Vikatan.com

www.vikatan.com would like to send you push notifications.

Notifications can be turned off anytime from browser settings.

அவமதித்த வார்த்தைகளை ஆடையாக்கிய ஜோஜோ!

ஜோஜோ ஓல்டாம்...

இங்கிலாந்தை சேர்ந்த 31 வயது பிசினஸ் உமன். இதுவரை யாரும் யோசிக்காத வகையில் புதுமையான உடையை டிசைன் செய்துள்ளார். 

குழந்தையாக இருந்தது முதல் இப்போது வரை தனது உடல் மற்றவர்களால் எப்படியெல்லாம் கேலிக்கும் பரிகாசத்துக்கும் உள்ளானது என்பதைக் குறிக்கிற வகையில், அந்த வார்த்தைகளை வைத்தே உடையை வடிவமைத்திருக்கிறார்.

மோசமான வார்த்தைகளும், மிக அரிதாக பாராட்டு வார்த்தைகளுமாக கலர்ஃபுல்லாக இருக்கிறது அந்த உடை. அதன் மூலம் என் உடல் என் உரிமை என்கிற மெசேஜையும் அழுத்தமாகப் பதிவு செய்திருக்கிறார்.

''ஒரு நல்ல பாராட்டுங்கிறது ஒருத்தரோட நாளையே சந்தோஷமாக்கும். அப்படி இருக்கிறபோது அடுத்தவங்களோட தோற்றத்தைப் பார்த்து எதுக்காக தப்பான, மோசமான கமெண்ட்டுகளை வீசணும்? என் உடல்வாகைப் பத்தி அடுத்தவங்க அடிச்ச அநாகரிகமான கமெண்ட்டுகளை நான் பொருட்படுத்தினதே இல்லை. ஆனா அது என்னைப் பத்தின என்னோட பார்வையை மாத்திக்க உதவியிருக்குனுதான் சொல்லணும்.

11 வயசிருக்கும்போது என் ஃப்ரெண்ட்கூட ஒரு பார்ட்டிக்கு போனேன். எனக்கு ரொம்பப் பிடிச்ச ஸ்லீவ்லெஸ் டாப்ஸ் போட்டிருந்தேன். என் ஃப்ரெண்ட் என்னைப் பார்த்துட்டு, 'உன்னோட கை மாமிச மலை மாதிரி அவ்ளோ குண்டா இருக்கு'னு சொன்னா. உடனடியா ஓடிப் போய் கண்ணாடியில என் கைகளைப் பார்த்தேன். இனிமே இந்த டாப்ஸை போடக்கூடாதுனு முடிவு பண்ணினேன்.

என்னோட மார்பகங்கள் ரொம்பப் பெரிசா இருக்கிறதாகவும் அதை எனக்கான பாராட்டாகவும் சொன்னான் ஒருத்தன். பின்னாளில் அதையே எனக்கான அடையாளமா வச்சு அவன் கூப்பிட்டதை நான் இன்னும் மறக்கலை.

இன்னொரு முறை இன்னொரு இடம்.... அறிமுகமே இல்லாத ஒரு ஆண் என்னோட சிரிப்பைப் பார்த்துட்டு, உன் பல் பயங்கரமா இருக்குனு கமெண்ட் அடிச்சான். அன்னிலேருந்து பல் தெரியற மாதிரி சிரிக்கிறதை நிறுத்தினேன்.

இன்னும் இப்படி நிறைய மோசமான நினைவுகள்.... இதெல்லாம் எனக்கு நிறைய கத்துக் கொடுத்திருக்கு.

 

நாம எல்லாருமே ஏதோ ஒரு விதத்துல சிறந்தவங்கதான். என் தோள்பட்டைகள் அகலமா இருக்குங்கிறதையும், பல் பெரிசா இருக்குங்கிறதையும், கையும் காலும் எலும்பு மாதிரி தெரியுதுங்கிறதையும் தவிர்த்துட்டு, வாழ்க்கையை ரசிக்க எத்தனையோ விஷயங்கள் இருக்கு. அடுத்தவங்க என்ன சொல்வாங்களோங்கிற விமர்சனங்களை ஒதுக்கிட்டு, நம்ம உடம்பை, அது எப்படி இருந்தாலும் கொண்டாடற மனநிலை ஒவ்வொருத்தருக்கும் ரொம்ப முக்கியம்.

இப்படியொரு உடையை டிசைன் பண்றதுனு முடிவு பண்ணினதும், சின்ன வயசுலேருந்து நான் சந்திச்ச அத்தனை கிண்டல்களையும் ஞாபகப்படுத்திப் பார்த்தேன். இது சோகம் என்னன்னா, ஒரு விமர்சனம்கூட எனக்கு மறக்கலை. என் உடம்போட ஒவ்வொரு பகுதியைப் பத்தியும் யார், என்ன கிண்டல் பண்ணினாங்கன்றது பசுமையா மனசுல பதிஞ்சிருந்தது. இது யார் மனசையும் புண்படுத்தறதுக்கான முயற்சி இல்லை. யாரும் இதுக்காக வருத்தப்பட்டு மன்னிப்பு கேட்கணும்ங்கிறதும் என் எண்ணமில்லை. நம்மைப் பத்தியும் அடுத்தவங்களைப் பத்தியும் எப்படியெல்லாம் மோசமா விமர்சனம் பண்ணிட்டிருக்கோம்னு யோசிக்க வைக்கிறதுக்கான முயற்சிதான் இது.

தெருவுல உங்களைக் கடந்து போகற மனுஷங்களைப் பார்த்து, 'இவங்களுக்கென்ன.... கவலைகளே இல்லாத ஜென்மம்னு நினைப்பீங்க.  ஆனா கவலைகளோ பிரச்னைகளோ இல்லாத மனிதர்களே இல்லை. இந்த உடையில நான் எழுதியிருக்கிறது மாதிரி எல்லாரும் அவங்கவங்க பிரச்னைகளை எழுதி ஒட்டிக்கிட்டு நடமாட முடியாது. கூடியவரைக்கும் அடுத்தவங்கக்கிட்ட அன்பா இருக்க முயற்சி செய்வோமே...''  கனிவான கோரிக்கை வைக்கிறார் ஜோஜோ.

இப்படி அவமானம், வேதனைகளைத் தாண்டி சாதித்த பெண்கள் லிஸ்டில் இவரும் இடம்பெறுவாராக!

-ஆர். வைதேகி

எடிட்டர் சாய்ஸ்

MUST READ