Vikatan.com

www.vikatan.com would like to send you push notifications.

Notifications can be turned off anytime from browser settings.

“நாங்கள்லாம் தமிழ்நாட்டு அர்னால்டு ப்ரோ” - பெளன்சர்களின் பெர்சனல் பக்கங்கள்

பெளன்சர்

" 'என்னை அறிந்தால்' படம் ஈ.சி.ஆர்ல ஷூட்டிங். அதுல நான் ஒரு போலீஸ் வேடத்துல நடிச்சிருந்தேன். செம வெயில்... நாங்க எல்லாம் ஓரமா நின்னுட்டிருந்தோம். அப்போ தான் தல வந்தாரு... எங்களுக்குப் பக்கத்துல வந்து நின்னார். உடனே. கெளதம் சார் அவருக்கு குடை பிடிக்க ஆள் அனுப்பினாரு. ஆனால் தல...'இவங்கெல்லாம் அப்படியே தான் இருக்காங்க... என்னையும் அப்படியே விடுங்க பரவாயில்ல'ன்னு சொல்லிட்டு எங்கக் கூட வெயில்லயே நின்னாரு...பெரும்பாலும் அவர் ஷூட்ல சும்மா போய் உட்காரவே மாட்டாரு. அதே மாதிரி, கூட நடிக்குறவங்க  எல்லாரும் சாப்பிட்டாங்களாங்கறத உறுதிபடுத்திட்டுத் தான் நடிக்க வருவாரு... தல...தல தான்..." என்று அல்டிமேட் ஓப்பனிங் தருகிறார் ஆபு என்கிற ஆபிரஹாம். 

"தல கூட மட்டுமா தளபதியோட கூடத்தான் நடிச்சிருக்க..." என்று "குட்டி" ஜான் தொடங்க... " அப்படியா... தளபதியோடவும் ஒரு படமா? " என்று நாம் ஷாக்காக, " சார்... கத்தியில நம்மாளுதான் மாஸ் பெர்பாமன்ஸே... ஒரு சீன்ல விஜய் சில்லரைகள வச்சு சண்ட போடுவார். கரண்ட் ஆஃப் பண்ணி ஆன் பண்ணும் போது எல்லாரையும் காலி பண்ணுவாருல்ல... அப்போ கரண்ட் ஆஃப் பண்றதுக்கு முன்னாடி ஒரு ஃப்ரேம்ல நம்மாளு தெரிவாரு... இவன் அலப்பறை இருக்கே..." எனத் தொடங்கும் ஜானை டம்பிள்ஸ் எடுத்து அடிக்கத் துரத்துகிறார் ஆபு. அவர்களைத் தடுக்க ஓடும் ரவி, ராஜ்,செந்தில் என... அவர்கள் விளையாடுவதே 300 படக்காட்சி போல் இருக்கிறது. இவர்கள் அனைவருமே "ஸ்பார்டன்ஸ் வாரியர்ஸ்" குரூப்பின் பிரதான  பௌன்சர்ஸ்... 

கிரேக்கர்கள் காலத்தில் "ஒஸ்டியேரியஸ்" என்று இவர்களுக்குப் பெயர். சர்ச்சில் கூட்டத்தைக் கட்டுப்படுத்துவது, பிரச்னைகள் ஏற்படுத்துபவர்களை அங்கிருந்து நீக்குவது என்பது இவர்களின் பிரதான வேலை. இதன் மாடர்ன் வெர்ஷன் தான் பௌன்சர்கள். அதுவும், சமீபகாலங்களில் பல்வேறு துறைகளில் பெளன்சர்களின் தேவை அதிகரித்திருக்கிறது. விஐபிகளுக்கு, அவர்கள் வீட்டு விசேஷங்களுக்கு, பொது நிகழ்ச்சிகளுக்கு,ஹோட்டல் மற்றும் பப்களுக்கு, கோவில் திருவிழாக்களுக்கு என இவர்களின் தேவை எங்கும் இருக்கிறது. பெரும்பாலும், கல்லூரி மாணவர்கள், வேலைக்கு செல்லும் இளைஞர்கள் என உடலை ஃபிட்டாக வைத்திருப்பவர்கள் இதில் பார்ட் டைம்மாக வேலை செய்கிறார்கள்.

