Vikatan.com

www.vikatan.com would like to send you push notifications.

Notifications can be turned off anytime from browser settings.

கருப்பில் கர்வம் கொள்வோம்! #unfairandlovely

‘வெள்ளையா இருக்கிற பொண்ணா பார்த்து கல்யாணம் பண்ணிக்கணும்’, ‘வெள்ளை நிறம்தான் அழகு’, ‘கருப்புனா அசிங்கம்’, ‘கருப்பா பயங்கரமாவா இல்ல பயங்கர கருப்பாவா’, ‘வெள்ளையா இருக்கவன் பொய் சொல்லமாட்டான்’ ‘கருவாப்பயலே’ என நம் சமுதாயத்தில் ஆழ படிந்திருக்கிறது வெள்ளை நிறத்தின் மீதான மோகமும் கருப்பு நிறத்தின் மீதான வெறுப்பும்.

ஒரு குழந்தை பிறந்த உடனே கேட்கப்படும் ஒரே கேள்வி, ‘குழந்தை கருப்பா, சிவப்பா’ என்பதாகதானே இருக்கிறது. ஏன் கருப்பாக இருப்பவர்கள் அழகாக இருக்க மாட்டார்களா? களையாக இருப்பவர்கள் கருப்பாக இருந்தால் அவர்கள் அழகு இல்லையா? திருமண வலைதளங்களில் தங்களின் மகளை குறித்து “நிறம்: வெள்ளை” என்று போடுவதில் பெற்றோருக்குதான் எவ்வளவு பெருமை.

மக்களின் மனதில் ஒரு வித தாழ்வுணர்ச்சியை ஏற்படுத்தி அதன் மூலம், ப்ளீச்சிங், க்ரீம், அழகு பொருட்கள் என ஒரு துறையே இந்த நிற பேதத்திற்கு பின்னால் தழைத்துக் கொண்டிருக்கிறது. பெண்ணின் முகம் தொடங்கி அந்தரங்க பாகங்கள் வரை வெள்ளையாக்கும் கிரீம்கள் இன்று சந்தையில் விற்கப்படுகின்றன.

தெற்காசிய நாடுகளில் அதிகம் காணப்படும் இந்த நிறம் சார்ந்த பேதங்களுக்கும் பிரச்னைகளுக்கும் எதிராக,  #unfairandlovely என்ற பெயரில் ஒரு இணையவழி விழிப்புணர்வு பிரச்சாரத்தை நடத்தி வருகின்றனர் டெக்சாஸ் பல்கலைகழகத்தின் மாணவர்கள் மூன்று பேர்.

இவர்கள் தொடங்கி வைத்த இந்த #unfairandlovely ஹாஷ்டாக்கில்,  கருப்பு நிறமுடைய பலர் தங்களது புகைப்படங்களை அப்லோட் செய்து தங்களது பெருமிதத்தை வெளிப்படுத்தி வருகின்றனர். கருப்பாக இருப்பதனால் இவர்கள் வாழ்வில் சந்தித்த பிரச்னைகள் குறித்தும் பதிவிட்டு வருகின்றனர். இது சமூக வலைதளங்களில் சமீபத்தில் ஹிட்டடித்து இருப்பதோடு கருப்பு, வெள்ளை நிறங்கள் சார்ந்த பேதங்களை குறித்தும் மக்களை பேச வைத்திருக்கிறது.

புறம் காணும் நிறத்தில் என்ன இருக்கிறது. அகத்தில் இருப்பதே உண்மையான அழகு. சிறு விதத்தில் மாற்றத்தை ஏற்படுத்த முயன்றிருக்கும் #unfairandlovely குழுவினரை வாழ்த்துவோம்!



 

-கோ. இராகவிஜயா
(மாணவப் பத்திரிகையாளர்)

எடிட்டர் சாய்ஸ்

MUST READ