Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

உலகமே அலர்ட்... 15,000 உயிரினங்கள் சுட்டிக் காட்டும் அழிவின் ஒலி..!

இந்தக் கதைகளைப் படித்து முடித்ததும் சில நிமிடங்கள் கண்களை மூடி உட்காருங்கள். சுற்றியிருக்கும் இயற்கையின் ஒலிகளைக் கேளுங்கள். அதில் உங்களுக்குச் சில விஷயங்கள் கேட்கலாம். பல விஷயங்கள் புரியலாம். 

தன் உரையை இப்படித் தொடங்குகிறார் பெர்னி க்ராவ்ஸ் ( Bernie Krause ) .

"சான் பிரான்சிஸ்கோவிற்கு கிழக்கே இருக்கும் சியரா நிவேடா மலைப்பகுதியின் ' லிங்கன் மியடோ'. 1988 ல் நான் பதிவு செய்த இந்த ஒலியைக் கேளுங்கள் ..." என்று சொல்லி அதை ஒலிக்க விடுகிறார். ஓடையின் மெல்லிய சத்தம், பறவைகள் பறக்கும்போது வரும் சிறகடிக்கும் சத்தம், காதலோடும், அன்போடும் அவை பாடும் சத்தம், பூச்சிகளின் சத்தம் என... அத்தனை இன்பமாய் இருக்கிறது. அந்தக் காலத்தில் எடுக்கப்பட்ட ஒரு புகைப்படத்தைக் காண்பிக்கிறார். பசுமையாக இருக்கிறது. 

இயற்கையின் ஒலி

" 1988 ல் அங்கு மரம் அறுக்கும் ஒரு தனியார் நிறுவனம் வந்தது. அந்தப் பகுதி மக்களிடம், 'நாங்கள் 'செலக்டிவ் லாகிங்' என்ற புது முறையில் மரங்களை வெட்டப் போகிறோம். இதனால், காடு மொத்தமாக அழிக்கப்படாது. அங்கொன்றும், இங்கொன்றுமாக மரங்களை வெட்டுவோம். காட்டின் உயிர்ச்சூழலுக்குப் பாதிப்பு ஏற்படாது ' என்று சொல்லி வேலைகளைத் தொடங்குகிறார்கள். இப்போது இதைக் கேளுங்கள்...." என்று சொல்லி சமீபத்திய புகைப்படம் ஒன்றையும் காண்பிக்கிறார். காட்டின் முகப்பைக் காட்டும் அந்த இரண்டு புகைப்படங்களில் பெரிய மாற்றமில்லை. ஆனால், அந்த ஒலி... அது சொல்லும் செய்தி அபாயகரமானதாக இருக்கிறது. 

இப்போது கேட்கும் அந்த ஒலியில்... ஓடையின் சலசலப்பு அதிகமாகக் கேட்கிறது. காற்றின் ஓசை மெலிதாகக் கேட்கிறது. பறவைகளின் அந்த இன்பச் சத்தங்களை ஒன்றும் கேட்க முடியவில்லை. சில மரங்கொத்திப் பறவைகளின் " டொக்...டொக்..." என்ற ஒலி கேட்கிறது. அது ரொம்பவே வறட்சியான ஓர் ஒலியாகக் கேட்கிறது. இப்படியாக, காட்சிகளால் அதிக மாற்றத்தைக் கண்டிராத பல இடங்களின் ஒலி மாற்றத்தை, ஒலிக்கவிடுகிறார். அதில் இயற்கை அழிக்கப்படும் பேரவலத்தின் அழுகுரல் அத்தனை ஆழமாய்க் கேட்கிறது. 

இயற்கையின் ஒலி

" ஒரு புகைப்படம் ஆயிரம் வார்த்தைகளுக்குச் சமம். ஒரு ஒலிக் குறிப்பு ஆயிரம் புகைப்படங்களுக்கு சமம்... ஆனால், காட்சியின் ஈர்ப்பு, ஒலியின் குரலை அழுத்திவிடுகிறது. இந்த இயற்கையின் அழிவை காட்சிகள் மூலம் உணர்வதைவிட, ஒலிகளின் மூலம் உணர்வதுதான் உண்மைகளை எடுத்துரைக்கும் " என்று சூழலியல் பிரச்னைக் குறித்த மிக முக்கியக் கருத்தைப் பதிவு செய்கிறார் பெர்னி. உலக இசைக் கலைஞர்கள் வகையிலும், சூழலியலார்கள் வகையிலும் பெர்னி மிகவும் தனித்துவமானவர்.

