Vikatan.com

www.vikatan.com would like to send you push notifications.

Notifications can be turned off anytime from browser settings.

பறக்கும் கேமரா அறிமுகம்!

க்சிஸ் விடியஸ் நிறுவனம் உலகிலேயே மிகச்சிறிய பறக்கும் கேமராவை தயாரித்துள்ளது. 1.5 இன்ச் அளவுக்கும் குறைவான மிகச்சிறிய குவாட்காப்டர் விமானத்தில் இந்த கேமராவானது பொருத்தப்பட்டுள்ளது. 2.4 ஜிகாஹெர்ட்ஸ் கன்ட்ரோலருடன் வெளிவரும் இந்த கேமிராவை ஆன்ட்ராய்டு, ஆப்பிள் ஸ்மார்ட்போன் அல்லது டேப்லட்டை பயன்படுத்தி நாம் இயக்கலாம். 360 டிகிரியிலும் சுழலக்கூடிய இந்த கேமரா 100 அடி உயரம் வரை பறக்கும். வை-ஃபை இண்டர்நெட் இணைப்பு வழியாக இந்த கேமராவில் வானில் இருந்து பதிவு செய்யப்படும் வீடியோ நேரடியாக ஸ்மார்ட்போனுக்கு அனுப்பப்படுகிறது.

அதற்காக, பிரத்யேகமாக உருவாக்கப்பட்டுள்ள அப்ளிகேஷன் மூலம் உடனடியாக படம் பிடித்துக் கொண்டிருக்கும் வீடியோவை சமூக வலைதளங்களிலோ, மின்னஞ்சலிலோ பகிர்ந்து கொள்ள முடியும். அதிகபட்சமாக 420 பிக்சல்கள் வரை படங்களை தெளிவாக படம் பிடிக்கிறது இந்த கேமரா. வீடியோ மட்டுமில்லாது பிக்சர்களையும் எளிதாக எடுக்க முடியும். ஆனால், இதில் 150 எம்.ஏ.எச் அளவே பேட்டரி இருப்பதால் 20 நிமிடங்களுக்கு சார்ஜ் செய்தால் அதிகபட்சமாக 5-7 நிமிடங்கள் வரை மட்டுமே கேமராவால்  பறக்க முடியும்.

பிளைட் சென்சிட்டிவிட்டியை பொறுத்து 3 அளவுகளில் பறக்கும் வேகத்தை நாம் கட்டுப்படுத்தலாம். இதில் உள்ள 6 ஆக்சிஸ் சைரோ ஸ்டெபிலைசேசன் தொழில்நுட்பம் கேமராவை சுமந்து செல்லும் மிகச்சிறிய விமானத்தை காற்றின் வேகத்தில் செல்லவிடாமல் நிலையாக பறக்க உதவி செய்கிறது. இரவு நேரங்களில் பறக்க விடும் போது கண்காணிக்கும் வகையில் கலர் கலரான எல்.இ.டி. பல்புகளும் உள்ளன.

இந்த கேமரா விமானத்தின் எடை 0.55 பவுண்டுகளுக்கும் குறைவாக இருப்பதால் இதை பறக்கவிட அதிக கட்டுப்பாடுகள் இருக்காது என எதிர்பார்க்கப்படுகிறது. எனினும், அமெரிக்காவில் ஆளில்லா குட்டி விமானங்களை பறக்க விட முறையாக அனுமதி மற்றும் பதிவை பெற வேண்டியது கட்டாயமாகும்.

வரும் 7-ம் தேதி முதல் விற்பனைக்கு வரவுள்ள இந்த குட்டி விமான கேமரா ப்ரீ ஆர்டர் அடிப்படையில் 75 டாலர்களுக்கு விற்கப்பட உள்ளதாக அந்நிறுவனத்தின் இணையதளத்தில் அறிவிக்கப்பட்டுள்ளது. இந்திய மதிப்பில் இது ரூ.4967.62 ஆகும்.

ரா.நிரஞ்சனா
(மாணவப் பத்திரிகையாளர்)

எடிட்டர் சாய்ஸ்

MUST READ