Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

மனித இன மர்மங்களை டார்வினுக்கு விளக்கிய தீவு இதுதான்!

அந்தக் கப்பலின் பெயர் ஹெச்.எம்.எஸ். பீகிள் ( HMS Beagle ) . பசிபிக் பெருங்கடலில் தன் பயணத்தை மேற்கொண்டிருந்தது. நீண்ட நாள் பயணம் தான். இருந்தும் பயணங்களை விரும்பும், தேடலை தேடும் பெருங்கூட்டம் அந்தக் கப்பலில் இருந்ததால் பீகிளும் சளைக்காமல் உற்சாகமாக தன் பயணத்தை தொடர்ந்தது. அந்த நிலப்பரப்பைக் கண்டுவிட்டார்கள். அவர்கள் கால்வைத்த அந்த தீவின் பெயர் " சான் க்ரிஸ்டபல்". கடுமையான வெப்பமும், புகையும், தூசுகளும் சூழ்ந்திருந்த அதில் கால்வைத்ததும்... " இந்த பூமியின் நரகம் இது" என்று சொன்னார் அந்த நீளமான தாடிக்காரர். மனித இனத்தின் தோற்றத்தையும், பரிணாம வளர்ச்சியையும் தேடி உலகம் முழுக்க சுற்றிக் கொண்டிருந்தார் அந்த தாடிக்காரர். ஐந்து வாரங்கள் அந்தப் பகுதியிலிருக்கும் தீவுகளில் தங்கியிருந்தார். அந்த நரகத்தில் இருக்கும் போது தான்... தன் வாழ்நாள் கனவை அடைவதற்கான வழி அவருக்குத் தெரிந்தது. அங்கிருந்து தான் மனித இனத்தின் பரிணாம வளர்ச்சியை அவர் உணர்ந்தார். மனித சமுதாயத்தின் ஆகப்பெரும் படைப்பாக கருதப்படும் " உயிரினங்களின் தோற்றம்  " ( The origin of Species ) எனும் நூலைப் படைத்தார் அந்தத் தாடிக்கார சார்ல்ஸ் டார்வின். 

கலாபகஸ் தீவுகள்

ஈக்வேடார் ( Ecuador ) நாட்டின் பகுதியில், பசிபிக் பெருங்கடலில் ஓடும் பூமத்திய ரேகையின்  ( Equator ) இரு பக்கங்களிலும் இருக்கும் தீவுக் கூட்டம் தான் கலாபகஸ் ( Galapagos ). உலகிலேயே தனித்துவமான உயிரியல் வாழ்க்கையும், பூகோள வரையறைகளையும் கொண்ட ஓர் நிலப்பரப்பு. டார்வினைத் தொடர்ந்து, இன்றுவரை இந்தத் தீவுகளில் எத்தனையோ ஆராய்ச்சிகள் மேற்கொள்ளப்பட்டு, எத்தனையோ ஆச்சர்யங்களை வெளிக்கொண்டு வந்துள்ளார்கள். ஆனால், அதனுடைய தனித்துவமான உயிரியல் வாழ்க்கை எப்படி உருவானது ? என்ற கேள்விக்கான விடை கிடைக்காமலேயே இருந்தது. ஆனால், சமீபத்தில் சில ஆராய்ச்சியாளர்கள் அதற்கான விடையைக் கண்டறிந்திருப்பதாக சொல்லியிருக்கிறார்கள். 

கலாபகஸ் தீவுகளில் இருக்கும் பெரிய ஆமைகள்

ஒரு கோடியே, நாற்பது லட்சம் ஆண்டுகளுக்கு முன்னர் ஏற்பட்ட பெரும் எரிமலை வெடிப்பிலிருந்து 19 பெருந்தீவுகளும், 120 சிறு தீவுகளும் உருவாகின. அது முழுக்கவே எரிமலைக் குழம்பின் படிமங்களாக நிறைந்திருந்தன. பின்னர், காற்றும், மழையும் அதை செழிப்பான மண்ணாக மாற்றின. மண்ணில் சில நுண்ணியிரிகள் உருவாகியிருக்கும். பின்னர், காற்றும், கடலும், மழையும், வெயிலும் இணைந்து அங்கு ஓர் புது உயிர்ச்சூழலை உருவாக்கியிருக்கும். இது தான், கலாபகஸ் தீவுகளின் தோற்றமாக இருந்திருக்கும் என்கிறார்கள் ஆராய்ச்சியாளர்கள். 

கலாபகஸ் தீவுகளில் இருக்கும் பென்குயின்கள்

எரிமலைகள் இருப்பதால் கிழக்குப் பகுதி அதிக வெப்பமாக இருக்கும். அதே சமயம், அதன் மேற்குப் பகுதி குளிர்ந்த நிலையில் காணப்படுகிறது. எந்தளவிற்கு என்றால், பல  பென்குவின் கூட்டங்கள்  அங்கு ஆரோக்கியாக வாழ்ந்து வருகின்றன. கடலுக்கடியில் ஏற்படும் சில மாற்றங்களால் தீவுக்கூட்டங்களின் பழைய தீவுகள் கொஞ்சம் கொஞ்சமாக கடலுக்குள் மூழ்குகின்றன. அதிலிருக்கும் உயிரினங்கள் அடுத்த தீவுகளுக்கு இடம் பெயர்கின்றன. மற்றுமொரு ஆச்சர்யம், ஒரு தீவிலிருக்கும் ஆமைகளும், மற்றொரு தீவிலிருக்கும் ஆமையும் ஒரே மாதிரியாக இருப்பதில்லை. ஆமை, மட்டுமல்ல பல உயிரினங்களில் இந்த வித்தியாசங்கள் இருக்கின்றன. இத்தனைக்கும் தீவுகளுக்கிடையே பெரிய தூரங்கள் கிடையாது. 

