Vikatan.com

www.vikatan.com would like to send you push notifications.

Notifications can be turned off anytime from browser settings.

' டினாவும்...அமீரும்!'- டெல்லியைக் கலக்கிய ஐ.ஏ.எஸ் காதல் கதை

இந்திய ஆட்சிப் பணித் தேர்வில் முதல், இரண்டாம் இடங்களைப் பிடித்தவர்கள் வாழ்விலும் ஒன்று சேர்ந்த அதிசயம் நிகழ்ந்துள்ளது. ' நாங்கள் இருவரும் வேறு வேறு சமூகத்தைச் சேர்ந்தவர்கள். எங்களின் திருமணத்துக்கு எதிராக பல விமர்சனங்கள் வந்தன' என்கின்றனர் ஐ.ஏ.எஸ் தம்பதிகள். 

புது டெல்லியைச் சேர்ந்த 22 வயதுப் பெண் டினா தபி. தலித் சமூகத்தைச் சேர்ந்த இவருக்கு சிறு வயதிலேயே ஐ,ஏ.எஸ் ஆக வேண்டும் என்பது லட்சியம். அரசியல் அறிவியல் துறையில் கல்லூரிப் படிப்பை முடித்தவுடன், உத்தரகண்ட் மாநிலத்தில் உள்ள லால் பகதூர் சாஸ்திரி தேசிய அகாடமியில் சேர்ந்தார். ஆசிரியர்களின் தொடர்ச்சியான பயிற்சியால், இரவு பகலாகப் படித்தார். கடந்தாண்டு நடந்த இந்திய ஆட்சிப் பணி தேர்வில், யாரும் எதிர்பார்க்காத வகையில் முதலிடத்தைப் பிடித்தார். இதே தேர்வில் காஷ்மீரைச் சேர்ந்த அத்தர் அமீர்-உல்-ஷஃபி கான் இரண்டாம் இடத்தில் வென்றார். காஷ்மீரில் இருந்து குறைந்த வயதில் ஆட்சிப் பணி தேர்வில் வெற்றி பெற்றிருப்பவர் என்ற பெருமைக்குரியவர் அமீர். பட்டப்படிப்பை இமாச்சல பிரதேசத்தில் இருக்கும், ஐஐடி-யில் முடித்தார். இருவருக்குள்ளும் பெரிதாக எந்த நட்பும் இல்லை. ஆட்சிப் பணித் தேர்வின் நேர்காணலின்போதும் இவர்கள் சந்தித்துக் கொள்ளவில்லை. ஆனால், எதிர்பாராதவிதமாக மத்திய அரசு நடத்திய ஐ.ஏ.எஸ் தேர்வில் வெற்றி பெற்றவர்களுக்கான பாராட்டு விழாவில் டினாவை சந்தித்தார் அமீர். பாராட்டு விழா முடிவதற்குள்ளாகவே டினாவிடம் காதலைச் சொல்லிவிட்டார். தொடக்கத்தில், அமீரின் காதலைப் புறம்தள்ளிவிட்டார். ஆனாலும், டினாவை விடாமல் துரத்தினார். கடந்த ஆகஸ்ட் மாதம் அமீர் மீது காதல் வயப்பட்டார் டினா. தங்களுடைய காதலைப் பற்றி இருவரும் ஃபேஸ்புக்கில் பதிவிட்டனர். வடஇந்திய ஊடகங்களும் ஐ.ஏ.எஸ் காதல் ஜோடியைப் பற்றி செய்திகள் வெளியிட்டன. 

" எங்கள் காதலைப் பற்றி சமூக வலைத்தளத்தில் பகிர்ந்து கொண்டோம். நானும் அமீரும் எடுத்துக் கொண்ட புகைப்படங்களையும் வெளியிட்டோம். தொடக்கத்தில், எதிர்மறையான கமெண்டுகள் வந்து கொண்டிருந்தன. சாதிரீதியாக சிலர் விமர்சித்தனர். வேறு சிலர் இடஒதுக்கீட்டோடு என்னுடைய தேர்வு வெற்றியை சம்பந்தப்படுத்தி பதிவிட்டனர். வேறு மதத்தைச் சேர்ந்த நபரைக் காதலிப்பதே குற்றம் என்பதுபோல் சிலர் கடுமையான விமர்சனம் செய்தார்கள். இதனால் கடுமையான மனஉளைச்சலுக்கு ஆளாக வேண்டியிருந்தது. ஒருகட்டத்தில், நாங்கள் சம்பந்தப்பட்ட பதிவுகளைப் போடுவதையே நிறுத்திக் கொண்டோம். ஒட்டுமொத்த சமூக வலைத்தளத்தில் இதுபோன்று எதிர்மறையாக விமர்சனம் செய்பவர்கள் ஐந்து சதவீதத்துக்கும் குறைவானவர்கள்தான். மற்றவர்கள், எங்கள் காதலின் உன்னதத்தைப் புரிந்துகொண்டு வாழ்த்தினார்கள்" என நெகிழ்கிறார் டினா தபி ஐ.ஏ.எஸ். 

இந்திய குடிமைப்பணி தேர்வில் தலித் சமூகத்தைச் சேர்ந்த பெண் ஒருவர், முதல் இடம் பிடித்திருப்பதை மனித உரிமை ஆர்வலர்கள் பெரிதும் வரவேற்கின்றனர். ' டினாவை முன்மாதிரியாக எடுத்துக் கொண்டு படிக்க வேண்டும்' என பலரும் சமூக வலைத்தளங்களில் பதிவிட்டு வருகின்றனர். இதற்குப் பதில் கூறும் டினா தபி, ' முன்மாதிரி என்று சொல்லும் அளவுக்கெல்லாம் நான் சாதிக்கவில்லை. இப்போதுதான் தேர்வில் வெற்றி பெற்றுள்ளேன். இன்னும் சாதிக்க வேண்டியது எவ்வளவோ இருக்கிறது' என்கிறார் பணிவோடு. 

ஐ.ஏ.எஸ் வெற்றி ஒருபுறம், காதல் வெற்றி மறுபுறம் என உற்சாகத்தில் இருக்கின்றனர் டினாவும் அமீரும். எளிய மக்களின் உள்ளங்களையும் அவர்கள் கொள்ளையடிக்கட்டும்...! 
 

- பரத் ராஜ்

எடிட்டர் சாய்ஸ்

அப்போலோ டூ எம்.ஜி.ஆர் சமாதி... ஜெயலலிதாவுக்கு அரண் அமைத்த மன்னார்குடி!

MUST READ