Vikatan.com

www.vikatan.com would like to send you push notifications.

Notifications can be turned off anytime from browser settings.

'ஆம்.. காமம், பணம், புகழ்தான் எனது விருப்பம்!' - சேத்தன் பகத்

'ஒன் இண்டியன் கேர்ள்' என்ற தன்னுடைய புதிய புத்தகத்தின் அறிமுக விழாவிற்காக சென்னை வந்திருந்தார் சேத்தன் பகத். அமைந்தகரையில் உள்ள ஸ்கைவாக்கில் நடந்த விழாவில் 'சென்னை எப்போதுமே ஒரு ஸ்பெஷல் சிட்டி. இங்கே ஆங்கில இலக்கியம் படிப்பவர்கள் அதிகம் இருக்கிறார்கள்' என்ற சேத்தன், வாசகர்களுடன் உற்சாகமாக கலந்துரையாடினார்.

நிகழ்ச்சிக்கு வந்திருந்த ஹரி என்ற 14 வயது பையன் , ' உங்கள் புத்தகத்தின் தலைப்புகளில் எல்லாமே எண்கள் இருக்கின்றன. நீங்கள் பொறியியல் பின்னணி கொண்டவர் என்பதால் அப்படி தலைப்பு வைக்கிறீர்களா?' என்று கேட்டான். அதற்கு பதிலளித்த பகத், 'இங்கே ஏராளமான எழுத்தாளர்கள் இருக்கிறார்கள். ஆனால், அவர்கள் எல்லோருடைய புத்தகத்தின் அனைத்து பெயருமே நினைவில் இருக்காது. ஆனால், என் புத்தகங்கள் நினைவில் உள்ளன என்றால் எண்களோடு இருக்கும் தலைப்புகள் தான் காரணம். அதற்காகத்தான் அப்படி தலைப்புகள் வைக்கிறேன்' என்றார்.  கொஞ்சம் அறிவுப்பூர்வமான விஷயம், போதுமான ஆங்கிலம், இவற்றோடு இளமைக்கும், துள்ளலுக்கும் கிளர்ச்சி தரும் விஷயங்களை சேர்த்து எழுதுகிறார். எழுத்தை பல்லாயிரக்கணக்கானோரிடம் கொண்டு விற்கும் நுகர்பண்டமாக மாற்றிவிடும் இந்த வியாபாரத் தந்திரம்தான் சேத்தன் பகத். நிகழ்ச்சியை முடித்துவிட்டு அவசரமாக கிளம்பியவரிடம் விகடனுக்காக பேட்டி என்றதும் ஒத்துக்கொண்டார்.

ஆரம்பத்தில் உங்கள் புத்தகங்கள் திரைப்படமாக்கப்பட்ட போது இரண்டுமே நன்றாக வந்திருந்தது. ஆனால், அதன்பிறகு திரைப்படங்கள் எடுக்கப்படும் என்கிற நோக்கிலேயே நீங்கள் எழுதத்தொடங்கிவிட்டது போல் இருக்கிறது. திரைப்படம் உங்கள் எழுத்தை பாதித்திருக்கிறதா?

இல்லை... நிச்சயமாக நான் திரைப்படங்களுக்காக எழுதுவதில்லை. அப்படி எழுதுவது என்றால் நான் நாயகன், நாயகி கதைகளைத் தான் எழுதிருயிருப்பேன். ஆனால், அப்படியான கதைகளை நான் படைப்பதில்லை. எனவே, திரைப்படம் என் புத்தகங்களை பாதிக்கிறது என்று நான் நினைக்கவில்லை.

எழுதத்தொடங்கிய காலத்தில் இளைஞர்களுக்கு ஒரு ஆதர்சனம் போல இருந்தீர்கள். ஆனால், இன்று சமூக வலைதளங்களில் சிறுசிறு விஷயங்களுக்குக்கூட உங்கள் மீது கடுமையான விமர்சனம் வைக்கப்படுகிறது. ஏன் இந்த மாற்றம் என யோசித்திருக்கிறீர்களா?

இது எனக்கு மட்டுமான பிரச்சனை இல்லை. பாப்புலராக உள்ள எல்லோருக்குமே இந்த பிரச்சனை உள்ளது. பிரபலமடையும்போது இதை சந்தித்துதான் ஆக வேண்டும். சமூக வலைதளங்களில் கிட்டத்தட்ட 8 மில்லியன் (80 லட்சம்) பேர் என்னை பின் தொடர்கிறார்கள். அதில் ஒரு 800 பேரோ, 8000 பேரோ விமர்சித்துக் கொண்டுதான் இருப்பார்கள் அதற்காக நான் கவலைப்படுவதில்லை.

