Vikatan.com

www.vikatan.com would like to send you push notifications.

Notifications can be turned off anytime from browser settings.

போக்கிமான் கோ- ஓடி விளையாட வைக்கும் தெறி கேம்! #PokemonGO #AugmentedReality

 

டந்த சில நாட்களாக உலக அளவில் ட்விட்டர், ஃபேஸ்புக்கில் ட்ரெண்டாகிக் கொண்டு இருக்கும் ஒரு வார்த்தை என்ன தெரியுமா? #PokemonGO.

50mb இல் இருக்கும் இந்த கேம், இவ்வளவு விரைவாக பலரை ஆச்சர்யப்படுத்தும் என அதன் நிறுவனமே எதிர்பார்த்து இருக்காது. மீம் பாய்சும், இப்போது, போக்கிமான் மீம்ஸ்களை இணையத்தில் கொட்ட ஆரம்பித்துவிட்டார்கள்.


இன்னமும் , இந்தியாவில் இந்த கேம் வெளியிடப்படவில்லை என்றாலும், அதன் apk ஃபைலை டவுன்லோடு செய்து பலர் விளையாட ஆரம்பித்து இருக்கிறார்கள். இதுபோன்ற ஆக்மென்ட்டட் ரியாலிட்டி கேம்களைப் பற்றிய ஒரு சின்ன இன்ட்ரோ....
               
கேம் விளையாடுபவர்களின் எண்ணிக்கை நாளுக்கு நாள் அதிகரித்துக்கொண்டே வருகிறது. இப்போதிருக்கும் தொழில்நுட்பத்தின் அபரிதமான வளர்ச்சியின் காரணமாக, சிறுவர்களை விடவும் பெரியவர்கள்தான் கேம்களுக்கு அதிகம் அடிமை ஆகிறார்கள். ஒரு கையில் விளையாடும் கேம்களில் ஆரம்பித்த இந்த கேம் புரட்சி , விர்ச்சுவல் ரியாலிட்டி, ஆக்மென்டெட் ரியாலிட்டியைக் கடந்து சென்று கொண்டு இருக்கிறது.

விர்ச்சுவல் ரியாலிட்டி கண்ணாடிகளைப் பொருத்திக் கொண்டு கேம்களை விளையாடுவது ஒரு வகையெனில், ஆக்மென்டெட் ரியாலிட்டியில் கேம்களை விளையாடுவது என்பது வேற லெவல். தற்போது புகைப்படங்கள் எடுக்கும் போது பலர்  ஆக்மென்டெட் ரியாலிட்டியை பயன்படுத்தினாலும், கேம்களில் இதனை பயன்படுத்தும் போது, கேம் நம்மை அதன்மீது அதிவிரைவாக ஒன்ற வைத்துவிடும். நீங்கள் விளையாடும்  ஜிடிஏ வைஸ் சிட்டி ( GTA Vice City ) போன்ற கேம்களில், ஏதோவொரு நகரத்திற்குள் சுற்றிக்கொண்டு இருப்பீர்கள். அதற்குப்பதிலாக நம் நகரத்திற்குள் சுற்ற ஆரம்பித்தால்? அதுவும் நீங்கள் உங்கள் பைக்கில் சென்று ஒவ்வொரு இலக்கையும் அடைய வேண்டும் என்றால் எப்படி இருக்கும்? அதைத் தான் ஆக்மென்டெட் ரியாலிட்டி சாத்தியப்படுத்துகிறது.

ஆக்மென்டெட் ரியாலிட்டி என்னும் தொழில்நுட்பத்தின் மூலம் மொபைல் கேமரா வழியாக நிஜ உலகிலேயே, ஒரு மாய உலகை உருவாக்க முடியும். ஜிபிஎஸ்ஸின் துணையில், இதனை சாத்தியப்படுத்துகிறது இந்தத் தொழில்நுட்பம். உங்களின் நிஜ உலகில்,  ஆக்மென்டெட் ரியாலிட்டி என்னும் தொழில்நுட்பத்தைப் பயன்படுத்தி, உங்களால் ஒரு மாய உலகை உருவாக்க முடியும்.


சரி, போக்கிமான் கோ ஹிட்டடிக்க என்ன காரணம்?


2012-ம் ஆண்டின் இறுதியில், ஆக்மென்டெட் ரியாலிட்டியை மையப்படுத்தி வெளியான இங்க்ரெஸ் இன்றளவிலும் சக்கைப்போடு போட்டுக்கொண்டு இருக்கிறது. தற்போது, ஆக்மென்டெட் ரியாலிட்டியை மையப்படுத்தி வந்து இருக்கும் புது கேமான போக்கிமான்-கோ இணையத்தைக் கலக்கிக் கொண்டு இருக்கிறது. தினமும் ஆண்ட்ராய்டு மொபைல்களில் ட்விட்டர் பயன்படுத்தும் நபர்களை ஓவர்டேக் செய்து இருக்கிறது போக்கிமான்-கோ.

