Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

பற்றி எரியும் கர்நாடகா...! பதற்றத்தில் தமிழர்கள்

"ச்சநீதி மன்றத்தின் தீர்ப்பு ஏமாற்றம் அளிக்கிறது. இது சட்டத்தின் வழிப்பட்ட தீர்ப்பல்ல. காவிரி நடுவர் மன்ற இறுதித்தீர்ப்பில் சொல்லப்பட்டுள்ள விதிமுறைகளின்  அடிப்படையில் தீர்ப்பு சொல்லாமல், குத்துமதிப்பாக, பஞ்சாயத்து  செய்வது போல் இத்தீர்ப்பை உச்சநீதி மன்றம் வழங்கியுள்ளது. கர்நாடகாவின் நீலிக்கண்ணீரை கண்டு மனம் உருகி, தமிழ்நாட்டிற்கு தினமும் வினாடிக்கு 15 ஆயிரம் கன அடி வீதம் 10 நாட்களுக்கு தண்ணீர்  தந்தால் போதும் என்ற ரீதியில் உச்சநீதிமன்றம் தற்போது உத்தரவிட்டுள்ளது. இது ஏற்றுக்கொள்ள முடியாத தீர்ப்பு," என தமிழக விவசாயிகள் கவலைப்பட்டுக்கொண்டிருக்க... அந்த தண்ணீரை கூட திறந்து விடக்கூடாது என அடம்பிடிக்கிறது கர்நாடகா.

காவிரி நடுவர் மன்ற இறுதித் தீர்ப்பின்படி ஆகஸ்ட் இறுதிக்குள் காவிரியில் தமிழகத்துக்கு வழங்க வேண்டிய 50.052 டிஎம்சி நீரை கர்நாடக அரசு வழங்காததையடுத்து உச்ச நீதிமன்றத்தில் தமிழக அரசு மனு தாக்கல் செய்திருந்தது. மனுவை விசாரித்த உச்ச நீதிமன்றம் “தமிழகத்துக்கு காவிரியில் வினாடிக்கு 15,000 கன அடி நீரை செப்டம்பர் 5ம் தேதி முதல் அடுத்த 10 தினங்களுக்கு கர்நாடக அரசு திறக்க வேண்டும்'' என்று உத்தரவிட்டது. இதைத் தொடர்ந்து கர்நாடக அரசு காவிரியில் வினாடிக்கு 15,000 கன அடி நீரை தமிழகத்துக்கு திறந்துவிட்டுள்ளது.

கர்நாடகாவில் பதற்றம்

தமிழகத்திற்கு சட்டப்படி பகிர்ந்தளிக்கப்பட வேண்டிய நீரை நீதிமன்றத்தின் வாயிலாக பெற்றதற்காக  இரண்டு நாட்களாக பற்றி எரிந்துகொண்டிருக்கிறது கர்நாடகம்.  தமிழகத்திற்கு தண்ணீர் திறந்துவிடக்கூடாது என்பதற்காக சாலை மறியல், கடையடைப்பு என  கர்நாடகத்தினர் கையிலெடுத்திருக்கும் போராட்டம் நாளுக்கு நாள் அதிகரித்துக்கொண்டே போகிறது. கர்நாடக முதல்வர் சித்தராமையாவை பதவி விலக சொல்கிறார்கள்... தமிழக முதல்வர் ஜெயலலிதாவின் உருவப்படத்தை கொளுத்துகிறார்கள்... பிரதமர் மோடிக்கு எதிராகவும் போராடுகிறார்கள்... உச்சநீதிமன்றத்தை சாடுகிறார்கள். தமிழகத்துக்கு தண்ணீர் திறக்க வேண்டும் என உச்சநீதிமன்றம் உத்தரவு பிறப்பித்தது துவங்கிய இந்த போராட்டம், தண்ணீர் திறப்பதாக அறிவித்ததில் உச்சம் பெற்றிருக்கிறது.

உச்ச நீதிமன்ற தீர்ப்புக்கு எதிர்ப்பு தெரிவித்தும், தமிழக அரசைக் கண்டித்தும் கர்நாடக மாநில விவசாயிகள் சங்கத்தினரும் கன்னட அமைப்புகளின் கூட்டமைப்பினரும் தெடர் போராட்டத்தில் ஈடுபட்டுவருகிறார்கள். தண்ணீர் திறந்து விடுவதாக அறிவிப்பு வெளியிட்ட அன்று, மாண்டியாவில் முழு அடைப்பு போராட்டம் நடத்தப்பட்டது. மாண்டியா மாவட்டத்தில் பள்ளி, கல்லூரிகளுக்கு வரும் 9ம் தேதி வரை விடுமுறை அறிவிக்கப்பட்டிருக்கிறது. கடைகள், வணிக வளாகங்கள், அரசு மற்றும் தனியார் அலுவலகங்கள் அடைக்கப்பட்டதால் மக்களின் இயல்பு வாழ்க்கை பாதிக்கப்பட்டது.

