Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

சீனாவுக்கு மறுப்பு தெரிவித்த இலங்கை! இந்தியாவின் வியூகத்துக்கான வெற்றியா?

2014-ம் ஆண்டு நவம்பர் மாதம், சீன அதிபர் இலங்கை சென்றுவந்த சில வாரங்களில், சீனாவின் நீர்மூழ்கிக் கப்பல் இலங்கையின் கொழும்பு துறைமுகத்தில் நங்கூரமிடப்பட்டது. சீனாவின் அணுசக்தியில் இயங்கக்கூடிய நீர்மூழ்கிக் கப்பலை கொழும்பில் நிறுத்த அப்போதைய அதிபர் மஹிந்தா ராஜபக்‌ஷே அனுமதியளித்தார். இலங்கையில், சீனாவின் நீர்மூழ்கிக் கப்பல் நங்கூரமிடப்படுவது அது முதல் முறையல்ல... சீனா தன்னிடமுள்ள அணுசக்தி மற்றும் டீசலில் இயங்கும் நீர்மூழ்கிக் கப்பல்களை அவ்வப்போது இலங்கையில் நிறுத்துவது தொடர்கதையாக இருந்தது. இந்தியா பலமுறை எச்சரித்தும் இலங்கை அதைப் பொருட்படுத்தியதே இல்லை. 

சீனா நீர்மூழ்கி கப்பலுக்கு இலங்கை நோ சொன்னது.

"நீர்மூழ்கிக் கப்பலிலுள்ள வீரர்களுக்குத் தேவையான உணவு உள்ளிட்ட பொருள்களை நிரப்பவும், கப்பலுக்கு எரிபொருள் நிரப்பவுமே நீர்மூழ்கிக் கப்பல் கொழும்புவுக்கு வந்தது எனவும், நல்லெண்ண அடிப்படையில் சீனாவின் கப்பல் பல உலக நாடுகளுக்குச் செல்வது வழக்கமானதுதான் எனவும் இதைக் கண்டு இந்தியா கவலைப்படத் தேவையில்லை" எனவும் சீனா தரப்பில் தெரிவிக்கப்பட்டது. 

இந்தியாவுக்கும் சீனாவுக்கும் பல ஆண்டுகளாக எல்லைப் பிரச்னை நிலவுகிறது. நண்பன் என்று சொல்லிக்கொண்டு ஒருமுறை இந்தியா மீது போர்த்தொடுத்திருக்கிறது. அப்போது, கைப்பற்றிய நிலப்பரப்பையும் மீண்டும் ஒப்படைக்கவில்லை. தொடர்ந்து இந்தியாவுக்கு எதிரான போக்கையே சீனா கடைப்பிடித்து வருகிறது. பாகிஸ்தான், இலங்கை, வங்கதேசம் என இந்தியாவின் அண்டை நாடுகளுக்கு உதவுவதன் மூலம் இந்தியாவைத் தனிமைப்படுத்தும் முயற்சியில் சீனா இறங்கியது. இலங்கையில் ஆதிக்கத்தை அதிகரிப்பதன் மூலம், தென் பகுதியில் இருந்தும் இந்தியாவுக்குத் தொல்லைகொடுக்க சீனா நினைக்கிறது.

மேலும், கச்சா எண்ணெய் உள்ளிட்ட வணிகக் கப்பல்கள் அனைத்தும் இந்தியப் பெருங்கடலைக் கடந்தே சீனாவுக்குச் செல்ல வேண்டியுள்ளது. இந்தியப் பெருங்கடல் பகுதியில் ஆதிக்கம் செலுத்துவதன் மூலம் தன்னுடைய வர்த்தகம் தங்குத்தடையின்றி நடக்கும், இந்தியாவும் அஞ்சும் என சீனா நினைக்கிறது. இதனால் இலங்கையில், விமானநிலையம், ரயில்பாதை, துறைமுகம் மற்றும் சாலைகள் அமைக்க சீனா அதிகம் முதலீடு செய்துள்ளது. குறிப்பாக, இலங்கையின் தென் முனையில் உள்ள ஹம்பன்தோட்டா துறைமுகத்தை முழுக்கமுழுக்க சீனா கட்டிக்கொடுத்திருக்கிறது. 