 

கூகுளில் apk ஃபைலை டவுன்லோடு செய்வது விளையாடுவது அவ்வளவு கடினமான வேலையாகத் தெரியவில்லை. முதல் போக்கிமான் பொம்மையை கண்டுபிடிப்பது மிகவும் எளிதாக இருந்தது. நாம் அமர்ந்து இருக்கும் இடத்திற்கு பக்கத்திலேயே, க்யூட்டாக அமர்ந்து இருக்கிறது.
 

ஆனால்,  அது மறைத்து வைத்து இருந்த சுவாரஸ்யங்கள் ஏராளம்.  நிஜ உலகின் வரை படத்தை, கார்ட்டூனாக மாற்றி இருந்தது. படத்தில் ஆங்காங்கே நீலநிற க்யூப்கள் கொடுக்கப்பட்டு இருந்தன. அவற்றை க்ளிக் செய்தபோது, Fountain at EA என்றது. அடுத்ததாக, நாம் எக்ஸ்பிரஸ் அவென்யுவிற்கு செல்ல வேண்டும். பலமுறை அங்கு சென்று இருந்தாலும், அங்கு ஃபவுன்டைன் எங்கே இருக்கிறது என்பதை முதலில் யோசிக்க வேண்டியதாக இருந்தது. கண்டுபிடித்து அங்கு சென்று, 'காட்சா' (அதாவது 'பிடித்துவிட்டேன்' என்பதை கேம் இப்படி சொல்கிறது) அடித்ததும், அடுத்து ஸ்ரீ ருக்மணி சிலை என்றது. கூகுள் மேப்பின்  உதவியுடன், அங்கு சென்று கொண்டு இருக்கிறேன்.

 


போக்கிமான் -கோ நமது மொபைலின் ஜிபிஎஸ்ஸையும், கடிகாரத்தையும் வைத்து நாம் இருக்கும் இடத்தை கணிக்கிறது. அதற்கேற்ப, போக்கிமான் பொம்மைகளை உங்களது மாய உலகில் நிலவ விடுகிறது.

விளையாட ஆரம்பித்த சிலர் நடந்தோ, பைக்கிலேயோ சென்றால் கவனக்குறைவு ஏற்படும் என்பதால், அதிக போக்கிமான்களை பெற கால் டாக்ஸிகளில் பயணம் செய்ய ஆரம்பித்து இருக்கிறார்கள். அந்த அளவிற்கு இந்த கேமிற்கு அடிமை ஆகியிருக்கிறார்கள். கேமை இலவசமாக டவுன்லோடு செய்து விளையாட முடியும் என்றாலும், மற்ற கேம்களைப்போல், இதிலும் பணம் கொடுத்து கேமில் வெற்றி பெறுவதற்கான பொருட்களைப் பெற முடியும். இது எந்த அளவிற்கு ஹிட் என்பதற்கு கீழே உள்ள படம் தான் சாட்சி.


ஆனால், கேமர்களுக்கு இதெல்லாம் பெரிய பிரச்னை இல்லை. அவர்களுக்கு கிடைக்கும் புதிய அனுபவமும், தேடலும், அவர்களை இந்த கேமிற்குள் இழுத்துச் செல்கிறது. ரத்தின விநாயகர் கோவில், ருக்மணி சிலை என இது காட்டும் இடங்கள், நமக்கு அருகிலேயே இருந்தாலும், நாம் ஏன் அதனை கண்டுகொள்ளவில்லை என்ற எண்ணம் வருகிறது. ஆனால், நம்மைச் சுற்றி இத்தனை அழகான லேண்ட் மார்க்குகள் இருக்கின்றன என்பதைக் காட்டிச் சிரிக்கிறான் போக்கிமான்


நிஜ உலகின் ஆபத்துகள்


வெளியாகி சில நாட்களிலேயே, போக்கிமான்-கோ மிகச்சிறந்த ஆக்மென்டெட் ரியாலிட்டி கேம் என்ற பெயரை பெற்று இருக்கிறது. கேமின் மீதான அதீத போதையில் சிலர் போக்கிமான் பொம்மைகளை எல்லா இடங்களிலும் தேடிக்கொண்டு இருக்கிறார்கள். இது எந்த அளவிற்கு நீண்டு இருக்கிறதெனில், ஒரு பெண் போக்கிமான் பொம்மையை தேடிச் சென்ற இடத்தில், ஒரு பிணத்தை கண்டிருக்கிறார். இந்த நிலையில் செல்கிறது இந்த கேம்.