"எங்களோட குழுவ பொறுத்தவரைக்கும் ஃபிட்னெஸ் ட்ரெய்னர், டெக்னீஷியன், அக்கவுண்டன்ட்ன்னு ஆளுக்கொரு வேலை பார்க்கிறோம். பெளன்சர்களாகப் போறது ஒரு பார்ட் டைம் வேலை மாதிரி தான். இதுல எங்களுக்கு ஒரு நாள் சம்பளமா ஆயிரத்துக்கும் குறைவாகத் தான் கிடைக்கும். ஆனா, எங்க உடம்ப பிட்டா மெயிண்டெயின் பண்ண, ஜிம்மிங், டயட் போன்ற விஷயங்களுக்கே எங்களுக்கு ஒரு நாளைக்கு ஆயிரத்து ஐநூறு ரூபாய் வரை செலவாகும்... இருந்தாலும் இது எங்களுக்கான ஒரு அடையாளத்த, எங்க உடம்ப பிட்டா வச்சிருக்குறதுக்கான ஒரு அங்கீகாரத்த கொடுக்குது" என்று சொல்லும் ராஜ் ஒரு பிரிண்டிங் பிரஸ்ஸில் வேலை செய்து வருகிறார். 

"அதிக அலைச்சல், சரியான சாப்பாடு கிடைக்காது, கூட்டத்தைக் கட்டுப்படுத்தும்போது ஏற்படும் பிரச்னைகள் என உடல் வலிமையோடு, மன வலிமையையும் அதிகம் சோதிக்குற ஒரு வேலை இது. பப்பில் இருக்கும்போது போதையாகி பலரும் பல பிரச்னைகளை இழுப்பார்கள், சில பெண்களிடம் தவறாக நடந்து கொள்வார்கள்... சமயங்களில் போதை தலைக்கேறிய நிலையில் சில பெண்கள் எங்களிடமே தவறாக நடந்துக் கொள்ள முயற்சிப்பாங்க... இதயெல்லாம் தடுக்க ஒரு பெளன்சருக்கான முக்கியத் தேவை ஒழுக்கம். ஒரு தடவை, தமிழ் சினிமாவோட முக்கிய ஹீரோ ஒருத்தர்... கூட்டத்த தடுக்கும்போது தெரியாமல் அவர் மீது என்னோட கை பட்ருச்சு. கோபமடைந்த அவர் என்னை பளார்னு அறைஞ்சுட்டார்...இப்படி நிறைய பிரச்னைகளை, சமயங்கள்ல அவமானங்களையும் கூட சந்திக்க வேண்டியிருக்கும்" என்கிறார் "பெரிய" ஜான்.

"பெரும்பாலும் நட்சத்திரங்களோடு தான் நாங்கள் அதிகம் இருப்போம். அவர்கள் எங்களைக் கண்டு செய்யும் ஒரு புன்னகை தான் எங்களுக்கான அதிகபட்ச அங்கீகாரம். "லிங்கா" பட வேலைகளின் போது எங்களின் சீனியர் பெளன்சர் ஒருத்தரை பார்த்து ரஜினி சார் கைகுலுக்கி நன்றி சொன்னார்... அப்புறம் வெளியில் போகும்போது எங்கள் உடலைப் பார்த்து சின்னக் குழந்தைகள்  எங்களை ஹீரோ மாதிரி பார்ப்பாங்க...இதெல்லாம் தான் எங்களின் சின்னச் சின்ன சந்தோஷங்கள்..." என்று சொல்லும் செந்தில் தனியாக ஒரு ஜிம் நடத்திக் கொண்டிருக்கிறார்.

"இது எதிர்காலத்துல ஒரு முறைப்படுத்தப்பட்ட தொழிலா மாறினா எங்களுக்கு நல்ல வாய்ப்பு இருக்கும். இல்லாத பட்சத்துல, இத இதே மாதிரி தொடர்ந்து செஞ்சுட்டு வேற வேலைகளையும் செய்துட்டே இருப்போம். ஒரு 20 வருடங்கள் கழித்து வாழ்க்கைய திரும்பி பார்க்கும் போது மனசுல நல்ல அனுபவங்கள் நிறைஞ்சு இருக்கணும், அதே சமயத்துல எங்க உடம்பும் நல்ல தெம்பா இருக்கணும். ஏன்னா, எங்க உடம்பு தான் எங்களுக்கான அடையாளம், முதலீடு எல்லாமே..."  என்றபடியே உடற்பயிற்சிக்கு கிளம்பினார்கள். இவர்களின் முதலீடு நிச்சயம் பலமானது தான் !!!

