Vikatan.com

www.vikatan.com would like to send you push notifications.

Notifications can be turned off anytime from browser settings.

விண்வெளியில் விவசாயம்; சாதித்துக் காட்டிய நாசா!

நிலவில் பாட்டி, கால் நீட்டி வடை சுட்டதெல்லாம் அந்த காலம். விண்வெளியிலேயே விவசாயம் செய்வதுதான் இந்த காலம். ‘என்னது விண்வெளியில விவசாயமா?’ என்று நாசா விஞ்ஞானிகளிடம் கேட்டால் 'செஞ்சுடோம்ல...!'  என தம்ஸ்-அப் காட்டுகின்றனர்.

விண்வெளியில் நாசா விஞ்ஞானிகள் விவசாயம் செய்தது எப்படி என தெரிந்து கொள்ளும் முன், அதற்கான காரணம் என்ன என்பதை தெரிந்துகொள்வோம். நமது பூமியின் மேற்பரப்பில் அமெரிக்கா, ரஷ்யா போன்ற சில நாடுகள் ஒன்றினைந்து அமைத்த, சர்வதேச விண்வெளி மையம் உள்ளது. அந்த மையத்தில்தான் நாம் மேற்சொன்ன விவசாய வேட்டை நடந்துள்ளது.

இந்த சர்வதேச விண்வெளி நிலையத்தில், ஆறு விண்வெளி வீரர்கள் தங்கி தீவிரமான ஆராய்ச்சி பணியில் ஈடுபட்டு வருகின்றனர். அவர்களுக்கு தேவையான உணவு மற்றும் இன்ன பிற பொருட்களையும் நாசா விஞ்ஞானிகள் அனுப்பி வைப்பார்கள். பக்கத்து வீட்டுக்கு பலகாரம் கொண்டுபோய் கொடுப்பது போல் இது எளிதான காரியம் அல்லவே. இதன் சிரமம் அறிந்த விஞ்ஞானிகள், இதற்கு ஒரு தீர்வு கண்டுபிடிக்க ஆராய்ச்சியில் பல வருடங்களாக ஈடுபட்டு உள்ளனர். அவர்கள் முயற்சியின் முழு முதல் வெற்றிதான் இந்த விண்வெளி விவசாயம்.

’வெஜ் 01’ எனப் பெயரிடப்பட்டுள்ள இக்கீரை விவசாயம் கடந்த ஆண்டு நாசா விஞ்ஞானிகளால் தொடங்கப்பட்டது. இக்கீரை விவசாயத்திற்கு நாசாவும், ஆர்பிட்டல் தொழில்நுட்ப கழகமும் கை கோர்த்துள்ளனர். அதன்படி, இச்சிவப்பு கீரைகளை விதைக்க தேவையான விதைகளை 15 மாதங்கள் விண்வெளி மையத்தில் வைத்திருந்தனர். அதன் பிறகு, இந்த விதைகளை விதைக்க தலையணை போன்ற அமைப்பு ஏற்படுத்தப்பட்டு கடந்த ஜூலை 8 ஆம் தேதி அதில் விதைகள் ஒட்ட வைக்கப்பட்டு, இலைகள் முளைத்து 33 நாட்களில் வளர்க்கப்பட்டு உள்ளன.

இந்த கீரை செடிகளுக்கு தேவையான நீரை ‘சிரஞ்’ மூலம் அளித்துள்ளனர் விஞ்ஞானிகள். அது சரி, நீர் மட்டும் போதுமா? நாம் பூமியில் செடி வைத்தால் அதன் வளர்ச்சிக்கு தேவையான சூரிய ஒளி இயற்கையாக கிட்டும், நாமும் உரம் இடலாம். ஆனால், இவை எல்லாம் அங்கு எப்படி சாத்தியம்? அதற்கும் நம் விஞ்ஞானிகள் வழிவகை செய்துள்ளனர். செடிகளின் வளர்ச்சிக்கு தேவையான ஊதா, சிவப்பு நிற ஒளி அலைகளுக்கான எல்.இ.டி. விளக்குகளும், செடிகளின் வளர்ச்சியை கண்காணிக்கும் விண்வெளி வீரர்களுக்கு, பச்சை நிற எல்.இ.டி. விளக்குகளும் பயன்படுத்தப்பட்டுள்ளன.

இப்படி ஒரு வழியாக 33 நாட்கள் முடிந்தது, கீரையும் விளைந்தது. கடந்த திங்கள் அன்று, அறுவடை செய்த சிவப்பு நிற கீரையை சாப்பிட்ட வீரர்கள் அதன் சுவையை மெச்சி உள்ளனர். சிவப்பு நிற கீரையை சாப்பிடும் முன்னதாக, அக்கீரை சிட்ரிக் அமிலம் சார்ந்த ஒரு வகை கரைசல் மூலம் சுத்தப்படுத்தப்பட்டு உள்ளது.

இந்த சாதனையால், விண்வெளி வீரர்கள் மேலும் பல புதிய உணவு வகைகளை உற்பத்தி செய்ய புதிய நம்பிக்கை பிறந்துள்ளதாக நாசா விஞ்ஞானிகள் உற்சாகத்துடன் தெரிவித்து உள்ளனர்.

- ச.ஆனந்தப்பிரியா
(மாணவப் பத்திரிகையாளர்)

எடிட்டர் சாய்ஸ்

ஜெயலலிதா வாழ்வின் சில ‘கடைசி’கள்!

MUST READ