Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

மழைக்கு இந்த வீடுதான் பெஸ்ட்!

 

நாம் ஏசி, டிவி, மழை பெய்தால் ஒழுகாத கூறையுடன் வசிக்கும் நம் சிமெண்ட் வீடுகளில் இருந்து மண் வீட்டிற்குக் குடிபெயரச் சொன்னால், எத்தனை பேர் அதைச் செய்வோம்? கொடைக்கானலில் இரண்டு பெண்கள் அதைச் செய்துள்ளனர்.

பிரியாஸ்ரீ மணி மற்றும் நிஷிதா வசந்த் ஆகிய இருவரும் தங்கள் வீடுகளை விட்டு விட்டு, முழுக்க முழுக்க மண் மற்றும் மக்காத குப்பைகளால் கட்டப்பட்ட வீட்டிற்கு மாறியுள்ளனர். இந்த வீடு கொடைக்கானலில் இருந்து 6 கி.மீ தொலைவில் செண்பகனூர் என்ற இடத்தில் கட்டப்பட்டுள்ளது.

இந்த வீடு மிகக் குறைந்த செலவில் கட்டப்பட்டுள்ளது. வீட்டின் சுவரை சிமெண்ட் பைகளைக் கொண்டு கட்டியுள்ளனர். காரணம், இந்த பைகள் polypropylene எனும் வகை மக்காத பிளாஸ்டிக்கால் செய்யப்பட்டது. மேலும், குப்பைகளில் அதிகம் காணக் கிடைக்கும் பைகளும் இவைதான். இந்த பைகளில் மண்ணை நிரப்பி ஒன்றிற்கு மேல் ஒன்றாக அடுக்கி வைக்கப்பட்டது. அவை விழுந்து விடாமல் இருக்க, முள் கம்பி கொண்டு கொறுக்கப்பட்டது. இடையில் ஜன்னலுக்கு பழுதான டயர்களை வைத்தனர். அனைத்தையும் அடுக்கிய பிறகு, களிமண் கொண்டு பூசி சுவர் வடிவத்தைக் கொடுத்தனர்.

கழிப்பறையை அலங்கரிக்க, பழைய பீர் பாட்டில்களை சுவரில் சொருகி வைத்துவிட்டனர். இதன்மூலம், இயற்கைக்கு எந்த பாதிப்பும் ஏற்படுத்தாத ஒரு முழு மாடர்ன் இல்லம் கட்டப்பட்டது!

முன் காலங்களில், மாட்டுச் சாணம், சுண்ணாம்பு ஆகியவற்றைக் கொண்டு கட்டப்பட்ட வீடுகளைப் பார்த்துதான் இவர்களுக்கு இந்த ஆலோசனை வந்துள்ளது. வீட்டின் கூறை, ஓலையால் வேயப்பட்டது. ஊர்மக்களின் உதவியுடன் இவர்கள் இதைச் செய்து முடித்தனர்.

"கிரகப்பிரவேசத்திற்கு" வாசலில் அரிசி மாவு கோலம் போட்டு, வாழைமரம் கட்டி மக்களை அழைத்துள்ளனர். அனைத்துமே நம் பாரம்பரிய முறைப்படி செய்யப்பட்டது. இந்த வீட்டிற்கு முன் ஒரு சிறிய தோட்டம் போட திட்டமிட்டுள்ளனர்.

இந்த வீட்டைக் கட்ட எந்த பொறியாளரின் உதவியோ, வேலையாட்களின் உதவியோ பெறப்படவில்லை. இது குறித்து பிரியா ஸ்ரீ கூறுகையில், "நாங்கள் முழுக்க முழுக்க உடலளவில் உழைக்க வேண்டும் என்று எண்ணினோம். நம் உடலுழைப்பால் ஒன்று செய்தால் எப்படி இருக்குமென்று உணர விரும்பினோம். கடினமாக உழைப்பதன் மூலம், நம் உடல் மட்டுமல்ல, உள்ளமும் வலுப்பெறுகிறது என்று தெரிந்து கொண்டோம்".

மேலும், "இந்த வீட்டிற்கு மாறிய பிறகு, சிறு சிறு மாற்றங்களை ஏற்படுத்திக் கொண்டோம். வெளிய டயர்களை வைத்து படிகட்டுகள், மற்றும் பழைய அலமாரிகளை வைத்துள்ளோம். எங்களுடைய நண்பன் வெளிச் சுவற்றில் ஒரு rhododendron மரத்தின் ஓவியத்தை வரைந்து தந்துள்ளார்!"

இந்த வீடு கடும் வெயிலையும், மழையையும் தாங்குகிறது. கடந்த மழைக்காலத்தில் கடும் மழையில் கூட எந்த பாதிப்பும் ஏற்படாததால், இவர்களின் நம்பிக்கை அதிகரித்துள்ளது.

மக்கள் அனைவரும் பெரிய பெரிய வீடுகளுக்கு மாறி வரும் நிலையில், இது போல சிலர் அக்கறையோடு செயல்படுவது கொஞ்சம் ஆறுதலாக உள்ளது. மாற்றம் ஆரம்பமாகி விட்டது. இனி அதை "வைரல்" ஆக்க வேண்டியது நம் பொறுப்பு!

-  ந. ஆசிபா பாத்திமா பாவா

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close