கலாபகஸ் தீவுகளில் நீச்சலடிக்கும் பல்லி

நீச்சலடிக்கும் பல்லி...

இந்தத் தீவுகளில் மட்டுமே காணப்படும் பல உயிரினங்கள் இருக்கின்றன. உலகின் பிற பகுதிகளில் இருக்கும் உயிரினங்கள் சிலவும் இங்கிருந்தாலும், அதன் குணங்கள் தனித்தன்மை வாய்ந்தவையாக இருக்கின்றன. 

கலாபகஸ் தீவின் சில ஆச்சர்யங்கள்...

-  கலாபகஸ் பென்குயின் இனங்கள் சற்றே மாறுபட்டவையாக இருக்கின்றன. பனி சூழாமல், குளிர்ந்த நீர் இருக்கும் இடத்தில் இவை வாழ்கின்றன. பொதுவாக, பென்குவின் கூட்டங்களில் குட்டி வளர்ந்ததும் அது தனக்கான தனிக் குடும்பத்தை உருவாக்கிக் கொண்டு போய்விடும். ஆனால், இங்கிருப்பவை தனியாகப் போனாலும் தன் பெற்றோர்களிடத்தில் தொடர்ந்து தொடர்பு வைத்துக் கொண்டிருக்கின்றன. உணவு உட்பட பல விஷயங்களை தாயிடமிருந்து பென்குவின்கள் வாங்கிப் போகும் அதிசயம், இங்கு மட்டுமே காணக்கிடைக்கும். 

- இந்தத் தீவில் தனித்துவமான சீல் மற்றும் கடற் சிங்கம் இருக்கின்றன. 

- கார்மோரன்ட் ( Cormorant ) என்றொரு பறவையினம் இருக்கிறது. நீண்ட தூரம் பறக்கும் தன்மை வாய்ந்தது. ஆனால், கலாபகஸ் தீவில் இருக்கும் எந்த கார்மோரன்ட் பறவையும் பறப்பதில்லை. பறக்கும் தன்மையே அவைகளுக்கு இல்லை. 

- உலகில் எங்கும் காணக்கிடைக்காத மிகப் பெரிய ஆமைகள் இங்கிருக்கின்றன. 

- நீல நிற பாதங்களைக் கொண்ட பூபி ( Blue Footed Booby ) என்ற ஓர் பறவை இங்கிருக்கிறது. 

- கடலில் நீச்சலடிக்கும் ஒரு அதிசய பல்லியினம் இங்கிருக்கிறது. அதற்கு பிங்க் இகுனாஸ் ( Pink Iguanas ) என்று பெயர்.

- பிண்டா ஆமை ( Pinta Tortoise ) என்ற ஓர் ஆமை இனம் இங்கிருந்தது. ஆனால், அவை அழிந்துவிட்டன. அந்த இனத்தின் கடைசி ஆளாக, தன்னந்தனியாக வாழ்ந்து வந்த ஆமைக்கு ஜார்ஜ என்று பெயரிட்டிருந்தனர் ஆராய்ச்சியாளர்கள். 100 வயது வரை வாழ்ந்த ஜூன் 24, 2012 அன்று இறந்து போனான். அந்த மொத்த இனமும் அதோடு அழிந்தது. 

- இங்கு வருடம் முழுக்கவே பகல் சரியாக 12 மணி நேரமும், இரவு 12 மணி நேரமுமாக இருக்கிறது.

கலாபகஸ் தீவுக் கூட்டத்தின் மிகப் பழமையான தீவின் பெயர் எஸ்பனோலா. இது 3.5 மில்லியன் வருடங்கள் பழமையானது எனச் சொல்லப்படுகிறது. சமீபத்தில் தோன்றிய தீவாக அறியப்படுவது ஃபெர்னன்டினா. 1 மில்லியன் ஆண்டுகள் பழமையானது. இந்த மொத்த தீவுகளும் ஈக்வேடார் நாட்டின் ஆளுகைக்குக் கீழ் வருகின்றன. இந்த தனித்துவமான பல்லுயிர்ச் சூழலைக் கொண்ட தீவுக்கூட்டத்தைப் பாதுகாக்க, ஈக்வேடார் அரசு பலவித முயற்சிகளை மேற்கொண்டு வருகிறது. ஆராய்ச்சியாளர்களுக்கு மட்டுமே இந்த தீவிற்கு செல்ல அனுமதி வழங்குகிறது. மொத்தத் தீவுகளின் பரப்பளவில் 2% அளவிற்கு மட்டுமே சுற்றுலாவை அனுமதிக்கிறது. அதற்கும் நிறையக் கட்டுப்பாடுகள் இருக்கின்றன. 

கலாபகஸ் தீவுகளில் வாழ்ந்த ஜார்ஜ் ஆமை

தனியொருவன் ஜார்ஜ்...

இப்படியாக பாதுகாத்து வந்தும் கூட பல்வேறு காரணங்களால், கலாபகஸ் தீவுகளின் இயற்கைச் சூழல் பெருமளவு பாதிக்கப்பட்டுள்ளது. இந்தப் பூமி குறித்த பல அறியாத மர்மங்களை அறிந்து கொள்ள, கலாபகஸ் தீவுகள் பத்திரமாக இருக்க வேண்டியது மிகவும் அவசியம் என்கிறார்கள் ஆராய்ச்சியாளர்கள். 


- இரா. கலைச் செல்வன்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close