இப்போது வெளியாகியிருக்கும் 'ஒன் இண்டியன் கேர்ள்' புத்தகத்தில் பிரதான பெண் கதாப்பாத்திரமே, மனைவி என்பவள் லக்கேஜ்ஜுகளை தூக்கிச்செல்ல வேண்டும், இதர வேலைகளை செய்யவேண்டும் என்று விரும்புவதாக சொல்லியிருக்கிறீர்கள். மனைவியின் வேலை என்பது அதுதானா?

பாருங்கள்... அது ஒரு கதாபாத்திரம். அந்த கதாபாத்திரத்தின் விருப்பம்தானே ஒழிய, ஒட்டமொத்த சமூகத்துக்கான நீதி கிடையாது. ஒட்டுமொத்த சமூகத்துக்கான நீதியாகவோ, அறமாகவோ, விதியாகவோ அது சொல்லப்படவில்லை. ஒரு கதாபாத்திரத்தின் விருப்பங்களை நாம் அப்படி ஏற்றுக்கொள்ள வேண்டிய அவசியமும் இல்லை.

பெண்களை முழுமையாக புரிந்து கொள்வதற்காக இந்த புத்தகத்தை எழுதினேன் என்கிறீர்கள். ஆண்களை முழுமையாக புரிந்துவிட்டீர்களா? ஆண்களைப் பற்றிய உங்கள் எண்ணம் என்ன?

( சிரிப்புடன்) ஆண்களைப் பற்றி தனியாக ஒரு புத்தகம் எழுதவேண்டும் என்று நினைக்கிறேன். விரைவில் எழுதுவேன். அப்போது சொல்கிறேன்.

திருமணம், உறவுகள் குறித்து தொடர்ச்சியாக எழுதுகிறீர்கள். ஆணவக்கொலை, ஆசிட் வீச்சு போன்றவற்றை கவனிக்கின்றீர்களா?

நிச்சயமாக அவற்றை யாரும் ஏற்றுக்கொள்ள முடியாது. அவற்றைத் தடுக்க வேண்டும்.

தலாக் முறைபற்றி என்ன நினைக்கிறீர்கள்?

இந்தியா ஒரு மதச்சார்பற்ற நாடு. இங்கு கட்டாயமாக பொதுசிவில்சட்டம் வேண்டும் என்பதுதான் என் விருப்பம்.

வாட் யங் இண்டியா வாண்ட்ஸ் புத்தகத்தில் காமம், பணம், புகழ் தான் இந்திய இளைஞர்களின் விருப்பம் என்று சொல்லியிருந்தீர்கள். இது நீங்கள் எழுதும் கருத்துக்களை நிலைநிறுத்தும் வியாபார உத்தியா?  உங்களின் இளைமைக்கால விருப்பம் அதுதானா?

ஆமாம்... நிச்சயமாக. அவைதான் என்னுடைய இளைமைக்கால விருப்பங்களாக இருந்தன. யாராவது ஒருவர் உண்மையை பேசித்தானே ஆகவேண்டும். நான் வங்கிப்பணியாளராக இருந்தேன். என்னுடைய பாஸ் எனக்கு 10% இன்கிரீமெண்ட் கொடுக்கவில்லை. ஒருவேளை அப்படி கொடுத்திருந்தால், நான் அதுவே போதும் என்று இருந்திருப்பேன். எழுதியிருப்பேனா என்றே தெரியவில்லை. ஃபைவ் பாய்ண்ட் சம் ஒன் புத்தகம் எழுதும்போது அவ்வளவு பெரிய வரவேற்பு கிடைக்கும் என்று நானே நினைக்கவில்லை.

பல்லாயிரக்கணக்கானோர் படிக்கக்கூடிய புத்தகங்களை எழுதுகிறீர்கள். நல்ல விஷயம். ஆனால், ஒரு புத்தகம் தரமானது என்பதற்கு அதுதான் தகுதியா?

ம்ம்ம்ம்ம்... எனக்குத் தெரியவில்லை... (கொஞ்சம் யோசித்துவிட்டு) ஆனால், அதுவும் ஒரு தகுதிதானே? பல்லாயிரக்கணக்கானோர் நம் புத்தகங்களை வாங்கி படிப்பதும் தரத்திற்கான தகுதிதானே?

-வரவனை செந்தில்

எடிட்டர் சாய்ஸ்

MUST READ