Vikatan.com

www.vikatan.com would like to send you push notifications.

Notifications can be turned off anytime from browser settings.

நூறு ரூபாய் காமிராவும்.. காந்தி புகைப்படமும்...! - பிறந்தநாள் சிறப்பு பகிர்வு

றைபடிந்த பற்களும், வட்டக் கண்கண்ணாடியும் மொட்டைத் தலையும் என மார்பளவு வரையிலான தனிமனித புகைப்படமாகவே பார்க்கப்பட்ட காந்தியை, தன் மனைவி கஸ்தூரிபாயின் இறந்த உடல் கிடத்தப்பட்டிருக்க அதன் அருகில் சன்னமே உருவான காந்தியாக அமர்ந்திருக்கும் ஒரு புகைப்படத்தை யாரும் அவ்வளவாகப் பார்த்திருக்க முடியாதுதான். அதுமட்டுமல்ல, காந்தி தேநீர் குடிப்பது, சபர்மதியில் கஸ்தூரிபாயுடன் அமர்ந்திருப்பது என அவரது வாழ்க்கையைச் சித்திரமாக ஆவணம் செய்தது, எப்போதுமே அவரது அருகாமையில் இருந்த அவரது பேரன் கனு காந்தியின் கேமரா.

சிறு வயதிலிருந்தே சபர்மதியில் பொழுதைக் கழித்த கனுவுக்கு, புகைப்படம் எடுப்பதில் ஆர்வமிருந்ததைப் பார்த்து, அவருக்கு ஊக்கமளித்தவர் வினோபா பாவேயின் சகோதரர் சிவாஜி பாவே. ஆனால், பொருளாதார வசதியில்லாததால் முதலில் அதற்கு ‘நோ’ சொன்னார் காந்தி. பின்னொரு நாளில் பெரும் செல்வந்தரான பிர்லா, இந்த விஷயம் அறிந்து கனு காந்தியைப் பார்க்க சபர்மதிக்கு 100 ரூபாய் ரோலிஃப்ளெக்ஸ் கேமராவுடன் வந்தார். அதன் பிறகும் ஒரு கட்டளை விதித்தார் காந்தி, “கனு! நீ படம் எடுக்கலாம். ஆனால், அதற்கான எந்தவித செலவுகளையும் ஆசிரமம் ஏற்காது. மேலும், எந்தப் புகைப்படத்திலும் ஃப்ளாஷ் இருக்கக் கூடாது” என்பதுதான் அது. அன்று தொடங்கி காந்தியின் இறப்பு முடிய அவரைப்பற்றிய உலகம் அறியாத பல பக்கங்களைப் பதிவுசெய்தார் கனு.

இத்தனைக்கும் கனுவுக்குத் தேர்ந்த பயிற்சி எதுவும் இருந்ததில்லை. அவர் எடுத்த பல புகைப்படங்களைப் பத்திரப்படுத்தி சபர்மதியில் காட்சிக்காக வைத்தனர். அதன்பிறகு, காந்தியைப் பற்றிய பல ஆவணங்களில் கனு எடுத்த படம் உபயோகிக்கப்பட்டாலும் அவருக்கான கிரெடிட் பெரும்பாலானவற்றில் தரப்பட்டதில்லை. இந்த நிலையில் அக்டோபர் 1, 2016 தொடங்கி முதன்முறையாக காந்தியைப் பற்றிய இந்த அரிய புகைப்படங்கள் சபர்மதி ஆசிரமம் தவிர்த்து வெளி நகரங்களில் காட்சிக்குவைக்கப்படுகிறது. அதன் முதற்கட்டமாக பெங்களூருவில் இருக்கும் புகைப்படங்களுக்கான லாப நோக்கமற்ற அமைப்பு ஒன்றில், இவை காட்சிக்கு வைக்கப்படுகின்றன. இதை அடுத்து கோவா, டாகா உள்ளிட்ட நகரங்களில் காட்சிக்கு வைக்கப்பட இருக்கின்றன.

‘‘சத்தியசோதனையில் கூறப்படாத காந்தியின் வாழ்க்கையைப் பிரதிபலிப்பதாக இந்தப் புகைப்படங்கள் இருக்கும்’’ என்கின்றனர் ஆர்வலர்கள்.

- ஐஷ்வர்யா

எடிட்டர் சாய்ஸ்

MUST READ