Vikatan.com

www.vikatan.com would like to send you push notifications.

Notifications can be turned off anytime from browser settings.

இந்தியாவின் முதல் 'டிராஃபிக்' சிக்னல் ஸ்கூல்! #TrafficSignal

டிராஃபிக் சிக்னலில் எப்படா க்ரீன் லைட் எரியும்னு நாம் காத்திருப்போம்! ஆனால் கொஞ்சம் நேரம் ரெட் லைட்டே இருக்கட்டும்னு நினைப்பவர்கள், அங்கு பிச்சை எடுப்பவர்கள். அவர்களில் பலர் சிறுவர்களாக இருப்பது பெரும் அவலம். வறுமை, பசி காரணமாக பெற்ற பிள்ளைகளையே பிச்சை எடுக்க விடுகின்றனர். (சிலர் கடத்தி வரப்பட்டு இதில் ஈடுபடுத்தப்படுகிறார்கள்) அவர்களில் சிறுவர்களைத் தவிர மற்றவர்கள் பள்ளிக்கூடத்தின் வாசலையே மிதிக்காதவர்களாக இருப்பார்கள். தற்போது நம் நாட்டில் 1.2 மிலியன் சிறுவர்கள் இன்னும் பள்ளிக்குச் செல்லாதவர்களாக உள்ளனர். இவர்கள் எல்லாம் 6 முதல் 14 வயதுக்குட்பட்டவர்கள். அந்தச் சிறுவர்கள் பள்ளிக்குச் செல்ல வேண்டும் என தோன்றுகிறது அல்லவா... ஒரு தொண்டு நிறுவனம் அதற்கான முதல் முயற்சியை எடுத்துள்ளது.

சிக்னல்களில் பிச்சை எடுக்கும், பொருட்கள் விற்கும் சிறுவர்களுக்காக Samantha Bharat Vyaspith (SBV) என்ற தொண்டு நிறுவனம் 'சிக்னல் ஷாலா' (Signal Shala) என்ற பெயரில் ஒரு பள்ளியைத் திறந்துள்ளது. இந்தியாவிலேயே பதிவு செய்யப்பட்ட முதல் டிராஃபிக் சிக்னல் ஸ்கூல் இதுதான். ''மும்பையில் உள்ள அதிக டிராஃபிக் உள்ள சிக்னல்களில் பிச்சை எடுக்கும், பொருட்களை விற்கும் சிறுவர்களைப் பற்றி சில மாதங்களில் தகவல்களைச் சேகரித்த இந்தத் தொண்டு நிறுவனம்.

''சிறுவர்களின் பெற்றோர்களைச் சந்தித்து பேசியதில் மகாராஷ்டிராவில் உள்ள வறட்சி நிலவும் கிராமங்களில் இருந்து பிழைப்புக்காக மும்பை நகரத்துக்கு வந்ததாக தெரிவித்தனர். கல்வியினால் ஏற்படும் நன்மைகளைப் பற்றி விவரித்து சிறுவர்களை படிக்கவைக்க பெற்றோர்களிடம் சம்மதம் பெற்றோம். ஆனால் அவர்கள் எளிதாக சம்மதிக்கவில்லை, பெரும் போராட்டத்தை எதிர்கொள்ள வேண்டியிருந்தது'' என்கிறனர் தொண்டு நிறுவன நிர்வாகிகள். ஷிப்பிங் கன்டெய்னர் ஒன்றை வாங்கி, மும்பையில் உள்ள 'தானே' பகுதியில் ஒரு பாலத்தின் கீழே அழகான வகுப்பறையாக மாற்றி கடந்த ஜூன் 15-ம் தேதி 'சிக்னல் ஷாலா' என்ற பெயரில் பள்ளி தொடங்கப்பட்டது.

சிக்னல்களில் இருக்கும் சிறுவர்களிடம் பேசி சமாதானம் படுத்தி, அடம் பிடித்தவர்களுக்கு விளையாட்டுப் பொருட்களை வாங்கிகொடுத்து பள்ளிக்கு அழைத்து வந்தனர். தொடக்கத்தில் ஆர்வம் காட்டமல் இருந்த சிறுவர்கள் நாளடைவில் தானாகவே ஆர்வத்துடன் பள்ளிக்கு வரத்தொடங்கினார்கள். இங்கு படிப்பு மட்டும் அல்ல; நல்ல பழக்க வழக்கங்களையும் சொல்லித் தரப்படுகிறது. பிள்ளைகளுக்கு பாடம் சொல்லித்தர முழு நேர ஆசிரியர்கள் நான்கு பேர் மற்றும் ஓர் உதவியாளர் நியமிக்கப்பட்டுள்ளனர். கன்டெய்னரில் ஃபேன் வசதியோடு கிளாஸ் ரூம், ஆசிரியர் அறை, கழிவறை எனப் பல வசதிகள் உள்ளன. மாணவர்களுக்கு மதிய உணவும் வழங்கப்படுகிறது.

தற்போது 22 மாணவர்கள் படித்துவரும் இந்தப் பள்ளியில் ஏழாம் வகுப்பு, எட்டாம் வகுப்பு வரை படித்து பாதியிலேயே நின்றுவிட்ட மாணவர்களுக்கு பாடம் எடுக்கப்பட்டு, அவர்களை பொதுத்தேர்வுக்கு அனுப்பிவைக்கப்படுகிறார்கள்.

சிக்னல் நமக்கு விழி காட்டுவதுபோல இந்த 'டிராஃபிக்' சிக்னல் பள்ளி மாணவர்களுக்கு நல்ல வழி காட்டி வருகிறது என்றால் பெருமைக்குரிய விஷயம்தானே.

-என்.மல்லிகார்ஜுனா

எடிட்டர் சாய்ஸ்

MUST READ