வாகன போக்குவரத்து நிறுத்தம்

மாண்டியாவை சேர்ந்த கன்னட ரக்ஷன வேதிகே அமைப்பினர் தமிழக முதல்வர் ஜெயலலிதாவின் உருவப்படத்தை தீயிட்டு கொளுத்தினார்கள். கர்நாடக முதல்வர் சித்தராமையா, பிரதமர் நரேந்திர மோடி, முன்னாள் அமைச்சர் அம்பரீஷ் ஆகியோரின் உருவப்படங்களையும் கொளுத்தினார்கள். அப்போது உச்ச நீதிமன்றத்துக்கு எதிராகவும், தமிழக முதல்வர் ஜெயலலிதாவுக்கு எதிராகவும் கோஷம் போட்டபடி கிருஷ்ணராஜ சாகர் அணையை நோக்கி பேரணியாகச் சென்றதால் அங்கு பலத்த பாதுகாப்பு போடப்பட்டது. மைசூருவில் காவிரியில் இறங்கி போராட சென்ற விவசாயிகளை போலீஸார் தடுத்ததால் இரண்டு விவசாயிகள் உடலில் மண்ணெண்ணெய் ஊற்றிக்கொண்டு தற்கொலைக்கு முயன்று பதற்றத்தை ஏற்படுத்தினார்கள். அணையில் குதித்து தற்கொலை செய்வோம் என மிரட்டினார்கள். அதுமட்டுமல்லாது சாம்ராஜ்நகர், ராம்நகர், பெங்களூரு ஆகிய இடங்களிலும் பெரும் போராட்டம் வெடித்தது.

போராட்டத்தால் கர்நாடகாவில் இருந்து தமிழகத்துக்கு இயக்கப்பட்ட அனைத்து அரசு மற்றும் தனியார் பேருந்துகளும்  உடனடியாக நிறுத்தப்பட்டன. தமிழகத்தில் இருந்து கர்நாடகாத்திற்கு இயக்கப்பட்ட அனைத்துப் பேருந்துகளும் தமிழக எல்லையில் நிறுத்தப்பட்டன. இதனால் ஆயிரக்கணக்கான பயணிகள் பரிதவித்துப்போனார்கள். தமிழக பதிவுஎண் கொண்ட லாரி, வேன் உள்ளிட்ட வாகனங்களும் கூட முன்னெச்சரிக்கையுடன் எல்லையிலேயே தடுத்து நிறுத்தப்பட்டன.  உச்சகட்டமாக பெங்களூரு, மைசூரு, மண்டியா உள்ளிட்ட இடங்களில் தமிழ்த் திரைப்படங்களைக்கூட  திரையிடக்கூடாது என கன்னட அமைப்பினர் கடும் எதிர்ப்பு தெரிவித்து போராட்டம் நடத்த...  உடனடியாக தமிழ்த்திரைப்படங்களின் காட்சி ரத்து செய்யப்பட்டன.

அச்சத்தில் கர்நாடகா வாழ் தமிழர்கள்

கன்னட அமைப்புகளின் கூட்டமைப்பு சார்பாக உச்ச நீதிமன்ற தீர்ப்பை எதிர்த்து வரும் 9ம் தேதி கர்நாடகாவில் முழு அடைப்பு போராட்டம் நடத்தப்படும் என அறிவிக்கப்பட்டுள்ளது. இதற்கு 700-க்கும் மேற்பட்ட அமைப்புகள் ஆதரவு தெரிவித்துள்ளன. இந்த போராட்டத்தால் கர்நாடகவாழ்  தமிழர்கள் கடும் அச்சத்திற்கு ஆளாகியுள்ளனர்.  “காவிரிப் பிரச்னையில் கர்நாடக அரசின் முடிவுக்கு கர்நாடக தமிழர்கள் தொடர்ந்து ஆதரவு கொடுத்து வருகிறோம். அப்படியிருக்கும் பட்சத்தில் தமிழர்கள் மீது தாக்குதல் நடத்துவது எங்களை வேதனைக்குள்ளாக்குகிறது பெங்களூரு,கோலார் தங்கவயல்,மாண்டியா, உள்ளிட்ட இடங்களில் வாழும் தமிழர்களுக்கு உரிய பாதுகாப்பு வழங்க வேண்டும்” என கர்நாடக அரசிடம் கோரிக்கை வைத்துள்ளார்கள் தமிழ் அமைப்பினர்.

