Vikatan.com

www.vikatan.com would like to send you push notifications.

Notifications can be turned off anytime from browser settings.

மில்லினியல்கள் vs ஜெனரேஷன் Z!... அடுத்த தலைமுறை தலைவர்களுக்கான யுத்தம்!

'90களில் பிறந்தவர்கள்தான் உலகை ஆள‌ப்பிற‌ந்தவர்கள்,  அடுத்த தலைமுறைகளுக்கான தலைவர்கள் இவர்கள்தான்' என்று கூறி வந்தவர்களின் நிலைப்பாட்டை மாற்றும் புதிய சக்தியாக உருவாகி வருகிறது ஜெனரேஷன் இஸட் எனும் 1995க்கு பின் பிறந்த தலைமுறை.

விராட் கோலியை பேசியவர்கள் சர்ஃபராஸ்கானை பேச துவங்கி விட்டனர். அனிருத் பற்றி பேசியவர்கள் சூப்பர் சிங்கர்களை பேசத் துவங்கிவிட்டனர். இவர்கள்தான் ஜெனரேஷன் இஸட்.

1980- களுக்கு முன் பிறந்தவர்கள் குறிப்பிட்ட துறையில் கில்லியாக இருப்பார்கள். சிலர் இன்ஜினியர்கள், சிலர் டாக்டர்கள், சிலர் வங்கி உயரதிகாரிகள் என துறை சார்ந்த நிபுணராக இருந்திருப்பார்கள். 80களுக்கு பின் பிறந்தவர்கள் மல்டி டாஸ்கிங் மனிதர்களாக இருக்கிறார்கள் என்றார்கள். தற்போது  மல்ட்டி டாஸ்கிங் தலைமுறையை இந்த ஜெனரேஷன் இஸட் தெறிக்க விட்டு முன்னேறுவார்கள் என்று கூறத் துவங்கி விட்டனர். அதற்கு ஏற்றார் போல் அவர்களும் தங்களை தயார்படுத்திவருகிறார்கள்.

இந்த தலைமுறையை பற்றிய அடிப்படை குற்றச்சாட்டுகள் உள்ளன. இவர்களால் ஒரு வேலையில் நீண்ட நாட்கள் நிலையாக இருக்க முடியாது. இவர்கள் அனைவரும் ஒரு வேலை பிடிக்க வில்லை என்றால் அடுத்த வேலைக்கு தாவி விடுவார்கள். போதை பழக்கங்களுக்கு அதிகம் அடிமையான தலைமுறையும் இவர்கள் தான்.  செல்போன், இணையம் இல்லாமல் இவர்களால் உயிர்வாழ முடியாது என குற்றச்சாட்டு பட்டியல் நீள்கிறது. ஆனால் இவர்களது பலம் வித்தியாசமானது.

4D தலைமுறை!


மற்றவர்கள் 3 பரிமாணத்தில் சிந்தித்தால் இவர்கள் அதனை தாண்டிய 4வது கோணத்தில் சிந்திக்கக்கூடியவர்கள். கிரிஸ்டோபர் நோலன் படத்தில் வரும் ஹீரோக்கள் போன்றவர்களாக இருப்பார்கள். இவர்கள் கூறுவதை, 'இல்லை... இது சாத்தியமற்றது!'  என இவர்களுக்கு முந்தைய தலைமுறை கூறுவதை விரும்ப மாட்டார்கள். அதனை உடைத்து சரி என நிரூபிக்க நினைப்பவர்கள்.

சோசியலான நபர்கள்:

80களுக்கு முன் பிறந்தவர்கள் யாரோடும் சரியாக பேசமாட்டார்கள், மில்லினியல்கள் பேசுவதற்கு முன் தயங்கி தயங்கி பேசுவார்கள். ஆனால் இந்த தலைமுறை யாரை பார்த்தாலும் சற்றும் தயங்காமல் பளிச்சென பேசிவிடும் தலைமுறை. காதலைக்கூட ஒளித்து மறைத்து கூறாமல் நேரடியாக பதிவு செய்யும் குணம் கொண்டவர்கள் இவர்கள்.

