் அடுத்தடுத்த நடவடிக்கைகள் இதை உறுதிப்படுத்தும்" என்கிறார்.

முதல்வரின் டெல்லிப் பயணம் எந்த மாதிரியான விளைவுகளை உருவாக்கப் போகிறது? என்பது நாளை தெரிந்துவிடும்.

ஆ.விஜயானந்த்

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