Vikatan.com

www.vikatan.com would like to send you push notifications.

Notifications can be turned off anytime from browser settings.

இந்த சந்தேகம்லாம் உங்களுக்கும் இருக்கா? சரி பண்ணிடலாம் வாங்க! #MorningMotivation

சந்தேகம்

நம்மில் பலருக்கும் சின்னச் சின்ன சந்தேகங்கள், கேள்விகள் பல மனசுக்குள் ஓடும். அதற்கு சரியான விடையோ காரணமோ தேடாமல், அந்த கேள்விகள் நம்மை ஆட்கொள்ள விட்டுவிடுவோம். கொஞ்சம் யோசித்தால், அந்தப் பிரச்னையை எளிதில் முடித்துவிடலாம். அப்படி சில கேள்விகளும், அதன் பின்னணிகளும் இதோ...

நான் போன் பண்ணினேன். அவன்/அவள்/அவர் எடுக்கல. நான் மெசேஜ்/வாட்ஸ்அப் பண்ணினேன். பார்த்துட்டான்/ர். ரிப்ளை பண்ல’ 

எந்த ஒரு விஷயத்திலும் உங்கள் கோணத்திலிருந்து பார்த்துப் பெரிதாக நினைக்காதீர்கள். உங்கள் பாஸுக்கு / மனைவிக்கு / காதலிக்கு ஃபோன் செய்கிறீர்கள். அவர் எடுக்கவில்லை. ‘இதுவாக இருக்குமோ.. அதுவாக இருக்குமோ’ என்று பதற்றத்தின் உச்சிக்கே சென்றுவிடுவார்கள் சிலர். தேவையே இல்லை. ஃபோன் வைத்திருக்கும் இடத்திலிருந்து அவர் தூரத்தில் இருக்கலாம், சைலன்ஸில் இருக்கலாம் என்று பல காரணங்கள் இருக்கும் என்று எண்ணி அமைதியாக இருங்கள். ஒரு ஃபோனை எடுக்காததோ, மறுமொழி அளிக்காததோ ஒன்றும் அத்தனை பெரிய குற்றமல்ல / அவமானப்படுத்தும் செயல் அல்ல என்று உணருங்கள்.

’நான் பேசிட்டிருக்கும்போது அவன்/அவள்/அவர் கவனிக்கறதே இல்லை’

இன்றிலிருந்து ஏழு நாள் எடுத்துக் கொள்ளுங்கள். அவனுக்கு/அவளுக்கு/அவருக்கு என்ன பிடிக்கும் என்பதை கவனிக்க ஆரம்பியுங்கள். என்ன பேசினால் அவர் உற்று கவனிக்கிறார் என்பதை நீங்கள் உற்று கவனித்து மனதில் பதியுங்கள். அது சம்பந்தப்பட்ட விஷயங்களை அவரோடு அதிகம் பகிருங்கள். கொஞ்சம் கொஞ்சமாக அவர் உங்களுடன் உரையாடும் நேரம் அதிகமாவதை உணர்வீர்கள். அதைவிடவும் முக்கியமாக ஒன்று உண்டு. அவர் உங்களிடம் பேசும்போது, நீங்கள் உற்று கவனியுங்கள். 50% மாற்றம் அங்கிருந்தே ஆரம்பமாகும்.

’ஃப்ரெண்ட்ஸ் நாலு பேர் இருக்கறப்ப ஒருத்தன் மட்டும் போனையே பார்த்துட்டிருப்பான்’

இன்றைய தேதியில் அலுவலகம் / உறவினர்கள் / நண்பர்கள் என்று பலரும் கூடிப் பேசும்போது பெரும்பாலும் பலரும் எதிர்கொள்ளும் சூழல் இது. அடிக்கடி ஒன்று கூடும் நண்பர்கள் பேசிவைத்துக் கொண்டு ஒரு விளையாட்டு விளையாடுங்கள். ‘நாம நாலு பேரும் உட்கார்ந்திருக்கும்போது போன் பாக்கெட்லதான் வெச்சுக்கணும். போன் வந்தா எடுத்துப் பார்த்து, முக்கியம்னா பேசலாம். மத்தபடி போனை எடுக்கக்கூடாது. அப்டி எடுத்தா அன்றைய தேநீருக்கான காசு அவன்தான் கொடுக்கணும்’

இதை ஆரம்பித்துப் பாருங்கள். இரண்டு மாற்றங்கள் உறுதி. ஒன்று போனை எடுப்பது குறையும். இரண்டு, சீக்கிரம் காபி, டீ சாப்பிட்டுவிட்டு வேலையைப் பார்க்கப் போய்விடுவார்கள்.

