Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

சிறந்த போர்ட்ஃபோலியோவை உருவாக்குவது எப்படி? 

நம் வாழ்வில் ஃபிக்சட் டெபாசிட், மியூச்சுவல் ஃபண்ட், பங்குச் சந்தை, தங்கம் உள்படப் பல நிதி சார்ந்த விஷயங்கள் உதவியாக இருக்கின்றன. இவை நம் வாழ்வை வளப்படுத்த மிகவும் உறுதுணையாக இருப்பவை. தற்பொழுது நிலவுகின்ற பொருளாதாரச் சூழலில் ஒரு நல்ல போர்ட்ஃபோலியோ உருவாக்குவதற்கு சில மிக முக்கியமாக முடிவுகளை எடுக்க வேண்டியுள்ளது. இந்த நிலையில் ஒரு நல்ல போர்ட்ஃபோலியோ உருவாக்குவது எப்படி என்பது குறித்து நிதி ஆலோசகர் ரவிக்குமாரிடம் கேட்டோம்... 

போர்ட்ஃபோலியோ

"சிறந்த போர்ட்ஃபோலியோவை தொடங்குவதற்கு முன் 2 விதமான விதிமுறையைப் பின்பற்ற வேண்டும். 

விதி1: காந்தாரி விதி 

விதி2: ஏகலைவன் விதி 

முதல் ரகம்! 

இந்த நிலையில் இருப்பவர்கள் பெரும்பாலும் புதிதாய் வேலையில் சேர்ந்து இருப்பவர்கள் மற்றும் புதிய தொழில் தொடங்கி இருப்பவர்கள். இவர்கள் ஒரு டீமேட் கணக்கைத் தொடங்காமல் இருந்தால் தொடங்குவது நல்லது. இதை அவர்கள் வங்கியில்கூட தொடங்கிக் கொள்ளலாம். எவ்வளவு சேமிக்க முடியுமோ அதை நான்கு பங்காகப் பிரித்து முடிந்தவரை மாதத்தின் அடிப்படையில் சேமிக்க வேண்டும். டீமேட் கணக்கு மூலமாக ஒரு சிறந்த பங்கை தேர்ந்தெடுத்து, முடிந்த அளவு வாங்கி வைத்துக்கொள்ள வேண்டும். அதேபோல் ஒரு பிபிஎஃப் கணக்கும் தொடங்கிக் கொள்ளலாம். அதில் மாதத்தின் அடிப்படையில் அல்லது வருடத்தின் அடிப்படையில் சேமித்து வரலாம். அதேபோல் மூன்றாவதாக மாதத்தின் அடிப்படையில் டைவர்சிஃபைட் போர்ட்ஃபோலியோ மியூச்சுவல் ஃபண்டில் 10 அல்லது 15 ஆண்டுகள் அல்லது முடிந்தால் கால அளவு நிர்ணையிக்காமல் முதலீடு செய்து வரலாம். நான்காவதாக ஒரு நல்ல யுனிட் லின்க் பிளானை எடுத்துக்கொண்டு குறைந்தது 10 அல்லது 15 வருடங்களுக்கு பிரீமியம் செலுத்தி வரலாம். 

மேலே கூறிய நான்கும், முதலில் கூறியதைப் போல் காந்தாரி விதியின் படி கண்ணை மூடிக்கொண்டு முதலீடு செய்து வரவேண்டும். முடிந்த அளவிற்கு இந்த நான்கு முதலீடுகளும் செய்து வந்தால் நல்லது அல்லது அவரவர் வசதிக்கேற்ப எது முடியுமோ அதில் முதலீடு செய்துகொண்டு வரலாம். அப்படிச் செய்துகொண்டு வந்தால் அந்த முதலீடு பல நல்ல பலன்கள் தரும். இது அவர்களின் வெவ்வேறு வாழ்க்கைத் தரத்துக்கு உறுதுணையாக இருக்கும். 

இரண்டாவது ரகம்! 

இந்த ரகத்தில் உள்ளவர்கள் திருமணம் ஆகி இருப்பவர்கள். ஏற்கெனவே செய்த முதலீடுகளுடன் இன்னும் சில முதலீடுகளை அவரவர் வசதிக்கேற்ப சேர்த்துக் கொள்ளலாம். குழந்தை இருக்கும் பட்சத்தில் சில மியூச்சுவல் ஃபண்ட்கள் குழந்தைகளுக்கென்றே பிரத்தியேகமாகத் திட்டங்கள் உள்ளன. அந்தத் திட்டத்தில் சேர்ந்து மாதத்தின் அடிப்படையில் நீண்ட காலத்துக்கு அந்தக் குழந்தையின் பெயரில் முதலீடாகச் சேர்த்துக்கொண்டு வரலாம், இதுவும் காந்தாரி விதியைப் பின்பற்றி முதலீடு செய்துகொண்டு வர வேண்டும். இந்தக் காலத்தில் தங்களால் முடிந்த அளவிற்கு ஸ்மால் மற்றும் மிட் கேப் மியூச்சுவல் ஃபண்ட்களில் எஸ்ஐபி முறையில் 3 அல்லது 5 வருடங்கள் இலக்காக வைத்து முதலீடு செய்து வரலாம் அல்லது அந்த முதலீடு ஒரு குறிப்பிட்ட அளவு லாபம் கொடுத்தால் அதை வைத்து அவர்கள் வாழ்க்கைக்கு வேண்டியவற்றைப் பூர்த்தி செய்து கொள்ளலாம். இது ஏகலைவன் விதியாகப் பின்பற்றலாம். 

