Vikatan.com

www.vikatan.com would like to send you push notifications.

Notifications can be turned off anytime from browser settings.

இந்தியாவில் நடந்த 6 பிரம்மாண்ட திருமணங்கள் எது தெரியுமா?

திருமணங்கள்

பிரமாண்டமாய் திருமணம் நடத்துவதில் மிகவும் பெயர்போன நாடு இந்தியா. இங்கு திருமணங்களுக்காகச் செலவிடப்படும் தொகை மற்ற நாடுகளைவிட அதிகம். இந்தியர்கள், தங்களின் ஆடம்பரத்தைத் திருமணத்துக்காகச் செய்யும் செலவுகளில்தான் வெளிப்படுத்துவார்கள். அப்படி இந்தியாவில் நடந்த 6 பிரமாண்ட திருமணங்கள் எவை எனப் பார்ப்போம்...

ஜனார்த்தன ரெட்டி இல்ல திருமணம் - 550 கோடி ரூபாய்!

பி.ஜே.பி கட்சிப் பிரமுகரும், முன்னாள் அமைச்சருமான ஜனார்த்தன ரெட்டி, தன் மகளின் திருமண அழைப்பிதழை எல்.சி.டி வடிவில் தயாரித்ததோடு... அதில், திருமணத்துக்கு அனைவரும் வரும்படி பேசியிருந்தார். மூன்று நிமிடங்கள் ஓடும் இந்த வீடியோ சமூக வலைதளங்களில் மிகவும் வைரலாகியது. திருமணத்துக்கு பெங்களூரு அருகே 35 ஏக்கர் நிலப்பரப்பில், கன்னடத் திரைப்படங்களுக்கு கலை இயக்குநராக பணியாற்றும் சசீதர் அடபாவைக்கொண்டு, விஜயநகர ராஜ்ஜியத்தைப்போன்று செட் அமைக்கப்பட்டது. கடந்த மூன்று மாதங்களாக இதற்கான பணிகள் நடைபெற்றன. இந்தத் திருமண விழாவில் நடன நிகழ்ச்சிகளும் இடம்பெற்றன. இதில், பிரபல பாலிவுட், டோலிவுட் எனப் பல கலைஞர்கள் பங்கேற்றனர். மணப்பெண்ணின் முகூர்த்தப் பட்டின் விலை மட்டும் 8 கோடி ரூபாய் என்கிறார்கள். தங்கத்தால் சரிகை நெய்து, அதில் சிறுசிறு வைரக்கற்கள் பதிக்கப்பட்ட சேலையை மணமகள் பிராமணி அணிந்திருந்தார். மணமகனுக்கும் வைரக்கற்கள் பதித்த விலை உயர்ந்த ஆடை. 90 கோடி ரூபாய் அளவில் பெண்ணுக்கு நகைகள் சீதனமாய் வழங்கப்பட்டன. சமைக்க, உணவு பரிமாற மட்டும், 12,500 தொழிலாளர்கள் ஈடுபடுத்தப்பட்டிருந்தனர். பிரபலங்கள் பலரும் இதில் கலந்துகொண்டனர். 

ரவி பிள்ளை மகள் திருமணம் - 55 கோடி ரூபாய்!

வெளிநாட்டு வாழ் இந்தியரான ரவி பிள்ளை ஒரு தொழிலதிபர். அவர், தன் மகளின் திருமணத்துக்கு 55 கோடி ரூபாய் செலவு செய்துள்ளார். இவர், மகள் ஒரு டாக்டர். திருமணத்துக்கு 30,000 விருந்தினர்கள் வந்திருந்தனர். பிரபல நடிகை, நடிகர்கள் பங்கேற்றனர். திருமணத்துக்காக கொல்லம் ஆஷ்ரம் மைதானத்தில் 8 ஏக்கர் பரப்பளவில் 3.50 லட்சம் சதுர அடியில் பிரமாண்டமான செட் போடப்பட்டது. ‘பாகுபலி’ பிரமாண்ட செட்டிங் அமைத்து ரசிகர்களை அசத்திய ஆர்ட் டைரக்டர் சாபு சிரில், மூன்று மாத உழைப்பில் இந்த செட்டை அமைத்துக்கொடுத்தார். இந்த செட்டுக்கு மட்டும் ரூ.23 கோடி செலவாகியுள்ளது. 600 பேர் பாதுகாப்புப் பணியில் ஈடுபடுத்தப்பட்டனர். பலவிதமான உணவு வகைகள் பரிமாறப்பட்டன. இந்தத் திருமணத்தையொட்டி 10 கோடி ரூபாய் பணத்தை, புற்றுநோயால் பாதிக்கப்பட்டவர்களுக்கான அறக்கட்டளைகள் மற்றும் பல்வேறு தொண்டு நிறுவனங்களுக்கு நிதியுதவி அளித்தார் ரவி பிள்ளை. 

சஹாரா வீட்டுத் திருமணம் - 552 கோடி ரூபாய்!

