Vikatan.com

www.vikatan.com would like to send you push notifications.

Notifications can be turned off anytime from browser settings.

போலி கூகுள் தளத்தின் போற்றத்தக்க சேவை!

பொய்மையும் சில நேரங்களில் நன்மை பயக்கும் என்பதற்கு ஏற்ப தேடியந்திரமான கூகுள், புதிய சேவையை அறிமுகம் செய்திருப்பது போன்ற தோற்றத்தை தரும் வகையில் அமைக்கப்படுள்ள போலி இணையதளம்,  ஐரோப்பாவை உலுக்கி கொண்டிருக்கும் அகதிகள் நெருக்கடி பற்றிய விழிப்புணர்வை ஏற்படுத்தும் வகையில் அமைந்துள்ளது.

உங்கள்  எதிர்காலத்தை அறிய வேண்டுமா? எனும் கேள்விக்கு பதில் அளிப்பது போன்ற இணையதளம் ஒன்று இணைய உலகில் அறிமுகமாகி, கவனத்தை ஈர்த்துள்ளது. புகழ் பெற்ற தேடியந்திரமான கூகுள் போன்ற தோற்றத்துடன், கூகுள் ஜோதிடம் எனும் பெயரில் அந்த இணையதளம் அமைந்துள்ளது.

அதில் உள்ள தேடல் கட்டத்தில் எதிர்காலம் பற்றிய கேள்விகளை டைப் செய்யலாம். ஆனால் எதிர்காலம் பற்றிய ஆருடம் வருவதற்கு பதில், நிச்சயம் எங்களால் உங்கள் எதிர்காலத்தை கணிக்க முடியாது என குறிப்பிடப்பட்டுள்ளது.

அதற்கு கீழே, 60 மில்லியன் அகதிகள் தங்களுக்கு எதிர்காலம் உண்டா எனும் கேள்வியை தினமும் கேட்டு வருகின்றனர். எனவேதான் போலி கூகுள் தளத்தை பயன்படுத்தி, உங்கள் கவனத்தை அகதிகள் பிரச்னை பக்கம் ஈர்க்க முயன்றிருக்கிறோம் என குறிப்பிடப்பட்டு, அகதிகள் எதிர்காலம் குறித்து ஒரு நிமிடமாவது யோசிக்குமாறு வேண்டுகோள் விடுக்கப்பட்டுள்ளது.


அகதிகள் பிரச்னை குறித்து விழிப்புணர்வை ஏற்படுத்தும் வகையில் அமைக்கப்பட்டுள்ள இந்த இணையதளம், அகதிகளுக்கு நிதி உதவி அளிக்கவும் வழி செய்துள்ளது. அதோடு ஒவ்வொரு நிமிடமும் அதிகரித்துக்கொண்டிருக்கும் அகதிகள் எண்ணிக்கையும் குறிப்பிடப்படுகிறது. அகதிகளின் பரிதவிப்பை உணர்த்தும் புகைப்படங்கள் மற்றும் வீடியோ காட்சிகளுக்கான இணைப்பும் கொடுக்கப்பட்டுள்ளன.

கூகுள் போலவே தோற்றம் அளிக்கும் இந்த இணையதளம் முதலில் கவனத்தை ஈர்த்த போது, கூகுள் சார்பாக இந்த இணையதளம் அமைக்கப்பட்டதாக பலரும் கருதினர். ஆனால் இது நெதர்லாந்தை சேர்ந்த பிரைன் மீடியா எனும் விளம்பர நிறுவனம் ஒன்றின் சார்பாக நல்ல நோக்கத்துடன் அமைக்கப்பட்ட போலி இணையதளம் என தெரியவந்துள்ளது.

இரண்டாம் உலகப்போருக்கு பிறகு உலகம் சந்திக்கும் மிகப்பெரிய மனிதநேய நெருக்கடி என குறிப்பிடப்படும் இந்த அகதிகள் நெருக்கடியின் நிலை குறித்து, கவனத்தை ஈர்க்கும் வகையில் இந்த புதுமையான முயற்சி அமைந்துள்ளது.

இணையதள முகவரி: http://betagoogle.com/refugees.html

 

- சைபர் சிம்மன்

 

எடிட்டர் சாய்ஸ்

MUST READ