Vikatan.com

www.vikatan.com would like to send you push notifications.

Notifications can be turned off anytime from browser settings.

புகைப்படத்தில் கண்ணாமூச்சி காட்டும் ஸ்டெகனோகிராஃபி (கம்ப்யூட்ராலஜி – 8 )

 

                                                                                                    

சுமார் 10 வருடங்களுக்கு முன்னர் என்னுடைய நிறுவனத்தில் நடந்த சுவையான நிகழ்ச்சி. சரஸ்வதி பூஜை, ஆயுத பூஜை என தொடர்ச்சியாக மூன்று நாட்கள் விடுமுறை. ஒரு முக்கியமான புராஜெக்ட் நடந்துகொண்டிருந்தது. புரோகிராமர்கள் அனைவரும் புராஜெக்ட்டை முடித்து அதை இம்ப்ளிமென்டேஷனுக்குத் தயார் நிலையில் வைத்துவிட்டுச் சென்றிருந்தார்கள். அதன் தொடர்பாகச் சில விஷயங்களை தொகுத்து, டாக்குமெண்டேஷன் தயார் செய்துவிடலாம் என நினைத்து நான் மட்டும் அலுவலகம் சென்றிருந்தேன்.

ஒரு புரோகிராமரின் கம்ப்யூட்டரில் ஒரு பெண்ணின் புகைப்படம். கிளிக் செய்தபோது அது போட்டோஷாப்பிலோ அல்லது பெயின்ட் சாஃப்ட்வேரிலோ திறக்காமல் நோட்பேடில் திறந்தது. திரை முழுவதும்  எண்களும், எழுத்துக்களும், சிறப்புக் குறியீடுகளுமாய் சிதறின.


படம் – A


 

நாம் கம்ப்யூட்டரில் புகைப்படங்களை கிளிக் செய்து பார்க்கும்போது, அவை போட்டோஷாப், பெயின்ட் போன்ற எந்த சாஃப்ட்வேரில் திறக்க வேண்டும் என்று நாம் ‘செட்’ செய்து வைத்துக் கொள்ள முடியும். அந்த புகைப்படத்தை நோட்பேடில் திறக்குமாறு  ‘செட்’ செய்து வைத்திருந்தார் அந்த புரோகிராமர்.

எனவே நான் அந்தப் புகைப்படத்தை கிளிக் செய்தவுடன் அது சட்டெனெ நோட்பேடில் திறந்து கொண்டது.
என் படிப்பு, பணி, தொழில் என என் சுவாசமே தொழில்நுட்பம் என்பதால் நோட்பேடில் ஸ்குரோல் செய்து கடைசி வரை சென்றேன். அங்கு Dear Subashini… என்று தொடங்கி அந்த புரோகிராமர் தன் காதலிக்கு ஆங்கிலத்தில் எழுதிய காதல் கடிதம் 4 வரிகளில் பளிச்சென என் கண்களில்பட்டது.

சிரித்துக்கொண்டே அந்த ஃபைலை போட்டோஷாப்பில் திறக்குமாறு சேவ் செய்து விட்டு என் வேலைகளை முடித்துக்கொண்டு கிளம்பினேன்.

விடுமுறை முடிந்து அலுவலகம் வேலையில் சுறுசுறுப்பானது. சுபாஷினியின் சொந்தக்காரன் பாஸ்கரை என் அறைக்கு கூப்பிட்டு அனுப்பினேன்.

லேப்டாப்பில் இருந்து கண்களை எடுக்காமலேயே, ‘சுபாஷினி எப்படி இருக்கிறாள்?’ என்று விசாரித்தேன்.
‘மேம்…. சு.பா.ஷி.னி… எந்த சுபாஷினி…’ என குழப்பத்துடன் கேட்ட பாஸ்கரின் முகத்தில் தெரிந்த பதட்டத்தை ரசிப்பதற்காக தலையை நிமிர்த்தினேன். ஏசியில் வியர்த்திருந்தார்.

நான் அவளை ‘நோட்பேட்’-ல் சந்தித்த விவரம் சொன்னேன். கல்லூரி நாட்களில் இருந்து 5 வருட காதல் என்று சொன்னார். ‘இமெயில் அனுப்பி விட்டு டெலிட் செய்ய நினைத்தேன். ஊருக்குச் செல்லும் அவசரத்தில் மறந்து விட்டேன்…’ குரலில் நடுக்கம்.