’காலைல விஷ் பண்ணினா எங்க பாஸ் திரும்ப விஷ் பண்றதே இல்லை’

அதுனால என்ன ப்ரோ? முகம் முழுக்கப் புன்னகையோட தினமும் விஷ் பண்ணுங்க. உங்க மேனேஜர், உங்க சூப்பர்வைஸர், உங்க பாஸ்னு அதிகாரிகள், அலுவலர்கள் யாரை எதிரில் பார்த்தாலும் சிரிச்சுட்டே விஷ் பண்ணுங்க. தினமும். 21 நாள் இடைவெளி இல்லாம இதைப் பண்ணிப்பாருங்க. லீவு நாள் கணக்கில்ல. மத்தபடி தொடர்ந்து ஆஃபீஸ் போற நாட்கள்னு கணக்கு வெச்சுட்டு 21 நாள் இதை தொடர்ச்சியா பண்ணுங்க. அப்டி ஒருநாள் எதிர்ல அவர் வர்றப்ப மறந்துட்டீங்கன்னா, மறுபடியும் முதல்ல இருந்து ஆரம்பிங்க. அப்பறமா உங்களைப் பார்த்ததும் அவங்களே ஆட்டோமேடிக்கா விஷ் பண்ணுவாங்க. இன்னொண்ணு, நீங்களும் உங்களுடன் பணிபுரியறவங்கள பார்த்து மறக்காம விஷ் பண்றது.  

என் கருத்தை என் ஃப்ரெண்ட்ஸ் ஏத்துக்கவே மாட்டீங்கறாங்க.

கவலைப்படாதீங்க. மொதல்ல உங்க கருத்தை ஏத்துக்கணும்னு நெனைக்காம.. புரிஞ்சுக்கணும்னு நெனைக்கறது நல்லது.  குழுவுல பேசறப்ப பேச்சை பாஸிடிவா ஆரம்பிங்க. ‘இல்ல...’ - இந்த வார்த்தைல ஆரம்பிக்காம, ‘ஆமா..’ இந்த வார்த்தைல ஆரம்பிங்க. அப்பறம் மாற்றத்தை நீங்களே உணர்வீங்க. ஃப்ரெண்ட் சொல்றதுக்கு எதிர்கருத்து சொல்றதா இருந்தாலும் ‘ஆமா’வுல ஆரம்பிக்கலாம். உதாரணத்துக்கு..

‘கபாலில ரஜினி நடிப்பு பிடிக்கவே இல்ல மச்சி எனக்கு’

‘இல்ல.. நல்லாத்தான் நடிச்சிருந்தாரு.. நீ சொல்றது எனக்கு உடன்பாடில்ல’ - இப்படி சொல்றதுக்கு பதிலா ‘ஆமா.. கரெக்ட்தான். வேற சிலரும் சொல்லிருந்தாங்க. ஆனா மகளைத் தேடற காட்சில நல்லாதானே நடிச்சிருந்தாரு.. அதுவுமில்லாம...’ இப்படி கொண்டு போனா கடைசில உங்க கருத்தை அவர் ஏத்துக்கறாங்களோ இல்லையோ.. புரிஞ்சுப்பாங்க! 

‘டீமா போனா ஒருத்தன் மட்டும் எப்பவுமே பில்லுக்கு காசு கொடுக்காமயே டபாய்க்கறான்!’

எல்லா ஃப்ரெண்ட்ஸ் க்ரூப்லயும் அப்டி ஒருத்தன் இருப்பார் பாஸ். அவரை ஏத்துக்க முயற்சி பண்ணுங்க. அப்டி இல்லைன்னா,‘சுழற்சி முறை டீ டைம்’ ஃபாலோ பண்ணுங்க. இன்னைக்கு அவர், நாளைக்கு இவர்.. இப்படி. ஆரம்பத்துல அவர் போங்கு காட்டினாலும் எப்டியும் ஒரு கட்டத்துல டீமுக்குள்ள ஐக்கியமாகிடுவார்.

இப்படி உங்களுக்கு பிரச்னை என தோன்றும் விஷயங்களை கேள்விகளாக எழுதி பாருங்கள். அதற்கு என்ன காரணமாக இருக்க முடியும் என்ற பதிலையும் யோசியுங்கள். நீண்ட நாள் இருக்கும் பிரச்னைகளில் ஒன்றையாவது இன்று முடித்துவிடுங்கள். வாழ்க்கை நம் வசமாவது கொஞ்சம் கொஞ்சமாகத்தான் நடக்கும். அந்த 'கொஞ்சம்' இன்றும் நடக்க வாழ்த்துகள்

-பரிசல் கிருஷ்ணா

எடிட்டர் சாய்ஸ்