அமெரிக்காவைச் சேர்ந்த பெர்னி தன்னுடைய நான்கு வயதிற்குள்ளாகவே கிடார் இசையில் தேர்ச்சிப் பெற்றிருந்தார். தொடர்ந்து ஹாலிவுட் உலகில் முக்கிய இசைக் கலைஞராக இருந்து வந்தார். " வீவர்ஸ்" என்ற புகழ்பெற்ற இசைக் குழுவைத் தொடங்கி, உலகம் முழுக்க பல இசைக் கச்சேரிகளை நடத்திவந்தார். 1968ம் ஆண்டில் வார்னர் பிரதர்ஸ் நிறுவனம், தன்னுடைய ஒரு படத்திற்காகக் காட்டின் ஒலிகளைப் பதிவு செய்ய விரும்பி பெர்னியைக் காடுகளுக்கு அனுப்பியது. அதுவரை அறைகளுக்குள்ளும், ஸ்டூடியோக்களிலும், மேடைகளிலும் மட்டுமே இசை இருப்பதாக நினைத்திருந்த பெர்னிக்கு... அந்த இயற்கையின் ஒலி... தனி ஒளியைப் பாய்ச்சியது. அந்த ஒலிகளைக் கேட்ட அந்த நொடி..இனி இங்குதான், இதில்தான், தன் மிச்ச வாழ்வும் அடங்கியிருப்பதாக நம்பினார். தொடர்ந்து பயணித்து இயற்கையிடம் தன் காதுகளைக் கொடுத்து கேட்க ஆரம்பித்தார். 

இயற்கையின் ஒலி

இதுவரை 4500 மணிநேரங்களை இந்த ஒலிகளைப் பதிவு செய்வதில் செலவிட்டுள்ளார். 15 ஆயிரத்திற்கும் அதிகமான உயிரினங்களின் சத்தங்களைப் பதிவு செய்துள்ளார். உலகின் பல காடுகள் அழிந்த வரலாற்றை ஒலிக்குறிப்புகளாக தன்னிடம் வைத்துள்ளார். 
" 40 வருடங்களுக்கு முன்னர் 10 மணி நேரம் பதிவு செய்தால், அதிலிருந்து ஒரு மணி நேரத்திற்கான தரமான ஒலிக் குறிப்புகளைப் பிரித்தெடுக்க முடியும். ஆனால், இன்று பூமி வெப்பமயமாதல், வளங்கள் சூறையாடப்படுவது, காடுகளுக்குள் மனிதனின் கைகள் ஓங்கியது உட்பட பல காரணங்களால் கிட்டத்தட்ட ஆயிரம் மணி நேரங்களைச் செலவிட்டால் தான் அந்த ஒரு மணிநேர ஒலிக் குறிப்பை நம்மால் எடுக்க முடிகிறது.." என்று சொல்கிறார். 

அறிவியல்பூர்வமாகவும், தொழில்நுட்ப ரீதியிலும் ஒலிப்பதிவு சம்பந்தமாக இவர் பல கண்டுபிடிப்புகளையும், கோட்பாடுகளையும் உருவாக்கியிருக்கிறார். ஒரு குறிப்பிட்ட இடத்தில் இருக்கும் ஒலிக்குறிப்பை இவர் மூன்று வகைகளாகப் பிரிக்கிறார். 

ஒரு இடத்தில் ஒலிக்கும் உயிரற்ற உயிர்களின் ஒலியை... எ-கா - மரத்திலிருந்து வரும் காற்றின் ஓசை, கடல் அலைகளின் ஓசைப் போன்றவை ஜியோஃபோனி ( Geophony ).

ஒரு இடத்தில் வாழும் உயிர்கள் எழுப்பும் சப்தங்கள்... எ- கா - பறவைகள், மிருகங்கள் , மீன்கள் எழுப்பும் சப்தங்கள் பயோஃபோனி ( Biophony ). 

ஒரு இடத்தில் மனிதன் ஏற்படுத்தும் அல்லது மனிதனால் ஏற்படுத்தப்படும் சப்தங்களை ஆந்த்ரோஃபோனி  ( Anthrophony ) என்று வகைப்படுத்துகிறார். இதில் தன்னுடைய 40 ஆண்டுகால வனப் பயணங்களில்  ஜியோஃபோனியும், பயோஃபோனியும் மிக அதிக அளவில் பாதிக்கப்பட்டுள்ளதாகக் கூறியுள்ளார். 