தொழில்நுட்பத்தை காதல் கடிதம் எழுதப் பயன்படுத்தி, எதையும் வித்தியாசமாகச் செய்யும் இயல்புடைய அந்த வல்லுநரை பாராட்டுவதா அல்லது அலுவலக கம்ப்யூட்டரில், அலுவலக நேரத்தில் காதல் கடிதம் எழுதியதற்காக திட்டுவதா என புரியாமல், இனி அலுவலக நேரத்தையும், அலுவலக கம்ப்யூட்டரையும் இதுபோன்ற சொந்தப் பயன்பாட்டுக்காக உபயோகிக்கக்கூடாது என்றும் அறிவுறுத்தி அனுப்பி வைத்தேன்.

தவறுக்கு தண்டனை இல்லாமலா? ‘விரைவில் அப்பா, அம்மா சம்மதத்துடன் அவரது திருமணப் பத்திரிகையை அனுப்ப வேண்டும்’ என்ற  தண்டனையையும் கொடுத்தனுப்பினேன்.   

என்னுடைய புரோகிராமர் பயன்படுத்திய தொழில்நுட்பத்துக்குப் பெயர் ‘ஸ்டெகனோகிராஃபி’. 

ஸ்டெகனோகிராஃபி என்றால் என்ன?

எழுத்துக்களை புகைப்படத்திலோ, ஆடியோ, வீடியோ ஃபைல்களிலோ மறைத்து வைக்கும் முறைக்கு ஸ்டெகனோகிராஃபி என்று பெயர்.

ஆடியோ, வீடியோ ஃபைல்களில் இதுபோன்ற ரகசிய தகவல்கள் மறைத்து அனுப்பி வைக்கப்படுவதைவிட புகைப்படங்களில்தான் அதிகம் அனுப்பி வைக்கப்படுகின்றன. இன்டர்நெட்டில் குவிந்துகிடக்கும் தகவல்களில் புகைப்படங்கள்தான் அதிகம் இடம்பெறுகின்றன. காரணம் சுலபமாக விரைவில் அப்லோட் செய்யலாம், டவுன்லோட் செய்யலாம். ஃபைலின் அளவும் சிறியதாக இருக்கும். 

ஸ்டெகனோகிராஃபி-க்கு உதவும் சாஃப்ட்வேர்களும், ஆப்ஸ்களும்…

ஸ்டெகனோகிராஃபி முறையில் தகவல்களை ரகசியமாக புகைப்படங்களிலும், ஆடியோ, வீடியோ ஃஃபைல்களிலும் மறைத்து வெளிப்படுத்தவும், மற்றவர்களுடன் ஷேர் செய்துகொள்ளவும் ஏராளமான சாஃப்ட்வேர்களும், ஆப்ஸ்களும் உள்ளன.

உதாரணத்துக்கு, விண்டோஸ் ஆப்பரேட்டிங் சிஸ்டத்தில் பயன்படக்கூடிய  ஸ்டெகனோகிராஃபி சாஃப்ட்வேர்கள் சில...
QuickStego
OpenStego
SilentEye
OpenPuff
Shusssh!
Steganofile
DeEgger Embedder
Steg
Portable SteganoG


எந்த சாஃப்ட்வேரைப் பயன்படுத்திப் புகைப்படத்துக்குள் தகவலை ஒளித்து அனுப்பினோமோ, அதே சாஃப்ட்வேர் அந்தப் புகைப்படத்தை பெற்றுக்கொண்டவரின் கம்ப்யூட்டரிலும் இருக்க வேண்டும். அப்போதுதான் அந்தப் புகைப்படத்துக்குள் மறைந்திருக்கும் தகவலை அவரால் கண்டுபிடிக்க முடியும்.

QuickStego சாஃப்ட்வேர் மூலம் புகைப்படத்துக்குள் தகவலை ஒளித்து வைக்கும் முறை

1. QuickStego என்ற சாஃப்ட்வேரை இன்டர்நெட்டில் இருந்து டவுன்லோட் செய்துகொண்டு, கம்ப்யூட்டரில் இன்ஸ்டால் செய்துகொள்ள வேண்டும். பிறகு இதை இயக்கிக்கொள்ள வேண்டும்.