இதைப்போன்ற கேம்கள் ஹிட் அடிக்க காரணமே, இதன் நிஜ உலக கனெக்ட்தான். உங்களை, நீங்கள் சக்திமானாக,ஜேம்ஸ் பாண்டாக கற்பனை செய்து கொள்ளலாம்.  ஒரு வீடியோ கேமை, நிஜ உலகோடு பயணிக்க வைப்பதில் ஆபத்துக்களும் இல்லாமல் இல்லை.இதுபோன்ற கேம்களில் இருக்கும் பிரச்னை, நம்மால் விளையாட்டின் வழியாக நிஜ மனிதர்களை சந்திக்க முடியும் என்பதுதான். புது நட்புலகத்தை காட்டும் அதே வேளையில், இதுபோன்ற விளையாட்டுக்கள் , நம்மை ஆபத்திலும் சிக்க வைத்துவிடும். நீங்கள் மெரினா பீச்சில் நின்று விளையாடிக்கொண்டு இருக்கிறீர்கள் என வைத்துக்கொள்ளுங்கள், அது அடுத்த கட்டமாக ஆள் நடமாட்டமில்லாத ப்ரோக்கன் பிரிட்ஜை நோக்கி கைக்காட்ட வாய்ப்பு இருக்கிறது.


இதுவரையில் போக்கிமான்கோ விளையாட்டை வைத்து, நான்கு திருட்டுச் சம்பவங்கள் பதிவாகி இருக்கின்றன. சில தடை செய்யப்பட்ட இடங்களுக்கும் , மக்கள் சென்று இதை விளையாட ஆரம்பித்து இருக்கிறார்கள். அவர்களை போலீஸார் எச்சரித்து இருக்கிறார்கள்.


விக்கின்ஸ் என்ற பெண்மணி போக்கிமானை தேடச் சென்ற இடத்தில், ஒரு பிணத்தைக் கண்டு இருக்கிறார். அவ்வளவு நீர் இருந்த இடத்திற்கு ஏன் சென்றீர்கள் என காவல்துறையினர் கேட்டதற்கு, "தண்ணீரில் போக்கிமான் இருக்கும் என எண்ணினேன்.எப்படியும் இன்னமும் தேடத்தான் போகிறேன் " என பதில் அளித்து அதிர்ச்சி ஏற்படுத்தி இருக்கிறார்.



எது நிஜம்... எது கனவு என்பதை நாம்தான் தீர்மானிக்க வேண்டும். மாய உலகில் ஒரு கட்டத்திற்கு மேல் சஞ்சரிப்பது, நிஜ உலகிலும் பெரும் மாற்றங்களை கொண்டு வரலாம். ஏனெனில் நாம் மாய உலகு என நினைத்து விளையாடுவதே நிஜ உலகில்தான்.

இவற்றையெல்லாம் கடந்து,  ஒரு தொழில்நுட்பம் வரும் போதெல்லாம் அதற்கு ஆதரவாகவும் , எதிராகவும் கருத்துகள் வருவது இயல்புதான். ட்ரோன்கள் பயன்படுத்தினால், கைது செய்யும் அதே உலகில் தான், சில மாதங்களுக்கு முன்னர், உலக ட்ரோன் திருவிழாவை நடத்தினார்கள். விர்ச்சுவல் ரியாலிட்டியில் டெம்பிள் ரன் கேமை தெறிஃபிக்காக ஒரு கூட்டம் விளையாடுகிறது எனில், விர்ச்சுவல் ரியாலிட்டியில், ஆபாசப் படங்கள் பார்க்கிறார்கள் என இன்னொரு பக்கம் எதிர்ப்பும் வரத்தான் செய்கிறது.

ஆக்மென்ட்டட் ரியாலிட்டியிலும், இது போன்று சில பிரச்னைகள் எழலாம். ஆனால், அவற்றை புறந்தள்ளிவிட்டு பயணித்தால், வித்தியாசமானதொரு அனுபவத்தை, போக்கிமான் கொடுக்கும் என்பதில் சந்தேகமில்லை.

பிரிட்ஜ் ஃபவுன்டைன், பீட்டர்ஸ் ரோடு எங்கு இருக்கிறதென யாராவது சொல்ல முடியுமா ?

- கே.ஜி.கார்த்திகேயன்

எடிட்டர் சாய்ஸ்

MUST READ