2004-ம் ஆண்டு சுப்ரதா ராயின் இரு மகன்களுடைய திருமணம் நடந்தது. இது, லக்னோவில் உள்ள சஹாரா ஆடிட்டோரியத்தில் நடைபெற்றது. இவர்களின் திருமண ஆடைகளை ரோஹித் பாலா, சபயாசாஷி என்ற கலைஞர்கள் வடிவமைத்தனர். திருமண மண்டபம் முழுவதும் மெழுகு விளக்குகளாலும், விலையுயர்ந்த கண்ணாடிகளாலும் அலங்கரிக்கப்பட்டிருந்தது. 110-க்கும் மேற்பட்ட உணவு வகைகள் பரிமாறப்பட்டன. அமிதாப் பச்சன், ஐஸ்வர்யா ராய், கபில் தேவ், அனில் அம்பானி போன்ற பல பிரபலங்கள் இதில் கலந்துகொண்டனர். 

லக்ஷ்மி மிட்டல் வீட்டுத் திருமணம் - 350 கோடி ரூபாய்!

2004-ம் ஆண்டு லக்ஷ்மி மிட்டலின் மகள் வனிஷாவுக்கு திருமணம் செய்துவைக்கப்பட்டது. மாப்பிள்ளை அமிட் படியா. இது, வெர்சைல்ஸ் அரண்மனையில் மிகப் பிரமாண்டமாக நடந்த திருமண நிகழ்வாகும். இதில், ஷாருக் கான், ஐஸ்வர்யா ராய், அக்‌ஷய் குமார், சைஃப் அலி கான், ராணி முகர்ஜி போன்ற பாலிவுட் நடிகர், நடிகைகள் பங்கேற்று நடனம் ஆடினார்கள். இந்த நடனத்துக்கு ஃபரா கான் நடன இயக்குநராக இருந்தார். 

ஜி.வி.கே. குரூப் வீட்டுத் திருமணம் - 100 கோடி ரூபாய்!

ஜி.வி.கிருஷ்ணா ரெட்டியின் பேத்தி மல்லிகாவுக்கும், இந்து குரூப் சித்தார்த்துக்கும் ஹைதராபாத்தில் மிகப் பிரமாண்டமாக திருமணம் நடைபெற்றது. இதில், முன்னாள் பிரதமர் மன்மோகன் சிங் கலந்துகொண்டார். நல்ல வாசனைமிக்க மல்லிகைப் பூக்களைக்கொண்டு திருமண மண்டபம் முழுவதும் அலங்காரம் செய்யப்பட்டிருந்தது. அமிதாப் பச்சன் போன்ற பிரபலங்கள் பலரும் அந்தத் திருமணத்தில் கலந்துகொண்டனர்.

ஜெயலலிதா வளர்ப்பு மகன் சுதாகரனின் திருமணம் - 6 கோடி ரூபாய்!

ஜெயலலிதாவின் வளர்ப்பு மகன் சுதாகரனுக்கும் நடிகர் சிவாஜி கணேசனின் மகள் (சாந்தி) வயிற்றுப் பேத்தி சத்தியலட்சுமிக்கும் ஜூலை 7, 1995 அன்று திருமணம் நடைபெற்றது. இதில், பந்தல் அமைக்க மட்டுமே 5 கோடி ரூபாய் செலவிடப்பட்டுள்ளது. 2,500 வி.ஐ.பி நாற்காலிகளுக்குச் செலவான தொகை ஒரு லட்சத்து 25 ஆயிரம் ரூபாய். 10,000 சாதாரண நாற்காலிகளுக்குச் செலவான தொகை 1 லட்சத்து 50 ஆயிரம் ரூபாய். சாப்பாட்டு அறையில் 12,800 சேர்கள் போடப்பட்டு இருந்தன. அதன் செலவு ஒரு லட்சத்து 28 ஆயிரம் ரூபாய். 4,800 சமையல் மேஜைகள் போடப்பட்டு இருந்தன. அந்த நேரத்தில், 6 கோடி ரூபாய் என்பது ஒரு மிகப் பெரிய தொகை. இதில், அரசியல் தலைவர்களும், நடிகை நடிகர்களும் கலந்துகொண்டனர். 

பிரமாண்டமாய் திருமணத்தை நடத்த அதிகம் ஆர்வம் காட்டுவது பணக்காரர்களும், அரசியல்வாதிகளும் மட்டும்தான். ஆடம்பரத் திருமணங்கள்தான் ஒருவருடைய மதிப்பையும், மரியாதையையும் கூட்டும் என்ற நம்பிக்கையில், இன்றும் பலர் இரண்டு, மூன்று நாட்கள் சந்தோஷத்துக்காக பணத்தைத் தண்ணீர்போலச் செலவிடுகிறார்கள். இந்த ஆடம்பரத்தின் மீது இருக்கும் மோகம் எப்போது குறையும்??

-  நந்தினி சுப்பிரமணி

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