2. இப்போது QuickStego - Steganography – Hide a secret text message in an image என்ற தலைப்பில் விண்டோ ஒன்று கிடைக்கும். இதில் கீழ்க்காணுமாறு புகைப்படம் மற்றும் தகவல் அடங்கிய ஃபைலை திறந்துகொள்ள வேண்டும்.

           a. Open Image: என்ற பட்டனை கிளிக் செய்து தேவையான புகைப்பட ஃபைலை தேர்ந்தெடுத்துக் கொள்ள வேண்டும். உதாரணத்துக்கு இங்கு நம் கம்ப்யூட்டரின் டெஸ்டாப்பில் உள்ள Bird.Jpg என்ற இமேஜ் ஃபைலை திறந்து கொண்டுள்ளோம்.

          b. Open Text: என்ற பட்டனை கிளிக் செய்து தேவையான தகவல் அடங்கிய ஃபைலை திறந்து கொள்ள வேண்டும். உதாரணத்துக்கு இங்கு நம் கம்ப்யூட்டரின் டெஸ்டாப்பில் உள்ள Good.txt என்ற டெக்ஸ்ட் ஃபைலை திறந்து கொண்டுள்ளோம்.



               c. Hide Text: என்ற பட்டனை கிளிக் செய்து தகவலை படத்துக்குள் மறைக்க வேண்டும்.

              d. Save Image: என்ற பட்டனை கிளிக் செய்து தகவலை ஒளித்து வைத்த படத்தை அதே பெயரிலோ அல்லது வேறு பெயரிலோ சேவ் செய்துகொள்ள வேண்டும். உதாரணத்துக்கு இங்கு Bird-1 என்ற பெயரில் இமேஜ் ஃபைலை சேவ் செய்துகொண்டுள்ளோம்.

3. இப்போது Bird.JPG என்ற இமேஜ் ஃபைலில், Good.Txt என்ற டெக்ஸ்ட் ஃபைலில் உள்ள தகவல்கள் மறைத்து ஒளித்து வைக்கப்பட்டு, Bird-1.BMP என்ற பெயரில் பதிவாகிவிடும். பிறகு EXIT பட்டனை கிளிக் செய்து, QuickStego என்ற சாஃப்ட்வேரில் இருந்து வெளியேறிவிடலாம்.



4. இப்போது Bird1.JPG என்ற இமேஜ் ஃபைலை நாம் யாருக்கு அனுப்ப வேண்டுமோ அவருக்கு இமெயில் மூலம் அனுப்பலாம் அல்லது வேறு எந்த சமூக வலைதளம் மூலமாகவும் அனுப்பிக்கொள்ளலாம். அவரிடம் இதே QuickStego சாஃப்ட்வேர் இருந்தால் மட்டுமே புகைப்படத்துக்குள் உள்ள ரகசிய வார்த்தைகளை அவரால் தெரிந்து கொள்ள முடியும்.

நம் கம்ப்யூட்டரில் பதிவாகியுள்ள Bird-1.BMP என்ற ஃபைலை QuickStego என்ற சாஃப்ட்வேரில் திறந்து பார்த்தால் அந்த புகைப்படத்துக்குள் ஒளித்துவைக்கப்பட்ட தகவல்கள் வெளிப்படுவதைக் காணலாம்.



சாஃப்ட்வேர் இல்லாமலேயே தகவல்களை ஒளித்து வைக்கும் முறை

 

 


1. தேவையான புகைப்பட ஃபைலையும், தகவல் அடங்கிய ஃபைலையும் தயார் நிலையில் வைத்துக்கொள்வோம். உதாரணத்துக்கு, இங்கு டாக்டர் அப்துல்கலாம்  புகைப்படத்தை Kalam.JPG என்ற இமேஜ் ஃபைலிலும், ‘Dream, Dream, Dream’ என்ற அவரது வலியுறுத்தலை Quote.Txt என்ற டெக்ஸ்ட் ஃபைலிலும் தயார் நிலையில் D என்ற டிரைவில் வைத்துக்கொள்ளலாம்.



