Vikatan.com

www.vikatan.com would like to send you push notifications.

Notifications can be turned off anytime from browser settings.

உலகை விலை பேசிய சிரிப்புக்கு சொந்தக்காரர் சார்லி சாப்ளின்!

டிச. 25- சார்லி சாப்ளின் நினைவு நாள்

றுக்கமான கோட்டும், அதற்கு மாறான பாண்டும், டூத் பிரஷ் மீசையும், கிழிந்த தொப்பியும், பொருத்தமில்லாத ஷுக்களும், வாத்து நடையுமாக என்று நாம் கூறும் போதே நம் கற்பனை கண்கள் முன்பாக சார்லி சாப்ளின் தோன்றிவிடுகிறார். இந்த அளவுக்கு ரசிகர்களை கவர்ந்த சாப்ளின் செல்லுலாயிடில் அப்படி என்ன விந்தையைத்தான் செய்து விட்டார்?

லண்டனில் ஒரு ஏழைக் குடும்பத்தில் 1889-ல் பிறந்த சாப்ளினின் இளமைக்காலம் அவ்வளவு மகிழ்ச்சியூட்டுவதாக அமையவில்லை. 1910ல் அமெரிக்காவுக்கு சென்ற சாப்ளின், ஹாலிவுட்டின் தெருக்களில் காசில்லாமலே வலம் வந்த நிலையில், மெக்சன்னட்டின் நாடக குழுவில் சேர்ந்து புகழ்பெற தொடங்கினார்.

அதன்பிறகு 1914-ல் முதன் முதலாக,  அனாதையான நாடோடி 'டிரெம்ப்' (TRAMP) பாத்திரத்தில் தோன்றி ரசிகர்களின் நெஞ்சத்தில் நீங்காத இடம் பெற்றார். அதைத் தொடர்ந்து 1940 வரை ஏறத்தாழ 25 வருடங்கள் அந்த வேடத்திலேயே உலகை சிரிப்புக் கடலில் ஆழ்த்தினார்.

டிரெம்ப் (TRAMP), தி கிட் (Thekid), கோல்ட் ரஷ் (Gold Rush), சர்க்கஸ் (Circus), சிட்டி லைட்ஸ் (City lights), மாடர்ன் டைம்ஸ் (Modern Times), தி கிரேட் டிக்டெட்டர் (The great Dictator) ஆகிய திரை உலக இதிகாசங்களை தன் காமிராவினால் படைத்தார். அவர் தானே நடித்து, தயாரித்து இயக்கிய இந்த படங்கள், அமெரிக்கர்களை மட்டும் அல்ல; அகிலம் முழுவதும் உள்ள அனைவரையும் சிரிக்க வைத்து சிந்திக்க வைத்தன. அவரது கால்கள் சுழன்றபோது ஓராயிரம் கண்கள் சுழன்றன.

உலக சபையில் நகைச்சுவையை சங்கீதமாக வாசித்தவர். திரையில் சாப்ளின் பிரச்னைகளில் சிக்கி சுண்ணாம்பாகும் போது ரசிகர்கள் சிரித்துக்கொண்டிருப்பார்கள். பார்வையாளர்கள் உச்சுக் கொட்டும் போது சாப்ளின் சிரித்துக்கொண்டிருப்பார். இது அவரது படங்களில் நாம் காணும் விசித்திரம்.

40 ஆண்டுகளாக அமெரிக்காவில் வாழ்ந்தபோதும், அவர் அந்த நாட்டின் குடியுரிமையை பெறவே இல்லை. அவருக்கு 1972-ல் சிறப்பு ஆஸ்கார் விருது வழங்கப்பட்டது. நமது இந்திய அரசாங்கம்கூட அவரது தபால் தலையை வெளியிட்டு ஒரு கலைஞனுக்கு செய்ய வேண்டிய மரியாதையை செய்து முடித்தது.

சாப்ளினின் தாக்கம்

இந்த ஒப்பற்ற கலைஞனின் தாக்கம் பெரும்பாலான நடிகர்களிடம் இருந்ததை எவரும் மறுக்க முடியாது. ஏனென்றால் இவர் போட்ட, போன சாலைகளில்தான் திரை உலக காமிராக்கள் பயணம் செய்கின்றன.

சாப்ளினின் பொன்வாசகங்கள் சில:

* டாக்கி  (பேசும் சினிமா) வந்ததும் நடிப்புக்கலை செத்து விட்டது.

* உலக பணக்காரர்களின் வரிசையில் நானிருந்த போதும் என்னால் ஏழையாகத்தான் சிந்திக்க முடிகிறது. பணம் இடையில் வந்தது. ஆனால் ஏழ்மை என் ரத்தத்தில் ஊறியது.

* ரஷ்யாவுக்கு நான் சென்று வந்ததால் என்னை கம்யூனிஸ்டா எனக் கேட்கிறார்கள். மனிதநேயத்துடன் வாழ நான் கம்யூனிஸ்டாக இருக்க வேண்டிய அவசியமில்லை.

-எஸ்.கதிரேசன்

எடிட்டர் சாய்ஸ்

MUST READ