இதன் அடிப்படையில், வளைகுடா மற்றும் சோமாலியா கடற்படை, இந்தியப் பெருங்கடல் பகுதியில் ரோந்துசெல்லும் தன்னுடைய நீர்மூழ்கிக் கப்பல்களை இலங்கையின் கொழும்பு துறைமுகத்தில் நிறுத்தி மறைமுகமாக இந்தியாவுக்கு எச்சரிக்கை கொடுப்பது சீனாவின் வழக்கம். பல ஆண்டுகளாக இது நடந்துகொண்டுதான் இருக்கிறது. இந்தியா தன்னுடைய கவலையைத் தெரிவித்தாலும் இலங்கை அதைப் பொருட்படுத்துவதில்லை. அதிலும், மஹிந்தா ராஜபக்‌ஷே ஆட்சிக் காலத்தில் பலமுறை சீனாவின் நீர்மூழ்கிக் கப்பல்கள் இலங்கையில் நிறுத்திவைக்கப்பட்டிருக்கின்றன. 

இந்நிலையில், 2014-ல் ஆட்சி மாற்றம் ஏற்பட்டது. வழக்கம்போல சீனாவின் நீர்மூழ்கிக் கப்பலை நிறுத்த அனுமதி அளித்தது ராஜபக்‌ஷே அரசு. ஆனால், இந்த முறை இந்தியாவிடமிருந்து மிகக் கடுமையான எதிர்ப்புக் கிளம்பியது. "இந்தியா - சீனா இடையே எல்லை தொடர்பான பிரச்னை உள்ள நிலையில், இந்தியப் பெருங்கடலில், இந்தியாவுக்கு அருகே சீனாவின் நீர்மூழ்கிக் கப்பலை நிறுத்துவதை ஏற்றுக்கொள்ள முடியாது" என்று இந்தியா தன்னுடைய அதிருப்தியை வெளிப்படுத்தியது. "இலங்கையில், திரிகோணமலை அல்லது வேறு எந்த ஒரு பகுதியிலும் வேறு எந்த ஒரு நாட்டின் ராணுவச் செயல்பாட்டுக்கும் அனுமதியளிப்பது இந்தியாவின் நலனுக்கு எதிரானது" என்று இந்தியா - இலங்கை 1987 ஒப்பந்தம் கூறுகிறது. சீனாவின் நீர்மூழ்கிக் கப்பலுக்கு அனுமதி அளிப்பதன் மூலம் இந்த ஒப்பந்தத்தை இலங்கை மீறுவதாக இந்தியா தன்னுடைய கண்டனத்தில் தெரிவித்திருந்தது. இதன்பிறகு, இலங்கையின் நடவடிக்கையில் சில மாற்றங்கள் உருவாயின.

சீனா போர்க் கப்பல்

தற்போது வரும் வாரத்தில் தன்னுடைய நீர்மூழ்கிக் கப்பலை கொழும்புவில் நிறுத்த சீனா அனுமதி கேட்டது. இந்தியப் பெருங்கடல் பகுதியில் பயணிக்கும் தன்னுடைய நீர்மூழ்கிக் கப்பலுக்குத் தேவையான எரிபொருளை நிரப்பவும், வீரர்களுக்குத் தேவையான உணவு உள்ளிட்ட பொருள்களை எடுத்துச்செல்லவும் அனுமதிக்க வேண்டும் என்று சில வாரங்களுக்கு முன்பாகவே சீனா கோரிக்கை விடுத்திருக்கிறது. மோடி இலங்கைக்குச் சென்றுள்ள நிலையில், இந்த முறை சீனாவுக்கு அனுமதி அளிக்க இலங்கை மறுத்துவிட்டதாகச் செய்திகள் வெளியாகியுள்ளன. 

தெற்காசிய பிராந்தியத்தில், இலங்கை, வங்கதேசம் உள்ளிட்ட நாடுகளைத் தொடர்ந்து தன்னுடைய நட்பு நாடாக வைத்திருக்க மோடி தலைமையிலான அரசு முயற்சிகள் மேற்கொண்டு வருகிறது. இதற்காக, போட்டிபோட்டுக்கொண்டு நலத்திட்ட உதவிகள், மிகக் குறைந்த வட்டியில் கடனுதவி உள்ளிட்டவற்றை அண்டை நாடுகளுக்கு அளித்துவருகிறது. இந்தியா மேற்கொண்டுள்ள இந்த ராஜதந்திர நடவடிக்கையின் காரணமாகவே தற்போது சீனாவுக்கு இலங்கை 'நோ' சொல்லியுள்ளதாக ராணுவ வியூக ஆய்வாளர்கள் கருத்துத் தெரிவித்துள்ளனர்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close