Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

தனித்தீவு... தனி வீடு... இயற்கையோடு இணைந்து வாழ அழைப்பு விடுக்கும் அரசாங்கம்..!

இந்த வாழ்க்கை இங்கிருக்கும் ஒவ்வொருவரும் வாழ ஆசைப்படும் வாழ்க்கை. ஆனால், யாரும் வாழத் துணியாத ஒரு வாழ்க்கை. இதைக் கொஞ்சம் கற்பனைக் கண்கள் கொண்டு பாருங்கள். உங்களைச் சுற்றியிருக்கும் சூழலிலிருந்து கொஞ்சம் விடுபடுங்கள். அந்த சத்தங்களை விட்டு வெளியேறுங்கள். ஏசி அறையின் குளிலிருந்து கொஞ்சம் நகருங்கள். சமையலறையில் அடிக்கும் குக்கர் விசில் சத்தம் உங்கள் காதுகளுக்கு எட்டாத கற்பனை உலகிற்குள் நுழையுங்கள். 

யாரும் வாழ ஆசைப்படும் தீவு - கியுமென்ஸ் - பிரான்ஸ்

இப்போது உங்கள் முகத்தில் கடற்காற்று படத் தொடங்குகிறது. அது கொஞ்சம் பிசுபிசுப்பாகத் தெரியலாம். ஆனால் ஒன்றும் பிரச்னையில்லை. அது சின்னத் தீவு தான். அத்தனை அழகானது. அதிகாலை உங்களை அந்த ஈரக்காற்றும், ஆடுகளின் சத்தமும், பன்றிகளின் சத்தமும், கோழிகள், வாத்து, இன்னும் சில பறவைகளின் சத்தமும் தட்டி எழுப்பும். சிமெண்ட் கலக்காத அந்த இயற்கை வீட்டிலிருந்து வெளியே வருகிறீர்கள். நாய்கள் ஓடிவந்து உங்களை அன்போடு அரவணைக்கின்றன. உருளைக் கிழங்கு போடப்பட்டிருக்கும் நிலத்தில் முயல்கள் ஓடுகின்றன. அதைத் துரத்துகிறீர்கள். அன்றைய சமையலுக்குத் தேவையான காய்கறிகளைப் பறித்துக் கொண்டு சமைக்கத் தொடங்குகிறீர்கள். கூடவே, கரையில் உட்கார்ந்து மீன் பிடித்து முடித்து மீன்களோடு திரும்புகிறது உங்கள் துணை. அந்த மீனை அவர் வெளியே வைத்து அடுப்பில் சுட்டுக் கொண்டிருக்கிறார். இப்படியாக அன்றைய பொழுது கழியும். இரவு நிம்மதியான தூக்கம். அமைதி. அவ்வப்போது வீட்டிற்கு விருந்தினர்களின் வருகை. எல்லாவற்றிற்கும் மேலாக அந்தத் தீவில் உங்கள் வீடு மட்டும்தான். இப்படி ஒரு வாழ்க்கை.

இந்தக் கனவு வாழ்க்கையைத்தான் வாழ்ந்துக் கொண்டிருக்கிறார்கள் பிரான்ஸ் நாட்டைச் சேர்ந்த டேவிட் மற்றும் சொய்சிக் கியூசைனர் (Soizic Cuisiner). பிரான்ஸ் நாட்டைச் சேர்ந்த குட்டித் தீவு கியுமென்ஸ்(Quemenes). கடந்த 2007ம் ஆண்டு யாருமற்ற இந்தத் தீவில் குடியேறுகிறார்கள் இந்தத் தம்பதியினர். புல்லும், புதரும் மண்டிக் கிடக்கும் தீவினை விவசாய நிலமாக மாற்றுகின்றனர். கால்நடை வளர்ப்பிலும் ஈடுபடத் தொடங்குகின்றனர். இவர்களின் நோக்கம் ஒன்றுதான். "விவசாயம் செய்து எங்களுக்கான தற்சார்பு வாழ்வை வாழ்ந்திட வேண்டும். கூடவே, விவசாயம் கொண்டு பணம் சம்பாதிக்கவும் வேண்டும். இயற்கையை அழிக்காமல், இயற்கையோடு இயைந்து இந்த நவீன உலகில் வாழ்ந்திட முடியும் என்பதை எங்கள் வாழ்வு உணர்த்த வேண்டும் என்று விரும்புகிறோம்." என்று சொல்கிறார்கள். 