மல்டி-டாஸ்கிங் கிங்குகள்:

இவர்கள் மல்டி டாஸ்கிங் செய்வதில் கில்லாடிகள். மில்லினியல்களிடம் இருந்து இந்த பதவியை சர்வ சாதரணமாக தட்டி பறித்தவர்கள். மில்லினியல்கள் ஒரே நேரத்தில் 2 வேலைகளை செய்தால் இவர்கள் 5 வேலைகளை செய்வார்கள் என்கிற‌து ஆய்வு. கணினி திரையை கையாளுவதில் கில்லாடிகள். ஒரே நேரத்தில் 10 ஸ்கிரீன்கள் திறந்திருந்தால் அதில் இவர்களால் 7 ஸ்க்ரீன்களில்  ஒரே நேரத்தில் சிறப்பாக வேலை செய்ய முடியும். அப்படியென்றால் இவர்கள் கிங் தானே...

முதலாளி வர்க்கம்!

இவர்களுக்கு ஒருவரின் கீழ் வேலை செய்வது பிடிக்காது. அப்படியே செய்தாலும் அவர்கள் அங்கு சுதந்திரமான மனிதர்களாக இருப்பார்கள். அவர்களை கட்டுப்படுத்தி சொல்கின்ற வேலையை செய்யும் ரோபோக்களாக நடத்துவது கடினம். சுருக்கமாக சொன்னால் அவர்கள் முதலாளி வர்க்கம் என கூறப்படும் தலைமை பண்பு பொருந்தியவர்கள்.

கணிப்பது கடினம்!

இவர்கள் இப்படிதான் என கணிக்க முடியாது. அஜித்-விஜய்க்காக அடித்துக் கொள்ளும் இவர்கள்,  அடுத்த நிமிடமே அமெரிக்க அதிபரையும், மோடியையும் விமர்சிப்பார்கள்.விராட் கோலிக்கும் அனுஷ்கா ஷர்மாவுக்கு பிரேக் அப் என்றால் உருகுவார்கள். இவர்களுக்கு பன்முக தன்மை இருக்கும். அதுதான் இவர்களது பலம்.

பலவீனம் என்ன?

டெக்னாலஜியின் உச்சத்தில் இருப்பதால்,  அனைத்து விஷயங்களையும் உலகத்தோடு பகிர நினைத்து, பர்சனலையும் சோஷியலாக்கி விடும் தலைமுறை இது. காதல் தோல்வி துவங்கி,  பாஸ் திட்டுவது வரை அனைத்தையுமே சோஷியல் மீடியாவில் பகிர்வதால் இவர்கள் குடும்பத்துடன் தொடர்பு குறைந்தவர்களாக இருக்கிறார்கள்.


வேலையில் பிடிப்பு இல்லாமல் இருப்பதால் இவர்களை நிறுவனங்கள் பெரிதாக நம்புவதில்லை. மேலும் மில்லினியல்கள் இவர்களுக்கு சமமாக இருப்பதால், அவர்களது அனுபவத்துடன் போட்டியிடுவது இவர்களுக்கு சற்று பலவீனமான விஷயம்.

யார் அடுத்த தலைமுறை தலைவர்கள்?

அடுத்த தலைமுறை தலைவர்கள் ஜெனரேஷன் இஸட்டா அல்லது மில்லினியலா என்றால் அதற்கு பதில் சொல்வது கடினம். காரணம் பழமை தெரிந்த புதுமையோடு வளர்ந்த மில்லினியல்கள்,  அனுபவரீதியாக சிறந்தவர்கள் என்றால், ஜெனரேஷன் இஸட் இன்றைக்கு என்ன தேவை என்பதில் மில்லினியல்களை தூக்கி சாப்பிடும் கில்லிகள்.


பலம் பொருந்திய தலைமுறையை,  அடுத்த தலைமுறை முந்துவது வழக்கமான விஷயம்தான். ஆனாலும் மில்லினியல்களுக்கும், ஜெனரேஷன் இஸட்டுக்கும் சிறிய இடைவெளியே இருப்பதால் கடுமையான போட்டி இருக்கும். இருவருமே கில்லிகள்தான். கடைசி ஓவர்... கடைசி பந்தில், ஒரு விக்கெட்,  ஒரு சிக்ஸர்  இதுதான் இவர்களுக்கு இடையேயான  போட்டியின் ரிசல்ட்.

மில்லினியல்கள் அனுபவத்தை ஜெனரேஷன் இஸட் எடுத்துக் கொள்ள வேண்டும், ஜெனரேஷன் இஸட்டின் அக்ரஸிவ் குணத்தை மில்லினியல்கள் பின்பற்ற வேண்டும். அப்போதுதான் அடுத்த தலைமுறையை வழிநடத்த முடியும்.

கமான் மில்லினியல்ஸ்...வெல்கம் ஜெனரேஷன் இஸட்...!

-ச.ஸ்ரீராம்
 

எடிட்டர் சாய்ஸ்

MUST READ