கனத்த இதயத்துடன் தண்ணீர் திறக்கப்படுகிறது என்று இரங்கல் அறிவிப்பைப்போலத்தான் கர்நாடக முதல்வர் சித்தராமையா  தண்ணீர் திறப்பு அறிவிப்பை வெளியிட்டார். ஆனால் அதை கூட கர்நாடக மக்கள் அதை ஏற்பதாக இல்லை.  மக்கள் போராட்டங்கள் தீவிரமடைந்ததால், உடனடியாக அவசர அமைச்சரவை கூட்டம் மற்றும் அனைத்துக்கட்சி கூட்டத்தை கூட்டிவிட்டார் சித்தராமையா. அதில், நீர்வளத் துறை அமைச்சர் எம்.பி.பாட்டீல், சட்டத்துறை அமைச்சர் டி.பி.ஜெயச்சந்திரா, மத்திய அமைச்சர் சதானந்த கவுடா, முன்னாள் முதல்வர்கள் ஜெகதீஷ் ஷெட்டர், குமாரசாமி உட்பட அனைத்துக்கட்சி எம்.பி., எம்எல்ஏக்கள் பங்கேற்றனர்.

தண்ணீர் திறப்பு ஏன்? - சித்தராமையா

கூட்டத்தின் முடிவில் சித்தராமையா, ‘‘கர்நாடகாவில் இந்த ஆண்டில் பருவமழை பொய்த்ததால், அணைகளில் போதிய நீர் இருப்பு இல்லை. இருப்பினும் ஆகஸ்ட் மாதம் இறுதிவரை தமிழகத்துக்கு காவிரியில் 33 டிஎம்சி நீரை வழங்கி இருக்கிறோம். கர்நாடக அணைகளில் போதிய நீர் இல்லாததால் தமிழகத்துக்கு கூடுதலாக நீர் தர முடியாத சூழல் இருப்பதாக உச்ச நீதிமன்றத்தில் தெரிவித்தோம். கர்நாடகாவின் அனைத்து சிரமங்களும் விரிவாக எடுத்துரைக்கப்பட்டது. இருப்பினும் உச்ச நீதிமன்றம் தமிழகத்துக்கு காவிரியில் வினாடிக்கு 15 ஆயிரம் கன அடி நீர் திறக்க உத்தரவிட்டுள்ளது. தீர்ப்பை மதிக்கும் வகையில் தமிழகத்துக்கு காவிரி நீரை முறைப்படி திறந்துவிட்டுள்ளோம். அதேபோல, கர்நாடக விவசாயிகளுக்கும் பாசனத்துக்கும், குடிநீருக்கும் காவிரி நீரை திறந்துவிட முடிவு செய்துள்ளோம். எனவே கர்நாடக மக்கள் எதற்கும் கவலைப்படாமல், பொறுமையாக இருக்க வேண்டும்.  இது தொடர்பாக மறுசீராய்வு மனு தாக்கல் செய்யப்படும்," என்று மக்களுக்கு பதில் அளித்துள்ளார். இந்த அனைத்துக் கட்சிக்கூட்டம் நிச்சயம் மத்திய அரசிடம் ஒரு தாக்கத்தை ஏற்படுத்தும் என்பதில் சந்தேகம் இல்லை.

என்ன செய்யப்போகிறது தமிழகம்?

உண்மையில் காவிரி நீர் பங்கீடு விவகாரத்தில் பெரும் பாதிப்பை சந்திப்பது தமிழகம் தான். பங்கீடு அடிப்படையில் தமிழகத்துக்கு சேர வேண்டிய தண்ணீரை கர்நாடகம் வழங்கவில்லை. சட்டப்படி கொடுக்க வேண்டிய அளவில் இருந்து மிக குறைந்த அளவு தண்ணீரை தான் திறக்கச்சொல்லி இருக்கிறது. ஆனால் உரிய நீரை திறக்கக் கோரி தமிழகத்தில் மக்கள் திரள் போராட்டங்கள் நடக்கவில்லை... அனைத்துக்கட்சி கூட்டங்கள் கூட்டப்படவில்லை. சட்டத்துக்கும், விதிகளுக்கும் புறம்பான போராட்டத்தை கர்நாடகாவில் அரசியல் கட்சிகளும், அமைப்புகளும் நடத்தி வருகின்றன. அதற்கு மக்கள் பெருமளவில் திரள்கிறார்கள். சட்ட விதிகளுக்குட்பட்டு, நம் உரிமைகளை கேட்டு பெற தமிழக அரசியல் கட்சிகளும், அமைப்புகளும் ஒன்றிணைவதாக தெரியவில்லை.
இன்றும் கர்நாடகாவில் போராட்டங்கள் தொடர்கிறது. ரயிலை மறிக்கிறார்கள். பஸ்சை அடித்து உடைக்கிறார்கள். தமிழ்  சேனல்கள் ஒளிபரப்பக்கூடாது என்கிறார்கள். ஆனால் நாம் இதையெல்லாம் செய்ய வேண்டியதில்லை. செய்யவும் கூடாது. ஆனால் நம் கோரிக்கையை, நம் தேவையை நாம் ஒரே குரலில் எழுப்ப வேண்டும். முதலில் அதற்கு நாம் தயாராக வேண்டும்.

-எம்.புண்ணியமூர்த்தி

Advertisement
Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close