யாரும் வாழ ஆசைப்படும் தீவு - கியுமென்ஸ் - பிரான்ஸ்

இவர்களின் இந்த வேலையை வெகுவாகப் பாராட்டிய "பிரான்ஸ் கடலோர பாதுகாப்பு இயக்கம்" இவர்கள் வேலையை தேசம் முழுக்க பிரபலபடுத்தியது. இதை ஒரு முன் மாதிரி திட்டமாக முன்னெடுத்தது. பல சுற்றுலாப் பயணிகள் முன்பதிவு செய்து கொண்டு இந்தத் தீவிற்கு வருகைத் தர ஆரம்பித்தனர். அவர்களை அன்போடு வரவேற்று அவர்களைப் பார்த்துக் கொண்டனர் டேவிட் தம்பதியினர். 
தங்களுக்குத் தேவையான மின்சாரத்தை சின்ன, சின்ன காற்றாலைகளிலிருந்தும், சூரிய சக்தியிலிருந்தும் பெற்றுக் கொள்கின்றனர். ஆடு, கோழி, வாத்து, பன்றி போன்ற கால்நடைகளை வளர்த்து அதன் மூலம் ஒரு வருமானத்தை ஈட்டுகின்றனர்.   

யாரும் வாழ ஆசைப்படும் தீவு - கியுமென்ஸ் - பிரான்ஸ்

கடந்த 10 வருடங்களாக இங்கு வசித்து வந்த நிலையில் இப்போது இந்த தீவை காலிசெய்ய இருக்கிறது இந்தத் தம்பதி. "நாங்கள் ஒரு வாழ்வை வாழ்ந்திட நினைத்தோம். அதை இந்தப் பத்து வருடங்களில் செய்து முடித்தோம். இப்போது நாங்கள் எங்களின் அடுத்த திட்டத்திற்கு நகர்கிறோம். நிச்சயம் இந்த தீவைவிட்டு கிளம்பும்போது என் கண்களில் கண்ணீர் பெருக்கெடுக்கும். ஆனால், அதற்காக நான் சோகமடைந்துவிட மாட்டேன். எங்களின் அடுத்தத் தேடல், ஓர் அற்புதமான வாழ்வை எங்களுக்காக நிச்சயம் வைத்திருக்கும்" என்று சொல்கிறார் சொய்சிக்.

இந்தத் தம்பதி தீவை காலி செய்யும் நிலையில், இந்தத் தீவை பராமரிக்கவும், இங்கு குடியேறவும் வேறு ஒரு தம்பதி வர வேண்டும் என்று தன் மக்களைக் கேட்டுள்ளது பிரான்ஸ் அரசாங்கம். நிச்சயம் இதற்கு பலர் விண்ணபிப்பார்கள் என்று எதிர்பார்கப்படுகிறது. ஆனால், வாய்ப்பு ஒரு தம்பதிக்கு மட்டுமே கிடைக்கும். 

யாரும் வாழ ஆசைப்படும் தீவு - கியுமென்ஸ் - பிரான்ஸ்

அந்தப் பகுதியில் இது போன்ற வெவ்வேறு சிறு சிறு தீவுகள் இருந்தாலும் கூட, அதில் யாரும் குடியேறக் கூடாது என்று இந்தத் தம்பதி கேட்டுள்ளார்கள். காரணம் அந்தத் தீவுகளின் உயிர்ச்சூழல் பாதிகப்படக் கூடாது என்பதுதான். தாங்கள் இந்தத் தீவை தேர்ந்தெடுத்ததற்கான காரணம், நூறு ஆண்டுகளுக்கு முன்னர்வரை இந்த தீவில் மக்கள் வாழ்ந்துள்ளனர் என்பதுதான். இது விவசாயத்திற்கும், கால்நடைகளுக்கும் ஏற்ற தீவு. இந்தச் சூழல் அல்லாத தீவுகளில் குடியேற வேண்டாம் என்று கேட்டுள்ளார்கள்.

சரி... இந்த தீவைவிட்டு போகும் இவர்கள் அடுத்து என்ன செய்யப் போகிறார்கள்?

யாரும் வாழ ஆசைப்படும் தீவு - கியுமென்ஸ் - பிரான்ஸ்

"கடற்பாசிகளை எடுத்து அதை மிகச் சரியான தொழிலாக மாற்ற உள்ளோம். கடலின் வளங்களைக் கொள்ளையடிக்காமல், கடல் நமக்கு கொடுக்கும் பொருட்களைக் கொண்டே நம் தேவைகளை பூர்த்தி செய்து கொள்ள முடியும். அதற்கு எடுத்துக்காட்டாக எங்கள் எதிர்கால வாழ்க்கை அமையும்..." என்று புது வாழ்க்கையை  நோக்கி நகர்கிறது இந்த ஜோடி.

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close