2. Start பட்டனை கிளிக் செய்து சர்ச் பாரில் CMD என்று டைப் செய்து Command Prompt என்ற விண்டோவை வெளிப்படுத்திக்கொள்ளலாம். அல்லது Start > Accessories > Command Prompt என்ற விவரத்தை கிளிக் செய்தும் Command Prompt என்ற விண்டோவை வெளிப்படுத்திக்கொள்ளலாம்.

 

 

3. இந்த Command Prompt விண்டோவில், பொதுவாக விண்டோஸில் மவுஸை கிளிக் செய்து நாம் முடிக்கின்ற பணிகளை,  கட்டளைகளாக (Commands) டைப் செய்து முடிக்க முடியும்.


4. இந்த விண்டோவில் D: (D மற்றும் கோலன் இரண்டையும் டைப் செய்ய வேண்டும்) என்ற டிரைவின் பெயரை டைப் செய்துகொள்ள வேண்டும். ஏன் எனில் நாம் D டிரைவில்தான் ஃபைல்களை வைத்துள்ளோம். இப்போது D டிரைவ் வெளிப்படும். இப்போது Copy /b Kalam.Jpg + Quote.txt KalamPhoto.Jpg என டைப் செய்துகொள்ள வேண்டும். உடனடியாக Kalam.Jpg என்ற இமேஜ் ஃபைலில், Quote.txt என்ற டெக்ஸ்ட் ஃபைலில் உள்ள தகவல் ஒளித்து வைக்கப்பட்டு KalamPhoto.JPG இமேஜ் ஃபைலாக காப்பி செய்யப்படும். இப்போது Command Prompt விண்டோவில் இருந்து வெளியே வந்துவிடலாம்.


5. விண்டோஸில் D டிரைவுக்குச் சென்றுபார்த்தால் KalamPhoto.JPG என்ற இமேஜ் ஃபைல் உருவாகி இருப்பதைக் காணலாம்.


6. அந்த இமேஜ் ஃபைலை NOTE PAD சாஃப்ட்வேரில் திறந்து பார்த்தால் அதில் எழுத்துக்களும், எண்களும் தாறுமாறாக வெளிப்படும். அதன் அடியில் கடைசியாக Quote.txt என்ற டெக்ஸ்ட் ஃபைலில் நாம் டைப் செய்திருந்த ரகசிய தகவலான Dream, Dream, Dream என்பது  இணைந்திருப்பதைக் காணலாம்.


குறிப்பு


ஸ்டெகனோகிராஃபி முறையில் தகவல்களை ரகசியமாக வெளிப்படுத்த ஏராளமான சாஃப்ட்வேர்களும், ஆப்ஸ்களும் உள்ளன. இங்கு உதாரணத்துக்கு, QuickStego என்ற ஸ்டெகனோகிராஃபி சாஃப்ட்வேரை விளக்கியுள்ளேன். ஸ்டெகனோகிராஃபி செய்ய எந்த சாஃப்ட்வேரைப் பயன்படுத்துகிறோமோ, அதே சாஃப்ட்வேரைப் பயன்படுத்தித்தான் ஃபைலில் உள்ள ரகசிய தகவலை படிக்க முடியும்.
எனவே, சாஃப்ட்வேர் இல்லாமலும் ஸ்டெகனோகிராஃபி செய்யும் முறையை விளக்கி உள்ளேன்.

Disclaimer


இந்தக் கட்டுரையில் பயன்படுத்தியுள்ள சாஃப்ட்வேரின் தயாரிப்பாளர்களுடைய விதிமுறைகளுக்கு உட்பட்டு இந்தக் கட்டுரை தயார் செய்யப்பட்டுள்ளது. வெப்சைட்டிலும், சாஃப்ட்வேரிலும், கட்டணத்திலும் அவர்கள் எப்போது வேண்டுமானாலும் மாற்றங்கள் செய்யலாம் என்பதை நினைவில் கொள்ளவும். 

-காம்கேர் கே. புவனேஸ்வரி

 

முந்தைய தொடர்களைப் படிக்க...

 

                                                                                                        

 

 

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