Vikatan.com

www.vikatan.com would like to send you push notifications.

Notifications can be turned off anytime from browser settings.

ராணுவத்தினர் அர்ச்சகராக இருக்கும் இமயமலை கோயில்...!

வ்வொரு மதத்துக்கும், அந்தந்த மதத்தைச் சார்ந்தவர்களே பூசாரிகளாகவும், மதபோதகர்களாகவும் இருப்பார்கள். ஆனால், இங்கே உள்ள ஓர் இந்துக் கோயிலுக்கு அனைத்து மதத்தினரும் பூசாரிகளாக இருப்பது ஆச்சர்யமாக இருக்கிறது.

சிக்கிம் மாநிலத்தில் உள்ள இமயமலை மலையில் அமைந்திருக்கும் ரம்மியமான அனுமன் கோயில் ‘அனுமன் டோக்’. இது வடக்கே சீனா, கிழக்கே நேபாள், மேற்கே பூட்டான் என இந்தியாவின் சர்வதேச எல்லைப் பகுதிகளைக் கொண்டிருக்கிறது. வருடம் முழுவதும் பக்தர்கள் வந்துகொண்டிருக்கும் இந்தக் கோயிலுக்குள் நுழைய எந்த மதப் பாகுபாடும் கிடையாது. காரணம், இந்தக் கோயிலைப் பராமரித்து, பூசாரிகளாக இருப்பது சாதி, மத பேதமில்லா இந்திய ராணுவத்தினர்.

ஒருமுறை அனுமன், ராமனின் சகோதரரான லட்சுமணனைக் காப்பாற்ற... ‘சஞ்சீவி’ மலையை எடுத்துக்கொண்டு பறந்தபோது, இந்தக் கோயில் அமைந்திருக்கும் இடத்தில் அவர், சிறிதுநேரம் தங்கியிருந்ததாகப் புராணக் கதைகள் கூறுகின்றன. அதன் நினைவாக உள்ளூர் மக்கள், ஒரு கல்லைவைத்து அனுமனை வழிபட்டு வந்தனர். பின்னர், 1950-களில் அதற்காகத் தனியாக ஒரு கோயில் கட்டப்பட்டது. அது, கடந்த 10 ஆண்டுகளாக இந்திய ராணுவத்தினரின் பராமரிப்பில் உள்ளது. உலகிலேயே மூன்றாவது உயரமான மலை என்று போற்றப்படும் இமயமலையில் உள்ள கஞ்சன்ஜங்கா சிகரத்தில், 7,200 அடி உயரத்தில் அனுமன் டோக் கோயில் வட கிழக்குக் கட்டடக் கலையுடன் அமைந்துள்ளது. மலைக் கோயிலின் அழகு, உலகம் முழுவதில் இருந்தும் பக்தர்களை ஈர்க்கிறது. இமயமலையில் இருந்து 360 டிகிரி கோணத்தில் இந்தக் கோயிலைப் பார்க்க முடியும் என்பது கூடுதல் சிறப்பு.

இந்திய ராணுவத்தில், ‘கறுப்புப் பூனை - 17’ மலைப் பிரிவில் பணியாற்றுபவர், நாகர்கோவிலைச் சேர்ந்த சஜின்குமார். பிறப்பால், இவர் ஒரு கிறிஸ்தவர். இருந்தாலும், இந்த அனுமன் கோயில் பூசாரியாகவும் அவர் உள்ளார். இந்தக் கோயிலுக்கு வரும் பக்தர்களுக்குத் திலகமிட்டு வரவேற்று, இனிப்புகள் வழங்கிவரும் அவர், ‘‘இப்போது நான் பார்க்கும் பூசாரி வேலைகளை... முன்பு, முஸ்லிம் படைவீரர் ஒருவர் செய்துவந்தார். ‘மதத்தைவிடத் தேசியவாதமே மேலானது’ என்ற தத்துவத்துடன் பணியாற்றி வருகிறோம். மற்ற மதங்களைச் சேர்ந்தவர்கள் புனிதநீர் மற்றும் பிரசாதம் வாங்கத் தயங்குவதில்லை’’ என்கிறார் உற்சாகமாய்.

மலையேற்றம் செய்பவர்களுக்கும், கோயிலுக்கு வரும் பக்தர்களுக்கும் வழிகாட்டும் பணி, புனித நீர் மற்றும் பிரசாதம் கொடுத்து வாழ்த்தும் பணி முதலியவற்றைச் சீருடை அணிந்த ராணுவ வீரர்களே செய்துவருகின்றனர்.

நாட்டு ஒற்றுமைக்கு ராணுவ வீரர்களே முதல் உதாரணம்!

- ஆ.நந்தகுமார்

எடிட்டர் சாய்ஸ்

MUST READ