Vikatan.com

www.vikatan.com would like to send you push notifications.

Notifications can be turned off anytime from browser settings.

பிளஸ் 2 தேர்வு முறைகேடு... பீகார் பள்ளிக் கல்வி தேர்வு வாரிய முன்னாள் செயலர் கைது!

பாட்னா: பீகார் மாநிலத்தில் நடைபெற்ற பிளஸ் 2 தேர்வு முறைகேடு தொடர்பாக, அம்மாநில பள்ளிக் கல்வி தேர்வு வாரிய முன்னாள் செயலர் ஹரிஹர் நாத் ஜா நேற்று கைது செய்யப்பட்டார்.

பீகார் மாநிலத்தில் நடைபெற்ற பிளஸ் 2 தேர்வில் முதலாவதாக வந்த மாணவ-மாணவியர்களிடம் தனியார் தொலைக்காட்சி எடுத்த பேட்டியின்போது, ரூபி ராய் என்ற மாணவியின் பேட்டியும் பதிவு செய்யப்பட்டது.

அப்போது, ரூபி ராய் தன்னிடம் கேட்கப்பட்ட கேள்விகளுக்கு சரியான பதில்களை அளிக்காததுடன், "பொலிடிகல் சயின்ஸ்' என்ற பாடப் பிரிவை 'புரொடிகல் சயின்ஸ்' என்று முரண்பாடாக கூறினார். இதனால், பீகார் பிளஸ் 2 தேர்வில் முறைகேடு நடைபெற்றிருப்பது வெளிச்சத்துக்கு வந்து நாடு முழுவதும் பெரும் பரபரப்பை ஏற்படுத்தியது. முறைகேடு வெளிப்பட முக்கியக் காரணமாக அமைந்த மாணவி ரூபி ராயை போலீசார் சமீபத்தில் கைது செய்தனர்.

இதைத் தொடர்ந்து, இந்த சம்பவம் தொடர்பாக விசாரணை நடத்த சிறப்பு புலனாய்வுக் குழுவை அந்த மாநில அரசு ஏற்படுத்தியது. அந்தக் குழு விசாரணை நடத்தி, பீகார் மாநில பள்ளிக் கல்வி தேர்வு வாரியத் தலைவர் லால்கேஷ்வர் சிங், அவரது மனைவியும், ஐக்கிய ஜனதா தள முன்னாள் எம்.எல்.ஏ.வுமான உஷா சிங், கல்லூரி முதல்வர் பாச்சா ராய் ஆகியோரைக் கைது செய்துள்ளனர்.

இதுகுறித்து பாட்னா நகர காவல்துறை மூத்த கண்காணிப்பாளர் மனு மஹராஜ் செய்தியாளர்களிடம் கூறும்போது, ''பிளஸ் 2 தேர்வு முறைகேடு விவகாரம் குறித்து நடத்தப்பட்ட விசாரணையில், மாநில பள்ளிக் கல்வி தேர்வு வாரிய முன்னாள் செயலர் ஹரிஹர் நாத் ஜாவுக்கு தொடர்பிருப்பதற்கான ஆதாரங்கள் எங்களுக்கு கிடைத்தன. இதன் அடிப்படையில், நாத் ஜாவை சிறப்பு புலனாய்வுக் குழுவினர் (எஸ்.ஐ.டி.) இன்று (திங்கட்கிழமை) கைது செய்தனர். நாத் ஜா கைதை தொடர்ந்து, இந்த முறைகேடு சம்பவத்தில் இதுவரை கைது செய்யப்பட்டவர்களின் எண்ணிக்கை 20 ஆக அதிகரித்துள்ளது" என்றார்.

எடிட்டர் சாய்ஸ்

ஜெயலலிதா வாழ்வின் சில ‘கடைசி’கள்!

MUST READ