இயற்கையின் ஒலிகளை பதிவு செய்யும் பெர்னி

தன் வாழ்வில், தன்னை உலுக்கிய, தன் கண்ணீரை உருக்கியெடுத்த ஓர் ஒலியைப் பற்றி பெர்னி எப்போதும் குறிப்பிடுவார். 
அது கிட்டத்தட்ட 16 ஆயிரம் ஆண்டுகளுக்கு முன்னர் உருவான ஓர் ஏரி. பனிக்காலத்தின் இறுதி நாட்களில் உருவான ஏரி. அதில் ஒரு நீர்நாய்க் குடும்பம். நீர்நாய்கள் பொதுவாக , தங்களைக் காத்துக் கொள்ள சிறு குளம் போல் உருவாக்கி, அரண்களை ஏற்படுத்தி வாழும். அன்றும் அப்படித்தான்... அந்தப் பெண் நீர்நாயும், அதன் குழந்தைகளும் மகிழ்ச்சியாக விளையாடிக் கொண்டிருந்தன. ஆண் நீர்நாய் உணவை சேகரிக்க சென்றிருந்தது. பெர்னியின் நண்பர் அந்த சந்தோஷப் பாடல்களைப் பதிவு செய்து கொண்டிருந்தார். அப்போது... அங்கு திடீரென வந்த அந்த வனக் காவலர்கள் சிறு குண்டை அந்த நீர்நாய்களின் வீட்டில் போடுகின்றனர். சிரித்தபடியே அங்கிருந்து நகர்கிறார்கள். 

சில நிமிடங்களுக்கு முன்னர் வரை பிள்ளைகளோடு விளையாடிக் கொண்டிருந்த அந்த நீர்நாய்கள் செத்து மிதந்தன. அங்கு நிலவும் அந்த அமைதியையும் ஒலிப்பதிவு செய்தபடியே , அந்த நண்பர் என்ன செய்வதென அறியாமல் நீண்ட நேரம் அங்கேயே உட்கார்ந்திருந்தார். அப்போது... உணவு சேகரிக்கச் சென்றிருந்த அந்த நீர்நாய் அங்கு திரும்ப வந்தது. தன் மனைவிக்கும், பிள்ளைகளுக்கு உணவளிக்கலாம்... அவர்களோடு சேர்ந்து விளையாடலாம் என்ற ஆசையோடு வந்து பார்க்கிறது. அங்கு தன் மொத்தக் குடும்பமும் சின்னாபின்னமாய் கிடப்பதைக் கண்டு அமைதியாக இருக்கிறது.

இயற்கையின் அழுகுரல்

சில நிமிடங்கள் கழித்து, மெதுவாக நீந்தத் தொடங்குகிறது. நீந்திக் கொண்டே மெதுவாக அழத்தொடங்குறது. கொஞ்சம், கொஞ்சமாக கதறியழத் தொடங்குகிறது. தன்னுடைய முழு பலத்தையும் கொண்டு, இயன்ற வரை... கத்தி அழுகிறது. அந்தக் குரல் தான்... அந்த வலி மிகுந்த குரல் தான் இதுவரை தான் கேட்ட குரல்களிலேயே வேதனையானது என்று குறிப்பிடுகிறார் பெர்னி. 

இயற்கைக்கு எதிராக மனிதன் நடத்தும் யுத்தத்தில் இது போன்ற சின்னஞ்சிறு உயிர்களின் அழுகுரல் வெளியில் கேட்காமலேயே அழுந்திவிடுகிறது. ஆனால், அது ஒவ்வொன்றும் சாவின் வலி... அழிவின் ஒலி... அவைகளுக்கு மட்டுமல்ல, மனிதர்களுக்கும் தான் என்று சொல்கிறார் பெர்னி க்ராவ்ஸ். 

Advertisement
Advertisement
Advertisement

எடிட்டர் சாய்ஸ்

“மாட்டின் மீதான அக்கறை, சிசுக்கள் மீது கிடையாதா?!” நெஞ்சு பொறுக்குதில்லையே #GorakhpurTragedy
Advertisement

MUST READ

Advertisement
[X] Close