இந்தக் கால கட்டத்தில் நல்ல பேலன்ஸ் ஃபண்டில் ஒரே தவணையாகவோ அல்லது மாதத்தின் அடிப்படையில் முதலீடு செய்து வந்தால் உறுதுணையாக இருக்கும். இந்தக் கால கட்டத்தில் அவரவர் தங்களின் மதிப்பை உணர்ந்து அதற்குத் தகுந்தார் போல் ஒரு நல்ல டேர்ம் பிளான் எடுப்பது நல்லது. சில நிறுவனங்கள் ஒன் டைம் பிரீமியம் மூலம் சேர்வதால் பாலிசி எப்பொழுதும் காலாவதி ஆகாமல் இருக்கும். அப்படி இல்லாமல் வருடத்துக்கு ஒருமுறை பிரீமியம் செலுத்தி பாலிசி காலாவதி ஆகாமல் பார்த்துக்கொள்ள வேண்டும். இதேபோல் குடும்ப உறுப்பினர் அனைவருக்கும் மருத்துவக் காப்பீடு செய்துகொள்ள வேண்டும். அதற்குரிய பிரீமியம் தொகையைத் தவறாமல் செலுத்தி புதுப்பித்துக் கொள்ள வேண்டும். இந்தக் காலகட்டதில் மகள்கள் இருந்தால் கோல்ட் இடிஎஃப்-ல் முதலீடு செய்து வரலாம். நீங்கள் எவ்வாறெல்லாம் முதலீடு செய்கிறீர்கள், எதில் முதலீடு செய்கிறீர்கள் என்பதைப் பொருத்து, ஒவ்வொரு முதலீட்டுக்கும் ஒரு குறிக்கோளுடன் சேமித்து வர வேண்டும். உதாரணமாக மகளின் திருமணம், பிற்கால ஓய்வூதியம் என்று இருந்தால் நல்லது. 

இந்த ரகத்தில் இருப்பவர்கள் முடிந்தவரை மகனோ, மகளோ வேலைக்குச் சென்று அவர்களைப் பொருளாதார சுமைகளைப் பங்கீட்டு கொள்வார்கள் என நம்புகிறேன். நாம் செய்யும் முதலீடுகள் பற்றியும், முதலீட்டுக்கான நோக்கம் பற்றியும் குடும்ப உறுப்பினர்களிடம் தெரிவிப்பது நல்லது. அசௌகரிய காலங்களில் அதை எவ்வாறு பயன்படுத்த வேண்டும் என்பதையும் அவர்களிடம் தெரிவித்து வைக்க வேண்டும். 

மூன்றாவது ரகம்! 

இந்த நிலையில் உள்ளவர்கள் பெரும்பாலும் 50 அல்லது 55 வயதுக்கு மேற்பட்டவராக இருப்பார்கள். இந்த நிலையில் உள்ளவர்களுக்கு மேலே குறிப்பிட்டதைப் போல் முதலீடு செய்து வந்தால் அந்த முதலீடுகள் ஒரு நல்ல வளர்ச்சியைக் கொடுத்திருக்கும். இப்பொழுது அவர்கள் தங்கள் ஓய்வு காலத்தை அமைதியாகக் கழிப்பதை குறிக்கோளாகக் கொள்ள வேண்டும். ஏகலைவன் விதியின் படி அந்தக் காலகட்டத்தில் ஒரு நல்ல டெப்ட் ஃபண்ட் உடன் சிறு ஈக்விட்டி ஃபண்ட் உள்ள சில திட்டத்தில் முதலீடு செய்யலாம். இதில் உள்ள நன்மை என்னவென்றால் அந்த ஃபண்டில் வரும் டிவிடென்ட் மற்றும் வளர்ச்சிக்கு வருமான வரி கட்ட தேவையில்லை. இன்றைய பேலன்ஸ்ட் ஃபண்ட்கள் மாதத்தின் அடிப்படையில் டிவிடென்ட் கிடைக்கின்றன, பாண்ட் ஃபண்ட்ல் ஒரு நல்ல வளர்ச்சியுடன் டிவிடென்ட் 
கிடைக்கிறது. 

ஒரு சிறந்த முதலீடுகளைச் செய்வதன் மூலம் ஓரளவுக்கு முதுமையின் போது அன்றாடம் தேவைப்படும் செலவுகளுக்கும் வாழ்க்கை வாழ்வதற்கும் உறுதுணையாக இருக்கும். இதில் பெரும்பாலும் மியூச்சுவல் ஃபண்ட் முதலீடுகளைக் குறிப்பிட்டுள்ளன. இன்றைய நடுத்தர வர்க்கத்தினருக்கு மியூச்சுவல் ஃபண்ட் முதலீடுகள் பெரும் உறுதுணையாக இருக்கின்றன. எஸ்ஐபி முறையில் மாதம் ரூபாய் 500-க்கும் ஆரம்பித்து முதலீடு செய்யலாம். எப்பொழுதெல்லாம் உபரி பணம் இருக்கிறதோ அப்பொழுது லிக்விட் ஃபண்டில் முதலீடு செய்து எஸ்டிபி முறையில் சிறுக சிறுக ஈக்விட்டி ஃபண்டுக்கு மாற்றிக்கொள்ளலாம். இந்த முறையில் முதலீடு செய்வதால் முதலீடுகள் சிறந்த முறையில் வளர்ச்சி அடையும்" என்றார். 

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement
[X] Close