Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

இந்தியாவின் 'சர்ஜிக்கல் அட்டாக்'குக்கு உதவிய உளவாளி இவர்தான்..!

பாகிஸ்தான் தொடர்ந்து இந்தியாவைச் சீண்டி வருவதால், எல்லைப் பாதுகாப்பைப் பலமடங்கு கூட்டி, ‘எதற்கும் நாங்கள் தயார்’ என இந்தியா நெஞ்சை நிமிர்த்தி நிற்கிறது. இந்த நவீனயுகத்தில் எல்லைப் பாதுகாப்புக்குத் துப்பாக்கிகள் மட்டும் போதாது என்பதை இந்தியா உணராமல் இல்லை. இதன் விளைவு, பாகிஸ்தான் ஆக்கிரமிப்பு காஷ்மீர் பகுதியில் பயங்கரவாத முகாம்களைக் கண்காணிக்கவும், எல்லைப் பாதுகாப்புக்கும் இந்திய விண்வெளி ஆராய்ச்சி நிறுவனம் 6 செயற்கைக்கோள்களை உருவாக்கியுள்ளது.

‘Cartosat 2 C’ செயற்கைக்கோள்!

கடந்த சில நாட்களுக்கு முன்பு இந்திய ராணுவத்தினர், பாகிஸ்தானுக்குள் புகுந்து தீவிரவாத முகாம்களைத் துல்லியமாக அழித்து கெத்தாக இந்தியா திரும்பினர். தீவிரவாத முகாம்களை இந்திய ராணுவத்தினர் துல்லியமாக அழிக்க, ‘Cartosat 2 C’ என்ற செயற்கைக்கோள் உளவாளியாக இருந்து உதவியுள்ளது.   Cartosat 2 C செயற்கைக்கோளை, ஜூன் 22-ம் தேதி குஜராத் மாநிலம் அகமதாபாத் இருந்து விண்ணில் ஏவியது இஸ்ரோ.

90 நிமிடங்கள் பூமியைச் சுற்றிவரும் இந்தச் செயற்கைக்கோளால், 0.65 மீட்டரில் தெளிவான படங்களை உருவாக்க முடியும். Cartosat 2 C போன்ற ஒரு செயற்கைக்கோள் பாகிஸ்தானிடம் இல்லை. சீனாவிடம் இதுபோன்ற ஒரு செயற்கைக்கோள் இருந்தாலும், Cartosat 2 C எடுப்பதுபோல தெளிவான படங்களை எடுக்க முடியாது. Cartosat 2 C செயற்கைக்கோளால் ஒரு நிமிட வீடியோவும் எடுக்க முடியும். ஒரு விநாடிக்கு 37 கி.மீ. வேகத்தில் இந்தச் செயற்கைக்கோள் பயணித்தபோதிலும், ஒரு நிமிடத்தில் ஓர் ஒற்றைப் புள்ளியில் கவனம் செலுத்தி வீடியோ எடுக்கும் திறன்கொண்டது. இந்த உளவாளி செயற்கைக்கோள், ஒரு வீட்டில் உள்ள கார்களின் எண்ணிக்கையையும், முக்கிய இடங்களையும் தெளிவாகக் காட்டி கொடுத்துவிடும்.

GSAT-6 செயற்கைக்கோள்!

‘சர்ஜிக்கல் அட்டாக்’ என்பது குறைந்த சேதம் மற்றும் அப்பாவிகள் பாதிக்காத அளவுக்குத் துல்லியமாக இலக்கை மட்டும் தாக்குவதாகும். அதற்கு, விரிவான புலனாய்வையும் துல்லியமான தகவல்களையும் Cartosat 2 C செயற்கைக்கோள் தந்து உதவியுள்ளது. Cartosat 2 C செயற்கைக்கோள் தவிர, 2,000 கிலோ எடைகொண்ட GSAT-6 என்ற செயற்கைக்கோளும் இந்திய ராணுவத்தில் பயன்படுத்தப்படுகிறது. GSAT-6 இரண்டு திசைகளிலும் வீடியோ எடுக்கும் திறன்கொண்டது. GSAT-6 பாதுகாப்புக் கண்காணிப்பு, தீவிரவாதிகள் ஊடுருவல் தடுப்பு ஆகியவற்றுக்காகக் கடந்த ஆண்டு உருவாக்கப்பட்டது. ராணுவ வீரர் ஒருவரின் தலைக்கவசத்தில் ஒரு கேமராவைப் பொருத்தி, அந்த கேமராவை GSAT-6 உடன் இணைப்பதன் மூலம் சின்னச்சின்ன தகவல்களைச் சுலபமாகப் பெற்றுச் சேமித்துவைக்க முடியும். போரின்போது GSAT-6 சேமித்துவைத்துள்ள தகவல்கள் மூலம் ராணுவ வீரர்கள் விரைவாகப் பாதைகளைக் கண்டுபிடிக்கலாம். ஒசாமா பின்லேடனை கண்காணித்துப் பிடித்த ஆபரேஷனில், இந்தத் தொழில்நுட்பத்தை அமெரிக்கா பயன்படுத்தியிருந்தது குறிப்பிடத்தக்கது.

 

 

‘‘இஸ்ரோ நம் நாட்டின் எல்லைகளையும், இந்திய மக்களையும் பாதுகாப்பதில் பெரும் பங்காற்றி வருகிறது. இஸ்ரோவில் பணியாற்றிவரும் 17,000 பணியாளர்கள், நாட்டுக்காகப் புதிய புதிய செயற்கைக்கோள்களைக் கண்டுபிடித்து வருகின்றனர்’’ என இஸ்ரோ நிர்வாகம் பெருமையுடன் தெரிவித்திருக்கிறது.

- ஆ.நந்தகுமார்

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close