- இரா. கலைச் செல்வன்
- ப.சரவணகுமார்

எடிட்டர் சாய்ஸ்

ஜெர்சி மாடுகள், பிரேசில் காபி, மருத்துவமனை உறுதி! ஜெயலலிதா பற்றி தோழியின் நினைவலைகள்
placeholder

அதே மாதிரி ஜெயலலிதா தன்னுடைய 10 வயதில் சிவாஜி கணேசன் முன்னிலையில் மயிலாப்பூரில் செய்த நடன அரங்கேற்றப் படங்கள் முதல் அதற்குப் பிறகான அவரது சின்ன வயசுப் படங்களை நாங்கள் தொகுத்திருந்தோம். அதை 2012 ம் ஆண்டு, எனக்கு அவரை சந்திக்கும் வாய்ப்புக் கிடைத்த போது கொடுத்தேன். அதைப் பார்த்து ரொம்ப சந்தோஷமாகிட்டாங்க. அந்தப் படத் தொகுப்பை, தன்னோட ஹேண்ட் பேக்ல வச்சுக்கிட்டாங்க. பத்திரமா வைத்துக் கொள்வதாகவும் சொன்னாங்க. சினிமாக்காரங்க என்றால் ஈஸியாக அணுகலாம் என்கிற திரையை உடைத்து, அவங்க தனி ரூட்டைப் போட்டு, அதை மத்தவங்க ஃபாலோ பண்ற அளவுக்கு வாழ்ந்து காட்டினாங்க. குறிப்பா, சினிமா விழாக்கள், நிகழ்ச்சிகளுக்கு போக மாட்டாங்க. 

அம்மாவிடமிருந்து போன் வந்தால்...!? - உருகும் வீணை காயத்ரி
placeholder

''சமீபத்தில் கொலை மிரட்டல் விட்டப் பையனால் அம்மாவை சந்திக்க வேண்டிய சூழ்நிலை ஏற்பட்டது. கடந்த ஜூலை 27-ம் தேதி சி.எம் ஆபீஸ்ல இருந்து போன் வந்தது. அம்மா உங்களை உடனே வரச்சொன்னதா சொன்னாங்க. நான் கொஞ்சமும் யோசிக்காமல் போய் நின்னேன். பொதுவாகவே நானும், அவங்களும்தான் தனியாகத்தான் பேசிப்போம். ஆனா, அன்றைக்கு, எல்லா அதிகாரிகளும், இருந்தாங்க. அவங்க முன்னாடி, 'எப்படி இருக்கீங்க' என கேட்டார். நான் பதில் சொல்லிவிட்டு, 'நவம்பர் மாதத்தோடு என்னோட டர்ன் முடியுது' என சொன்னேன். இதற்கு அவர், எல்லோருடைய முன்னிலையிலும், அடுத்த மூன்று வருஷத்துக்கும் நீங்களே துணை வேந்தரா இருங்க என சொல்லிவிட்டு, அவருக்கு பின்னால் இருக்கும் எல்லோரையும் பார்த்து மறுபடியும்  இதையே சொன்னார். அப்போதுதான் அவர்கிட்ட, 'நான் உங்களை சந்திக்க இரண்டு வருஷமாக முயற்சி செய்துட்டு இருந்தேன். இந்த கொலை மிரட்டல் காரணமாகத்தான் உங்களை சந்திக்கிற வாய்ப்பு கிடைச்சிருக்கு, நான் தனி மனுஷியாக இசை பல்கலைக்கழகத்தை நடத்தி வருகிறேன்' என சொன்னேன். உடனே, சம்பந்தப்பட்டவர்களை அழைத்து, அவங்களுக்குத் தேவையான எல்லா உதவிகளையும் செய்து கொடுங்க என சொன்னார்.  'அடுத்த முறைப் பார்க்கும்போது உங்க முகத்துல சிரிப்பை மட்டும் தான் பார்க்கணும்' என ஆறுதல் சொன்னாங்க. அந்த வார்த்தை இன்னும் என் காதில் கேட்டுட்டே இருக்கு. அதுதான் நான் அவங்களை கடைசியாகப் பார்த்தது.  அதற்குப் பிறகு அவரை பார்க்க முடியவில்லை. அவர் சொன்னது போல அதற்கான வேலைகள் நடந்து கொண்டிருக்கும்போதே அம்மா மருத்துவமனையில் அனுமதிக்கப்பட்டுட்டாங்க. நான் இப்போ அடுத்த ஆர்டருக்காக காத்திட்டு இருக்கேன். இன்னும் ஆர்டர் என் கைக்கு வரவில்லை''

MUST READ